Ads by Google Ads by Google

Fa’afofoga Le’i i atugaluga Fa’amasinoga fa’asaga auala fa’atino ai tiute Leoleo


Le Komesina o Leoleo, tofa Le’i Sonny Thompson [ata AF]
ausage@samoanews.com

O le iloiloga fa’apitoa lea na faia i luma o le Fa’amasinoga Fa’aitumalo i le taeao ananafi, na fa’afofoga ai ma le toto’a le afioga i le Komesina fou o le Matagaluega o Leoleo, tofa Le’i Sonny Thompson, i atugaluga a le Fa’amasinoga o lo o i ai, fa’asaga i auala o lo o fa’atinoina ai le tautua a Leoleo mo mataupu tau solitulafono eseese o lo o tuuina atu i luma o le fa’amasinoga.

 

Na avea mataupu a ni tagatanu’u se to’alua sa fofogaina i luma o le fa’amasinoga fa’aitumalo ma auala na poloaina ai loa e le afioga i le ali’i fa’amasino ia Fiti Sunia le oo atu o le Komesina o Leoleo, Sui Komesina, fa’apea ai Leoleo e to’alua sa aofia i laua i le taulimaina o mataupu e pei ona fesiligia, ina ia oo atu i luma o le fa’amasinoga mo le fa’atalanoaina o lenei mataupu.

 

O le mataupu a le ali’i o Olesa Filisi e pei ona fa’ailoa e Sunia i lana folasaga, sa taofia o ia e leoleo ma tu’uaia i le moliaga mama o le fa’atupu vevesi i nofoaga faitele i le masina o Tesema 2016, ae na fa’atoa maua e le loia a le malo le ripoti o loo i ai mau fa’amaonia a leoleo i le aso 15 Mati na te’a nei, tusa lea ua silia i le 3 masina o fa’atalitali, ma mafua ai ona tolopo fa’a 5 e le fa’amasinoga le iloiloga a lenei ali’i, ma le mataupu a le ali’i o Alexander Young, lea na molia i moliaga tau ta’avale afi i le le faia o le fusipa’u, ae loka ai o ia i le toese i Tafuna mo le po e tasi, ina ua musu lea ali’i e saini lana pepa sala sa tu’uina atu e le leoleo.

 

O se tasi o mataupu sa tele i ai fesili a le afioga i le ali’i fa’amasino ia Sunia, o le auala e fa’atautaia ai galuega a Leoleo i taimi e tusia ai ripoti mo mataupu tau solitulafono latou te su’esu’eina, lea na fa’amanino e le Sui Komesina ia Falanaipupu Taase Sagapolutele e fa’apea, e na o le tasi lava le aso e tatau ona fa’ata’amilo ai le ripoti a le leoleo talu mai le taimi na mae’a ai ona tusia, ae taunu’u loa i luga o le Ofisa o le Loia Sili.

 

Saunoa Falanaipupu e fa’apea, a mae’a ona tusia e le Leoleo lana ripoti mo mataupu tau solitulafono mama, ona tu’uina atu loa lea i le vaega e i ai Fa’amaumauga a le Ofisa o Leoleo (Record Division) mo le iloiloina, lea o lo o galue ai Comdr. Maifea, ona tu’uina atu ai loa lea i luga o le Ofisa o le Loia Sili.

 

Saunoa le Komesina o Leoleo ia Le’i i luma o le fa’amainoga e fa’apea, e tusa ai o taiala o loo faavae ai galuega a Leoleo, e le tatau ona silia i le 48 itula le umi e fa’atali ai le Ofisa o le Loia Sili i le ripoti, aua o le taimi tonu lea e tatau ona mae’a ai galuega a le leoleo mo le tusiaina o lana ripoti e tusa ai o le fa’alavelave sa tupu.

 

O se tasi o mataupu sa fia malamalama i ai Sunia, o le mataupu lea na taofia ai e leoleo le ali’i o Young i le toese i Tafuna mo le po e tasi, ina ua musu o ia e saini lana pepa sala i le le faia o le fusipa’u, ae na fa’amanino e le tama’ita’i leoleo ia Cpt. Pou Supapo, lea ua tofia nei e avea ma Ta’ita’i o le Vaega o Leoleo Su’esu’e e fa’apea, i lalo o le tulafono, e i ai le malosi i le Leoleo e taofia ai le ave ta’avale pe afai e i ai se fete’enaiga e tula’i mai i le taimi e fa’atinoina ai le galuega, peita’i na saunoa Sunia e fa’apea, e ofo le fa’amasinoga i le mafai ona taofia o se tagata i le toese mo le po e tasi ina ua musu e saini le pepa sala ona o se solitulafono tau ta’avale afi e na o le $25 le salatupe lona mamafa.

 

E ese mai i le mataupu a Filisi ma Young e pei ona fia maua ai e Sunia fa’amatalaga mai leoleo sa gafa ma le taulimaina o nei mataupu, sa fesiligia e le afioga i le ali’i fa’amasino le sui Komesina ia Falanaipupu e tusa ai o ni isi o mataupu o loo fia maua ai lava e le fa’amasinoga se maninoga, e mafua mai i le molimau fa’atauto a se leoleo sa faia i le taimi o se iloiloga i se solitulafono mamafa sa tu’uaia ai se tagatanu’u o le atunu’u, lea na i’u ina solofua e le fa’amasinoga le moliaga mamafa, e mafua mai i le eseese o fa’amatalaga o loo tusia i totonu o le ripoti a le Leoleo, atoa ai ma le molimau sa tu’uina atu e le Leoleo i le taimi na fesiligia ai o ia i le iloiloga.

 

Ae i le fa’aiuga o le iloiloga e pei ona faamatala e Sunia ia Falanaipupu, na taua ai e le Leoleo i lana molimau e fa’apea, e le o ia na tusia le ripoti e tusa ai o le mataupu ua solofua, ae o le ali’i Leoleo ia Falanaipupu na tusia, peita’i na teena e le afioga i le Sui Komesina lea tulaga ma ia taua ai, na te lei tusiaina se ripoti e pei ona fesiligia ai o ia.

 

O se tasi o mataupu sa fia malamalama i ai le fa’amasinoga, o le mataupu a le susuga ia Michael Agasiva lea sa taulimaina e le ali’i leoleo su’esu’e ia Det. [Sili] Sea, lea na sainia e le fa’amasinoga le poloaiga (arrest warrant) e pu’e fa’apagota mai ai Agasiva, lea na faila e Det. Sea le ripoti e fa’ailoa mai ai ua mae’a ona pu’e fa’apagota Agasiva ae mulimuli ane iloa e le fa’amasinoga e le sa’o lea ripoti, e lei fa’ataunu’uina le poloaiga e pu’e fa’apagota ai Agasiva, peita’i na saunoa Falanaipupu e fa’apea, soo se taimi lava e saini ai e le fa’amasinoga se poloaiga e pu’e fa’apagota ai se tagata, o le taimi lava lea e tatau ai i le Ofisa o Leoleo ona fa’ataunu’u loa lea poloaiga a le fa’amasinoga.

 

I le fa’aiuga o le iloiloga, na fa’ailoa ai e Le’i ia Sunia le galulue o ta’ita’i o le Ofisa o Leoleo e fa’atulaga vaega uma ina ia fa’aleleia atili ai pea le tautua a Leoleo i le atunu’u, ma ia folafola ai i le fa’amasinoga le tatau lea ona si’itia le auaunaga a Leoleo i le lumana’i, atoa ai ma le le tatau lea ona toe tula’i mai ia fa’aletonu i se taimi o i luma.