Ads by Google Ads by Google

Fa’afetaia e pagota ma gasegase le alofa fa’aauau Kovana ma le malo


Le afioga i le ali’i Kovana, tofa i le Tootoo ia Lolo Matalasi Moliga i lana saunoaga i le taimi o lana asiasiga masani i le toese i Tafuna i le vaiaso nei. [ata AF]

Le taimi na tauaao atu ai e le Faletua o le Kovana ia Cynthia Moliga le meaalofa i se ali’i laititi na taofia i le falemai o Tamaiti, i le taimi o le asiasiga masani a le Kovana ma le malo i le vaiaso nei i le maota gasegase i Faga’alu. [ata AF]
ausage@samoanews.com

O pesepesega fa’aleagaga atoa ai ma siva fa’aleaganu’u, o auala ia na fa’aaoga e pagota o loo aumau i le toese i Tafuna e fa’ailoa mai ai lo latou agaga fa’afetai i le Kovana ma le faigamalo, ona o le manatuaina pea o i latou i taimi fiafia lenei o le tausaga.

 

Ae mo le mamalu o le atunu’u o lo o taofia i le maota gasegase i Faga’alu, o le lagona o le fa’afetai na momoli mai ai lo latou taliaina ma le loto fiafia o meaalofa uma na saunia e le malo mo i latou i lenei tausaga.

 

O le afioga i le ali’i kovana ia Lolo Matalasi Moliga ma lona faletua ia Cynthia Moliga, o le afioga i le Lutena Kovana ia Lemanu Peleti Mauga, o Ta’ita’i Fa’aleaganu’u aemaise ai le Kapeneta ma le aufaigaluega, o ni isi ia na mafai ona auai atu i le asiasiga fa’aauau a le Kovana i le toese i Tafuna fa’apea ai ma le Falema’i o le LBJ i le vaiaso nei.

 

O Lemanu ma le Faletua o le Kovana, atoa ai ni isi o Faatonusili ma le aufaigaluega, o i latou ia na auai i le asiasiga i le maota gasegase, mo le tufatufaina atu o meaalofa i gasegase uma o lo o taofia i totonu o le maota gasegase.

 

I le taimi na tauaao atu ai e le Faletua o le Kovana meaalofa i le to’atele o fanau, sa ia fa’ailoa i ai e fa’apea, “O meaalofa nei na aumai ia Lolo ma Lemanu mo outou i lenei kerisimasi.”

 

Na vaaia lagona fiafia o fanau aemaise matua ina ua asia i latou e Ta’ita’i o le atunu’u. Na fesili Lemanu i tama’ita’i tausima’i sa tiute i le potu o lo o taofia ai le fanau, poo latou e galulue i le Sifi po poo le Sifi ao, ae na tali tama’ita’i tausima’i, o latou e galulue fa’asoloatoa mo le 24 itula i le tele o aso, e mafua mai i le to’alaiti o le aufaiglauega o lo o i ai.

 

Saunoa Lemanu, “Talosia la o lo o totogi fa’alelei e le pulega a le falema’i a outou itula ova taimi.”

 

O le aufaipese a le Matagaluega o Tautua ma Auaunaga Lautele na fa’afiafia i le maota gasegase i pesega o le kerisimasi, a o tufatufaina atu meaalofa mo le mamalu o le atunu’u o lo o faataotolia i le Faleefu ma le Aofulu o tofaga, ona o ma’i o le tino ua a’afia ai i latou i lenei vaitau o le olaga.

 

Mo le sauniga i le toese i Tafuna, na tatala lava le sauniga i se tula’i fa’aaloalo e manatua ai le Fa’atonusili o le Matagaluega o Tautua ma Auaunaga Lautele, le tofa Taeaoafua Dr. Meki Solomona na usufono fa’afuase’i i le aso Gafua o le vaiaso nei.

 

I lana saunoaga faapitoa mo pagota, na taua ai e Lolo lona lagona le fiafia ia Lemanu, ina ua fo’i mai i le malaga sa toesea ai i le masina na te’a nei, ua uma ona saini e Lemanu le pepa e fa’ataga ai Taeaoafua ona malaga i le fonotaga sa faia i Amerika.

 

O le naunau tele o le Kovana i le soifua maloloina o le ali’i Fa’atonu, na ia faia ai le fa’atonuga i le Sui Fa’atonu ia Muavaefa’atasi Suisala ina ia malaga i le fonotaga i San Francisco, ae toe fa’atonu Taeaoafua e toe fo’i mai i le atunu’u.

 

Na fa’afetaia e Lolo le tautua a Taeaoafua i le malo, le atunu’u, afioaga aemaise ai lona aiga ma lana Ekalesia.

 

I lana saunoaga mo pagota, sa ia fa’afetaia ai i latou uma i lo latou onosa’i a o tuli ai a latou fa’asalaga i le toese. Na taua e Lolo lona fiafia ina ua maua se ripoti mai le Komesina o Leoleo ia Le’i Sonny Thompson, e le o toe atoa se to’a 180 o pagota o lo o taofia i Tafuna i le taimi nei. O lona manatu ua oso ane, e lua lava mafua’aga ua fa’aitiitia ai pagota i le toese, e le iloa pe o le to’atele o i latou ua suia olaga ma ua magalo uma i tua, poo le isi fo’i i itu, ua amata ona tau mama aao o ali’i Fa’amasino i le taimi e tuuina mai ai a latou fa’aiuga.

 

“A o outou aumau ai i lenei nofoaga, ia outou manatua e le o fa’agaloina outou e aiga aemaise ai le malo. O outou o tagatanu’u o le atunu’u, e le tatau fo’i ona fa’atuatuana’i lo outou aumau ai i lenei nofoaga,” o le saunoaga lea a le ali’i Kovana.

 

“To’atele pea tagata o lo o fa’asea i le fa’aalu e le malo o le taimi e asia ai outou i tausaga ta’itasi, ae o lo ma talitonuga ma Lemanu, e le tatau ona fa’agaloina outou. E pei o le fetalaiga a Iesu, sa ou i ai i le falema’i sa e asia a’u, sa ou i ai i le falepuipui sa e asia a’u.”

 

I le saunoaga faapitoa mai le ali’i Komesnia, na fa’afetaia ai e Le’i le malo aemaise ai i latou uma na auai atu i le asiasiga i lenei vaiaso, i lo latou manatua pea o uso ma tuafafine, Tama ma Tina o lo o taofia i le toese i Tafuna.

 

Sa ia talosagaina fo’i pagota uma o le atunu’u, ina ia latou galulue fa’atasi ma le Ofisa o Leoleo i le taumafaiga o tulaga uma e fa’aleleia ai le olaga i totonu o le nofoaga, ma avea ai le toese o se nofoaga e malupuipuia ma saogalemu mo i latou uma.