Ads by Google Ads by Google

Fa’afetaia Faipule polokalame ua maua ai galuega tagata faigaluega STP


Ni isi o tagata sa galulue i le kamupani a le Samoa Tuna Processors (STP) lea na tapunia se vaega o lana tautua i le masina o Tesema na te’a nei. [ata AF]
ausage@samoanews.com

Ua fa’aalia e ni isi o afioga i Faipule o le Fono Faitulafono lo latou fa’afetaia o le kovana ma le faigamalo, ona o le polokalame lea ua mafai ona maua galuega a ni isi o tagata faigaluega sa fa’amalolo mai a latou galuega, ina ua tapunia se vaega o le tautua a le kamupani o le Samoa Tuna Processors (STP) i totonu o le atunu’u i le fa’aiuga o le tausaga na te’a ei.

 

Na taua e ni isi o afioga i Faipule i luma o le maota o sui i le vaiaso nei e fa’apea, e taua tele le polokalame lea ua fa’atino e le malo e fesoasoani ai i tagata faigaluega sa leai ni galuega, ina ia mafai ai ona fesoasoani i le aiga o i latou na a’afia.

 

O le mataupu e fa’atatau i tagata sa galulue i le STP lea ua maua avanoa faigaluega e galulue ai i le taimi nei, na aofia i le molimau a le tama’ita’i Fa’atonusili o le Matagaluega o Tagata Faigaluega a le malo ia Eseneiaso Liu, i le taimi na fesiligia ai o ia e Faipule ma Senatoa i le vaiaso na te’a nei, ina ua iloilo tofiga a le kovana fa’asaga ia te ia.

 

Na taua e le tama’ita’i fa’atonusili fou e fa’apea, o le polokalame lea ua mafai ai ona maua avanoa faigaluega o i latou e to’a 143 sa galulue i le kamupani a le STP, na maua mai lea i se alagatupe mai le feterale e taua o le “Work Experience Grant Program” sa talosagaina e lana matagaluega, ina ia mafai ai ona maua ni galuega mo i latou sa a’afia.

 

“I lalo o le polokalame lea o loo fa’atupe mai e le feterale, e na o le to’a 200 tagata e mafai ona fa’a faigaluega ai, lea la ua maua ai loa ma le avanoa e fa’a faigaluega ai i latou e to’a 143 e pei ona taua”, o se vaega lea o le molimau a Eseneiaso i luma o le Fono Faitulafono i le vaiaso na te’a nei.

 

O le polokalame e pei ona fa’amanuiaina ai tagata faigaluega e pei ona taua, e le o se polokalame tumau e pei ona taua e le tama’ita’i fa’atonusili i lana molimau, ae o loo galulue lona Ofisa mo le tu’uina atu o se talosaga i le Matagaluega o Leipa a le malo tele, mo se alagatupe tumau e mafai ai ona fa’a faigaluega i latou ua a’afia i avanoa faigaluega tumau.

 

O i latou ua maua avanoa faigaluega i lalo o lenei polokalame e pei ona taua e le tama’ita’i fa’atonusili, ua tufatufa atu i pisinisi ma kamupani tua, ma o loo galulue i latou i le umi e mafai ona oo atu i le 6 itula i le aso, i le totogi e $5 i le itula.

 

O ni isi o i latou nei ua molimauina le galulue i ni isi o kamupani teuoloa tetele i le atunu’u, aemaise ai pisinisi laiti o loo mafai ona latou ofoina atu galuega mo i latou nei.

 

Na taua e le susuga ia Vainalepa Tunufa’i, o se tama e 49 tausaga le matua mai Pago Pago, lea ua maua le avanoa e galue ai i se tasi o Faleoloa i Tafuna lona fa’afetaia o le faigamalo, ina ua mafai ona latou aapa mai e saili auala e fesoasoani ai i o latou ma le tulaga pagatia ua latou fetaia’i.

 

“Talu ona ou malolo mai le STP i le masina o Tesema na te’a nei, sa na o le Tina lava o le aiga o loo faigaluega ma maua mai ai se seleni e tausi ai le fanau, ae fa’afetai i le faigamalo ua maua lenei fesoasoani e maua ai sina seleni mo le aiga”, o le saunoaga lea a Tunufa’i.

 

Na taua e Tunufa’i lona fiafia i lana galuega fou le tumau lea ua galue ai, o le teuina lea o uta o oloa i totonu o le Faleoloa.