Fa’afotutupu afioga Lealaisalanoa A. Ricky Salanoa i Fagasa

O le aso Tofi, Aperila 6, na usualele ai le itumalo o le Ituau Malosi, le pa'ia lasi o aiga ma le afio'aga o Fagasa ae tainane fo'i le maualuga le vaea o Fa'afeagaiga Taulagi a le afio'aga o Fagasa fa'atasi ai ma le mamalu lautele o Samoa na poto i le Maota i Falepule ma Moso'oi, i Malaeti'a e molimauina le fa'afotutupu a lana afioga le Tamaamaliliefa o le Tei o Tupua, Lealaisalanoa Aofagaimanu Ricky Salanoa.

 

I lea lava taeao na mae'a fa'apa'ia ai fo'i lana nofo i le sauniga pa'ia na ta'ita'ia ma fa'atautaia e le vasega uma o Fa'afeagaiga Taulagi i totonu o Fagasa lava, ma sa latou tofu sao mo lea fa'amoemoe.

 

Ina ua mae'a le sauniga pa'ia sa molita'i e fa'apa'iaina ai le nofo i luma o le Atua soifua, ona soso'o loa lea ma le usualele a le itumalo, samoa na potopoto faapea ma le pa'ia o le afio'aga.

 

O lea mea lava e afio ai le To'afiaoali'i, Susu ai le Matua ma le Usoali'i, Tapa'au ma le Fetalaiga i le latou to'afa ma upu ia te oe le Faga e Sa.

 

I lea aso na iloga ona lava saunia o le pa'ia o Aiga, aua na alu vaiaso e lua na muamua mai a'o le'i fa'ataunu'uina le fa'amoemoe o Aiga i le afio'aga ma le itumalo, o tali ona aiga masi'i mamao mai.

 

"Ou te mua'i fa'afetaia ou aiga masii mai Samoa, o le agaga o le alofa tula'i i le fa'amaoni o le alofa faitama ua ou va'ai i ai, a'o ai fo'i lo outou atali'i ua outou manatu mai ai, ma ua outou masi'i fa'aaloalo, o la outou teu ma a outou fa'aaloaloga, ou te pale ai i lo'u olaga atoa e toe tautua ai aiga,” o le tala lea a Lealaisalanoa.

 

Na masi'i mai Aiga Sa TuiAtua Tupua Tamasese Taisi, lea e ao ina so'otaga lelei i ai le nofo. Na fa'ailo mai fo'i Aiga o le afioga le Tama Aiga Tuimaleali'ifano, ae maise le Aiga Sa Leituala mai Nuusuatia, Safata ae maise o lona aiga Sa Faumuina i Lepea, Faleata.

 

I lea aso i lona fa'apa'iaga i le Itumalo sa vala'auina ai a'ao o le To'afa ina ia toto'o e fa'apa'ia Lealaisalanoa Ricky, ma sa iloga fo'i ona tofu fa'aaloaloga fa'asuaga uma o le Itumalo sa auai, ae maise o le mamalu na masi'i atu i itumalo ta'itasi o Samoa. O le vasega fo'i i le Lauti na laulelei sa tali toga fa'apea ma le seleni i latou i lea aso.

 

"Ua pau lava lenei o se saofa'i ua mafai ona o'o mai ai se fa'asoa o le seleni mo i matou le lauti na laulelei, ae o le mea ia na'o le ta'itasi lava toga, ae o lea ua lima toga tetele ma le seleni e 60. ua lava ma totoe fo'i le saofa'i ai i molimauina le aso o le afioga le tamaamaliliefa” o  se tala ata lea a se tasi o matai sa auai i lea aso o le nofo a Lealaisalanoa.

 

E le galo fo'i ia te ia le pa'ia o ona aiga i Amerika Samoa, "O lo outou titifaitama, e le fa'aluaina se tautalaga, ae fa'afetai, ua maua so'u avanoa o le a ou taumafai ai se tautua mo le pa'ia o Aiga. Ou te iloa e le a'u so'u titi pe so'o so'u pale i se taumafaiga ou te faia, ae fa'amoemoe i le Atua, aua e le faigofie le ma'a salafa lea ua outou fa'anofo ai lo outou atali'i."

 

O le tautua a Lealaisalanoai lana ekalesia, sa mua'i avea ai o ia ma tagata o le Ekalesia Fa'apotopotoga Kerisiano i Amerika Samoa a'o la'ititi lava ae tofia e faia ma Tiakono i le tausaga e 2000. E o'o mai i lenei taimi o lo'o malosi lava lona tulai mai i lea tofiga ma o loo avea o ia ma Sui Totino o le Komiti o le Foa'i mo Fa'afeagaiga a le latou Ekalesia.

 

O lana tautua i lona afio'aga ma Aiga na soifua a'e lava o ia o va'ai i le tautua a lona tama matua, o le tama lea o lona tina, ae o lona tina fo'i o le ulumatua o le fanau lea, le afioga le Tamaamaliliefa Lealaisalanoa ma lona tina matua Tuufue Orepa Tua. O le ala lea o lona ola magafagafa i le tausiga o aiga, aua sa va'ai i ai o fa'atino, e le mana'o fo'i lona tama lea i se mea e fa'aletonu e tautua ai aiga.

 

O le suafa fo'i o le Aofagaimanu sa mua'i fa'ae'e ia te ia e lona aiga, e tautua ai, ae sa fiafia lava o ia i le avea ma totino fo'i o le Aumaga a'o talavou, e le'i matai. O le tausaga e 1997 lea na fa'asuafaina ai ia Aofagaimanu mo lona aiga seia o'o mai nei i le 2017. O le masina o Fepuari 25, 2017 na i'u ai se fa'ai'uga a aiga, o le a fa'asuafaina o ia ia Lealaisalanoa.

 

I lona ola a'e sa amata ana a'oga, na amata mai lava ana a'oa'oga i le A'oga Le'atele i Fagasa, ma na o'o mai loa ana a'oga i le vasega 6 ae si'itia i fafo e lona tama ma fa'aa'oga ai i le Waimanalo Intermediate School i Hawaii. Ina ua mae'a fa'au'u mai a'oa'oga maualuga i le tausaga 1985, na toe fa'afo'i mai lava o ia i ona matua i Fagasa. O le tausaga fo'i lea sa ia molimauina ai loa le tele o le tautua a lona tama ae ua fa'asuafaina ia Lealaisalanoa.

 

O le toe taliu mai sa galue ai loa i le Accounts Payable a le Malo i Utulei mai le tausaga 1988-1989. Sosoo lea ma le faigaluega i le avea ma Shift Officer i le Ofisa o le Kovana i le Faigamalo a Coleman & Galea'i 1989-1992. Toe taliu ane i le Fono Faitulafono ina ua suia le faigamalo ma faigaluega ai loa i le Senate mai le 1992 se'ia o'o mai lava i le 2012.

 

2013 ua amata mai ai loa le tautua i le Ofisa o le Kovana i lenei faigamalo Kovana Lolo Moliga & Lemanu Peleti Mauga o le Protocol Officer a le Kovana Sili. Lea o lo'o fa'aauau pea lea tofiga, ma ua ia fa'ailoa fo'i, "Ou te fa'afetaia lava so'o se avanoa e tautuaina ai ta'ita'i o le tatou malo, aua ua matele fo'i ona iloa gofie mea uma e tatau ona tapena mo i latou, ona o le fitaituga o tofi o fa'aea ai e le atunu'u lautele."

Comment Here