I le fa’aleoina ai e le to’atele o afioga i Faipule o le agaga fa’afetai i le faigamalo a Lolo ma Lemanu, ona o galuega lelei ma atina’e o lo o fa’aauau pea ona fa’agasolo i totonu o a latou afioaga ma itumalo, o le vaiaso nei na fa’aleoina ai fo’i e le afioga i le Tama’ita’i Faipuleia Vui Florence Saulo lea lava fo’i agaga fa’afetai, ona o galuega ua mafai ona fa’ataunu’uina mo lona itumalo o Tualauta.

E le gata na tula’i le afioga i le tama’ita’i faipule ma fa’aleo lona agaga fa’afetai i le faigamalo i luma o le maota, ae sa ia toe tusia fo’i se tusi ma tauaao atu i le afioga i le ali’i kovana ia Lolo M. Moliga e fa’aleo atili ai le agaga o le fa’afetai.

Na taua e Vui i lana tusi i le Kovana lona agaga fa’afetai, e tusa ai o le fa’ataunu’uina o ni isi o galuega i totonu o le Itumalo ua tele tausaga o pagatia ai le itumalo ma le atunu’u, e pei o le auala i Ottoville lea ua amataina i le taimi nei.

O isi vaega o le itumalo e mafuli i ai fa’aletonu i auala e aofia ai Fagaima, lea e matua lolovaia lava pe a oo ina tetele timuga ma tafega.

Na taua e Vui i lana tusi e fa’apea, e le mafai e le itumalo ma ona ta’ita’i ona galulue fa’atasi galuega mo le fa’aleleia o auala, pe ana leai le lagolagosua a le afioga i le Kovana ma le faigamalo.

I le vaega sa masani ona to’a ai le vai i luma o le malumalu o le Ekalesia Mamona i Ottoville, na taua ai e Vui le agaga fa’agaeetia ina ua molimauina le aga’i atu ina tulaga lelei ma foai ai lenei fa’afitauli, pe afai ae mae’a aloaia galuega o lo o galulue ai le Konekarate i le taimi nei.

“E le gata o le agaga fa’afetai e fia momoli atu i lau afioga a le Kovana ma le Faigamalo ona o galuega lelei mo Tualauta, ae faapitoa fo’i le agaga fa’afetai i le Fa’atonusili o le Ofisa o Galuega a le malo, susuga a Faleosina Voigt ma le aufaigaluega, i le tali mai pea i soo se taimi e mana’omia ai la latou fesoasoani. O la outou tautua ua mafua ai ona fa’atino tulaga lelei mo le itumalo,” o le saunoaga lea a Vui.

I tulaga mo le fa’aleleia o auala, na taua e le afioga i le ali’i faipule ia Kitara Vaiau lona talosagaina o se fesoasoani mo le fausiaina lea o se uafu lelei ma mautu mo Aunu’u, atoa ai ma se va’a e gafa ma le tautuaina o tagata o le itumalo.

Na taua e le afioga i le ali’i Faipule mai le itumalo o Saole e fa’apea, ua tele tausaga o fetaia’i pea Aunu’u ma lu’itau i le leai o se va’a lelei a le malo na te tautuaina tagata o le motu. Ona o lea tulaga, ua fa’alagolago ai le tautuaina o tagata Aunu’u i va’a alia a tagata o lo o alala i totonu o le motu.

“O popolega o lo’u sui, ina ne’i i ai lava se taimi e tula’i mai ai se fa’aletonu i femalagaaiga i luga o va’a alia nei i le lumana’i, ma ma’imau ai soifua o ni isi se to’atele, ona sili ai loa lea ona tulaga pagatia lenei mataupu,” o le saunoaga lea a Kitara, ma ia talosagaina ai i le vaiaso na te’a nei le tatau lea ona silasila toto’a le faigaalo i le fa’atinoina o ni auala e fesoasoani ai mo tagata o lo o nonofo i totonu o Aunu’u, ina ia mautinoa e lelei uafu latou te fa’aaogaina, toe lelei fo’i se va’a e tautuaina i latou.