Ads by Google Ads by Google

Fa’afofoga Senatoa i finagalo aufai pisinisi fa’asaga lafoga fou malo

ausage@samoanews.com

O le vaiaso nei lea na fa’afofoga ai afioga i Senatoa i molimau mai fa’auluuluga o ni isi o Pisinisi i le atunu’u, i lo latou tulaga e fa’atatau i pili tupe a le malo lea ua taoto i luma o le Fono Faitulafono, e fa’aee ai lafoga i oloa ma pisinisi.

 

O le aso Lua ma le aso Tofi o le vaiaso nei, o aso ia e lua na fa’ataunu’uina ai iloiloga a le Komiti o le Paketi ma le Tupe Fa’asoasoa a le Senate, mo le fesiligiaina o sui o le Aufai Pisinisi i so latou lagona e fa’atatau i lafoga fou ua fuafua le malo e fa’aee.

 

O ni isi o le aufai pisinisi na auai i le iloiloga sa faia i le aso Lua o le vaiaso nei, e aofia ai le Peresetene o le kamupani a le G.H.C Reid, susuga Olivia Reid-Gillet; o le Pulesili le tumau o le G.H.C Reid & Co, susuga Cherith Lober; o le Pulesili o le kamupani a le South Pacific Distributors, susuga Mike Tolmie, ma le Sui Peresetene o le Kamupani a le Tautua Mo Oe (TMO) ia Francine Gaisoa-Liulevaega.

 

O molimau sa mafai ona tuuina atu e sui o kamupani eseese i luma o le komiti a le Senate, o lo o atagia fo’i i tusitusiga ua mae’a ona latou tauaaoina atu i maota e lua, lea o lo o fa’aalia ai lo latou lagolagoina o ni isi o tulafono a le malo, ae tete’e i ni isi o lafoga, ona o le talitonuga, e tele se afaina o a latou pisinisi pe afai ae pasia uma lafoga ua fuafua le malo e fa’aee.

 

Na fa’ailoa e le afioga i le ali’i senatoa ia Magalei Logovi’i, o ia fo’i lea o le ta’ita’i komiti, o le agaga atoa o le iloiloga, o le fia maua lea e afioga i Senatoa o le avanoa e fa’afofoga ai i molimau a le aufai pisinisi, i le tulaga e oo i ai a latou pisinisi pe afai ae pasia uma lafoga a le malo.

 

“E le mafai ona matou faia se faaiuga pe afai matou te le malamalama i le tulaga tonu e oo i ai a outou pisinisi, pe afai ae pasia lafoga eseese nei a le malo. O le taua lena o la tatou feiloaiga, ina ia mafai ai ona faailoa mai so outou lagona pe tou te lagolagoina lafoga a le malo, ae o a fo’i tulaga e lelei ai ni isi o nei lafoga mo pisinisi,” o le saunoaga lea a Magalei.

 

Na maua uma le avanoa e saunoa ai sui o le aufai pisinisi i luma o le Komiti, mo le fa’ailoaina lea o a’afiaga o a latou pisinisi e oo i ai pe afai ae pasia lafoga.

 

Mo le lafoga mo pisinisi e 1%, e matua le lagolagoina lava e le aufai pisinisi. E talitonu i latou, o le lafoga lenei e atili ai ona pagatia le pisinisi o lo o fa’aletonu ana tupe maua i le tausaga atoa. E le gata i lea, e foliga mai ua taumafai le malo e fa’avae lenei lafoga ina ia maua ai pisinisi e le o fa’amaoni i le totogiina o lafoga i le malo, ae o le a avea ai ma auala e a’afia atu ai ma pisinisi o loo faamaoni pea e totogi a latou lafoga i le malo i tausaga taitasi.

 

Na taua e le sui a le TMO lona lagolagoina o taumafaiga a le malo e saili ai ni isi tupe fa’aopoopo mo le malo. I lona taofi, afai ua manatu le malo e saili ni auala e fa’atele ai ana tupe maua, e tatau fo’i ona saili e le malo auala e fa’aitiitia ai tupe fa’aalu, ona paleni lea ma talafeagai, nai lo le manatu e fa’aopoopo tupe maua ae atili ai ona maualuga le aofa’i o tupe fa’aalu.

 

O se tasi o mataupu na mamafa i ai le molimau a le peresetene o le G.H.C Reid, susuga Reid-Gillet i luma o le komiti, o le suiga o le lafoga o le ‘ava malosi, atoa ai ma le taumafaiga ina ia suia le auala e fa’alafoga ai uta o oloa mai fafo, ina ia taofia ai le fa’aaogaina e ni isi o pisinisi o lisiti pepelo e fa’ailoa mai ai le tau aofa’i o le uta o loo aumai.

 

Na taua e Reid-Gillet e fa’apea, o se faiga le alofa lea o lo o faia e ni isi o pisinisi, ina ia laititi ai le lafoga latou te totogiina i le malo.

 

Na tau fai si vevela laititi o saunoaga a le aufai pisinisi, ina ua taua e le susuga a Tolmie i lana molimau e fa’apea, o le suiga o le lafoga mo le ‘ava malosi e pei ona fuafuaina e le malo, o le a a’afia ai tupe maua a lana kamupani, ae laititi ai tupe e totogi e isi pisinisi o loo aumaia fo’i lea oloa i le atunuu mo le lafoga.

 

Na toe tali fuaitau le peresetene o le G.H.C Reid ma ia saunoa e fa’apea, e le sa’o le molimau ua taoto i luma o le komiti.

 

Na taua e Reid-Gillet e fa’apea, e mafua ona latou lagolagoina le sii o le lafoga o le ava malosi, ina ia mafai ai ona taofi faiga le faamaoni o loo faia e ni isi o pisinisi, o le fa’aaoga o lisiti pepelo e faailoa mai ai le tau o le uta o loo aumai, ina ia laititi ai le latou lafoga e totogi i le malo.

 

“Matou te mananao e fa’atele le matou lafoga e totogi i le malo. O le tele o pisinisi i le atunuu o lo o alu a latou tupe i fafo. O le matou kamupani, e nofo lava i Amerika Samoa a matou tupe e fesoasoani ai i le atina’e o le atunu’u. E le sa’o la le molimau fai mai e mafua ona matou lagolagoina le lafoga, ina ia laititi ai le matou tupe e totogi i le malo i lafoga,” o le saunoaga lea Reid-Gillet.

 

Na faafetaia e Magalei sui o le aufai pisinisi mo a latou molimau. O le taua o le iloiloga, o le a maua ai manatu o le komiti e toe fesiligia ai le Komiti Saili Tupe a le malo, mo ni isi o vaega o lo o fa’aletonu i le tulafono.