Ads by Google Ads by Google

Fa’ai’u falepuipui misa a ni ulugali’i se to’alua


[ata: archive]
ausage@samoanews.com

Na fa’ai’u i le toese i Tafuna vevesi na tula’i mai i le va o ni ulugali’i se to’alua i le amataga o le vaiaso nei, ona o le taumafai lava o Leoleo e tausi le nonofo filemu o itu e lua, ma taofia ai le ono tula’i mai o ni isi fa’afitauli e sili atu ona matuia.

 

O le ulugali’i lea na misa i Tafuna na taofia na o le fafine i le falepuipui ma molia e le malo i moliaga mama e lua, ae o le ulugali’i lea na misa i Iliili, na taofia uma i laua e leoleo i le toese i Tafuna i le po o le aso Gafua ona o le tausiga o le filemu.

 

Ona o puipuiga a le tulafono i mataupu e tutupu mai i totonu o aiga, o le a le mafai ai e le Samoa News ona fa’alauiloa igoa o i latou o lo o a’afia i lenei mataupu.

 

O le mataupu lea na tula’i mai i Tafuna, na tupu tonu lava i luma o le Ofisa o Leoleo i Tafuna, ina ua molimauina e Leoleo ni ta’avale se lua ua afe fa’atasi atu i le vaega e paka ai ta’avale a le Ofisa o Leoleo, ma molimauina ai se ulugali’i o lo o misa ma tauupu, e ala i le e e atu o le isi i le tasi.

 

Ina ua ulufale i laua i totonu o le ofisa o Leoleo, sa fautuaina i laua e Leoleo e tausi le filemu ma soia le tauupu, ae sa le i usita’i ai le fafine e 24 tausaga le matua, ae sa fa’aauau pea ona ia e e aga’i i lona to’alua ma lafo i ai upu masoa a o fa’aofoga ali’i ma tama’ita’i Leoleo, ma faia ai loa le fa’aiuga e tu’u eseese i laua i potu e fa’atali ai le taimi e faatalatalanoa ai le la mataupu.

 

Na mae’a ona fa’atalanoa e le Leoleo le tamaloa e tusa ai o le fa’alavelave ua tupu, ona aga’i atu loa lea o le Leoleo e fa’atalanoa le fafine, po o le ua molia, peita’i ina ua taunu’u atu le Leoleo i totonu o le potu sa tu’u ai le fafine, na fiu e autilo ua leai se isi, ae ina ua aga’i atu le Leoleo i fafo i le vaega o lo o paka mai ai ta’avale, sa ia vaaia ai le fafine o lo o ia fa’aaoga se seleulu e ta tui ai pa’u o le ta’avale a lona to’alua, ma taofia fa’apagota ai loa o ia.

 

Na teena e le fafine moliaga mama e lua o lo o tu’uaia ai o ia, le moliaga o le faatupu vevesi i nofoaga faitele, atoa ai mal e moliaga o le fa’aleagaina o meatotino a le isi tagata i le tulaga tolu, ma ua tatalaina nei o ia i tua e aunoa ma se tupe na totogi e faatali ai lana iloiloga lea ua fa’atulaga e faia i le aso 3 Novema 2016.

 

O ni isi o tuutuuga o lo o tatala ai o ia i tua, e aofia ai le fa’asa lea ona ia toe fa’atupuina se vevesi i le va o ia ma lona to’alua.

 

Ae o le mataupu i le ulugali’i na vevesi i Iliili, na tofu atu i le Ofisa o Leoleo i Tafuna, ina ua faila e le Tama o le tamaloa sana tagi i le Ofisa o Leoleo fa’asaga i le to’alua a lona afafine, i lona fa’aleagaina lea o le tino o lana ta’avale.

 

O le vevesi na tula’i mai ina ua alu le atali’i o le Tama sa tagi i Leoleo i Iliili i le fale o lo o nonofo ai lona to’alua lea ua la tete’e nei e asi lana fanau o lo o i ai.

 

O lo o taua i fa’amaumauga a le fa’amasinoga le i ai o se poloaiga mai le Fa’amasinoga mai le Setete o Hawaii, e fa’asa ai ona toe alu le ali’i lea e vaai lona to’alua ma lana fanau, ma o lea poloaiga fa’atoa mae’a lona aoga i le aso 2 Setema 2020, ma o lo o taua i vaega o lea poloaiga le fa’asa lea ona fa’afeso’ota’i e le ali’i lea lona to’alua ma lana fanau, peita’i sa ia alu pea o ia e asi si ana fanau i le amataga o le vaiaso nei.

 

Na ulufale le ua molia ma si’i lona atali’i e 4 tausaga ma sauni loa o le a la tuua le fale, peita’i sa musu le fafine e ave lana tama, ma i’u ai loa ina tula’i mai se taugaupu i lo la va i fafo o le fale.

 

E fa’alua ona tu’i e le ua molia lona to’alua ma tau pau ai o ia i tua e pei ona taua i fa’amaumauga a le fa’amasinoga, ma maua ai loa ma le avanoa e fa’anofo lelei ai e le ua molia lona atali’i i le nofoa pito i luma o le ta’avale ma sauni o le a la o ese.

 

A o fa’asolomuli e le ua molia le ta’avale, o le taimi lea na tago atu ai loa lona to’alua i le suo ma amata ai loa ona ta sasa tioata o le ta’avale, amata mai lava i le tioata tele pito i luma ma fa’asolo atu ai i tioata i autafa ma faaleagaina uma ai le ta’avale, a o i ai pea lana tama e 4 tausaga i totonu o le ta’avale.

 

I le mae’a ai ona fa’atino e le fafine o lea gaioiga, o le taimi fo’i lea na aga’i ese atu ai le ua molia ma lona atali’i. O le mae’a ai o su’esu’ega a Leoleo, na faia ai loa le fa’aiuga ina ia taofia uma le ulugali’i i le toese i Tafuna i le po o le aso Gafua te’a nei.

 

Na fa’ailoa e le afioga i le ali’i fa’amasino ia Fiti A. Sunia i le fafine i le aso Lua na sosoo ai, le leai o ni moliaga a le malo ua faila fa’asaga ia te ia, ae o le a fa’aauau pea su’esu’ega a Leoleo ona iloa ai loa lea pe i ai ni moliaga e ono faila fa’asaga ia te ia is e taimi o i luma.

 

Ae mo lona to’alua, ua molia o ia i moliaga mama e lua o le fa’atupu vevesi i nofoaga faitele, atoa ai ma lona le usitaia o le poloaiga e fa’asa ai ona ia toe fa’afeso’ota’i lona to’alua ma lana fanau, ma ua toe tatala o ia i tua e aunoa ma se tupe na totogi e fa’atali ai lana iloiloga lea ua fa’atulaga e faia i le masina fou.

 

O ni isi o tuutuuga ua tatala ai le ua molia e aofia ai le fa’asa lea ona ia toe fa’afeso’ota’iina lona to’alua, tausi le filemu ma aua ne’i ona toe solia se tulafono.