Fa’afetaia Lolo le filifilia Puleleiite avea ma Pule le tumau ASTCA

ausage@samoanews.com

Na taua e le afioga i le ali’i kovana ia Lolo Matalasi Moliga i luma o lana Kapeneta i se fonotaga sa usuia i le amataga o le vaiaso nei, lona fa’afetaia o le Komiti Fa’afoe a le Pulega o Fesootaiga Tau Telefoni a Amerika Samoa (ASTCA), ona o le fa’aiuga ua latou faia e tofia ai le afioga i le ali’i faipule ia Puleleiite Tufele Li’amatua e avea le Pulesili le tumau o le ASTCA mo le taimi nei.

 

O le saunoaga a le ali’i kovana e fa’alauiloa ai le tofiga fou o le afioga a Puleleiite, na faia lea ina ua ia fa’alauiloa ni isi o sui fou o lana kapeneta, e aofia ai ma le afioga a Fuamatu J.V Fuamatu lea ua filifilia e avea ma Kovana Itumalo o le Falelima i Sisifo.

 

O le vaiaso na te’a nei na fa’atauto aloaia ai le afioga a Fuamatu e avea ma Kovana _Itumalo o le Falelima i Sisifo, ina ua mae’a ona filifilia o ia e le ali’i kovana, i lalo o se fautuaga sa tu’uina atu i ai e le afioga i le Failautusi o le Ofisa o Mataupu Tau Samoa ia Mauga Tasi Asuega.

 

Ae ina ua oo mai le saunoaga a le ali’i kovana ia Puleleiite, sa ia fa’afeiloaia ai le avea o ia ma sui o lana kapeneta.

 

“E fa’afeiloai atu i le afioga i le ali’i faipule ia Puleleiite, o ia lea ua avea nei ma Pule le tumau o le Fale Telefoni a le malo, ae o ia fo’i lea ua avea ma ta’ita’ifono o le komiti fa’afoe mo lenei taimi, e fa’atalitali ai le taimi e filifilia ai se tasi e avea aloaia ma Pulesili o lenei vaega tele o le malo”, o le saunoaga lea a Lolo.

 

Na fa’afetaia e le ali’i kovana le tautua a le Kamupani Telefoni o lo o fa’aauau pea mo le malo i aso ta’itasi, peita’i o suiga e pei ona faia, o suiga ina ia manuia ai le aga’i i luma o le tautua a le Vaega o Fesootaiga.

 

E pei ona masani ai i soo se fonotaga a le kovana ma lana kapeneta, e maua ai le avanoa o sui o Vaega Tumaoti a le malo latou te fa’aleoina ai ripoti i tulaga o galuega ma atina’e o lo o fa’agasolo mo le atunu’u.

 

Ina ua maua le avanoa o Puleleiite i lana ulua’i fonotaga ma le Kapeneta i le vaiaso nei, sa ia fa’aleoina ai le agaga faafetai i le malo ma afioga i faatonusili e tusa ai o le lagolagoina pea o le tautua a le ASTCA mo le atunu’u, atoa ai ma le tele o galuega o lo o taumafai pea le ASTCA e fa’aleleia i le taimi nei, e aofia ai tulaga o laina telefoni.

 

“Pau se ripoti e mafai ona ou tu’uina atu i le taimi nei, o lo o taumafai e fai ni nai suiga mo le lelei o le tautua a le ASTCA, o tulaga lava o mea faapenei, e i ai i latou e tete’e ae i ai fo’i i latou e lagolago, ae o le agaga atoa o le Komiti Fa’afoe, ia fai suiga mo le fa’aleleia o le auaunaga i le atunu’u”, o le saunoaga lea a Puleleiite.

 

I tulaga o laina telefoni i le atunu’u, na taua e Puleleiite le galulue o le Ofisa e fa’aleleia le tautua mo afioaga i tua, lea o lo o maua mai ripoti ua tele taimi e le o ola ai laina telefoni a le ASTCA, ae i le tulaga i le tautua mo Manu’a, o lo o fa’aauau pea taumafaiga ina ia si’itia tulaga uma ina ia tutusa ai Tutuila ma Manu’a.

 

E pei ona silafia, o le vaiaso na te’a nei na filifilia ai e le Komiti Fa’afoe a le ASTCA le avea o Puleleiite ma Pulesili, e sui tulaga i le susuga ia Alex Sene Jr lea ua tofia e avea ma ta’ita’i o le isi vaega o le Vaega o Feso’ota’iga.

Comment Here