O ananafi le aso lona lua talu ona fa’agasolo mai le fa’amasinoga autu a le susuga a Mamona Unasa, lea o lo o tu’uaia i lona faia o uiga mataga i se teineititi e 15 tausaga le matua i le fa’aiuga o le tausaga e 2015 atoa ai ma le amataga o le tausaga lenei 2016.

A o fa’afofoga ai ma le toto’a ali’i ma tama’ita’i iloilo iuga e to’a 6 o lo o latou iloiloina se fa’aiuga o lenei mataupu, na valaauina ai e le itu a le malo ana ulua’i molimau latou te fa’ataotoina le alafua o le mataupu atoa o lo o tu’uaia ai le ua molia, e aofia ai tama’ita’i Leoleo e to’atolu sa latou fesiligia ma su’esu’eina le ua molia ina ua mae’a ona faila e le Tina o le teineititi na a’afia lana tagi i le malo.

E pei ona manino i molimau a Leoleo sa latou su’esu’eina lenei mataupu, e le gata sa ta’utino atu le ua molia i lona fa’atinoina o gaioiga fa’asolitulafono e pei ona tu’uaia ai o ia, ae sa ia tusiina fo’i i luga o le pepa sa tusia ai lana fa’amatalaga tusitusia ma saini ai lona lima e fa’amaonia atu ai, e moni ma fa’amaoni upu ma fa’amatalaga ua ia tusia ma tu’uina atu i Leoleo.

O se tasi o itu na taumafai le itu tete’e e tu’i fesili ai molimau a le malo, o le tulaga lea i le leai o se isi o i latou na i ai pe molimauina fo’i gaioiga o lo o tu’uaia le ua molia sa ia faia, aemaise ai fo’i le tulaga lea, o a latou fa’amatalaga o lo o fa’avae lea i luga o tala sa latou fa’alogo i ai, lea na tu’uina atu e le teineititi na a’afia ma lona Tina, peita’i ao fa’agasolo ai fa’afinauga i luma o le fa’amasinoga, na fa’amanino ai e le itu a le malo e fa’apea, e le gata sa fa’amaonia e le teineititi na a’afia i luma o Leoleo mea moni sa tutupu, ae na o o lava fo’i i le ua molia, sa ia fa’amaoniaina fo’i ia tulaga uma e ala i lana fa’amatalaga tusitusia ua mae’a ona tu’uina atu i Leoleo.

O mea molimau po o mau fa’amaonia ua talosaga le malo ina ia tu’uina atu i luma o le vaega iloilo iuga e avea ma mau fa’amaonia o lenei mataupu, o tusitusiga o lo o i ai le saini a le ali’i ua molia sa tu’uina atu i Leoleo.

Na fa’ailoa e le afioga i le ali’i fa’amasino sili ia Michael Kruse i le taimi na tu’uina atu ai fa’atonuga tomua i ali’i ma tama’ita’i iloilo iuga e fa’apea, o mau fa’amaonia e tatau ona taula’i i ai la latou silasila mo se fa’aiuga, e le gata o molimau tauto a soo se molimau e tu’uina mai i luma o le fa’amasinoga, ae fa’apea fo’i ma mea molimau e malilie itu e lua e fa’aulufale ina ia avea ma mau fa’amaonia, atoa ai  ma ni mataupu e malilie i ai loia a itu e lua.

A o fa’agasolo ai taualumaga o lenei mataupu, ua talosagaina e le loia a le malo ia Jerard Murphy ali’i ma tama’ita’i iloilo iuga ina ia fa’amatala pea o latou mafaufau ma to’a la latou silasila i soo se taimi e nofoia ai e molimau luga o le nofoa molimau, ina ia mafai ai ona latou mata’ituina gaioiga uma latou te fa’atinoina, e aofia ai lo latou  manatuaina o mea sa tutupu, aemaise ai fo’i o le fa’anaunauga o lo o i lona loto e fa’atatau i lana molimau.

O lo o i ai le fa’amoemoe a itu e lua e tatau ona mae’a i le taeao nei taualumaga uma o lenei mataupu, ma tu’uina mai ai loa se fa’aiuga aloaia i le nofosala o le ua molia poo le fa’asa’olotoina fo’i o ia e le nofosala.