Ads by Google Ads by Google

Fa’afetaia e Lolo le kapineta galuega tautua le atunu’u i le 2017


Afioga i le kovana sili, Lolo Matalasi Moliga i le taimi o lana saunoaga i le fonotaga ma lana kaptineta i le vaiaso ua te’a. [ata: FS]
fi

I le fonotaga mulimuli o lenei tausaga a le afioga i le Kovana Sili, Lolo Matalasi Moliga, ma lana kapineta i le aso Tofi ua te’a sa toe fa’amanatu ai e le kovana i faatonu o matagaluega, ofisa ma vaega tu maoti o le malo, “o tatou o auauna a le atunu’u”.

 

O le fonotga sa faia i le Fale Laumei i Utulei, ma na saunoa fa’afetai ai le kovana i sui uma o lana kapineta i le galuega i lenei 12 maina, i le nofoaiga lona lua a le faigamalo a Lolo ma Lemanu.

 

I lenei masina, “toe nofo ma manatunatu i tua i le tausaga atoa, e ese le uiga ese mai nofoaiga i tua,” o Lolo lea i lana saunoaga i le kapineta. “E le o se galuega faigofie le galuega o lo’o outou feagai ai.

 

“E o’o foi ia maua [ma Lemanu] e i ai le ma talitonuga e fita atu le galuega o lo’o outou feagai ai, i le o le galuega lea e fai e i maua,” o a Lolo lea.

 

Mo sui o le kapineta, “E ala ona faigata la outou galuega, aua foi o la outou tautua, e a’afia ai soifua o o tatou tagata. E a’afia loa soifua o o tatou tagata i galuega, faigata loa a tatou galuega.”

 

Sa ia fa’amanatu i fa’atonu le taua o le manatu mamafa oi latou i galuega o lo’o faia ina ia aua ai ona a’afia le soifua o se tagata.

 

“E ui ona o tatou o ta’ita’i, ae o le mea moni lava, o tatou o auauna a le atunu’u. E le mafai ona e iloa le tigaina i lau galuega pe a le fai oe ma auauna,” o le saunoaga lea a le kovana i lana kapineta. “E fai oe ma ta’ita’i, ae o le fatu o lau galuega, o le galuega e fai e le auauna. Ola le atunu’u i lau galuega o lo’o fai.”

 

“O le agaga fa’afetai laea ma le atu lutena kovana, e le lava ma upu e momoli atu ai le fa’afetai,” o a Lolo lea. “O ma agaga fa’afetai ma le agaga vivii i le Atua, ona ua aoga lo tatou ola, e tautua lo tatou atunuu. O a isi mea e tutupu mai i le atunuu, la e silafia e le Atua ua tuu uma i ai lo tatou malosi, e tautua le atunuu.”

 

Saunoa le kovana “e tele fo’i mea fa’aletonu sa tatou faia ae afai na suia se olaga o se tagata e tasi pe lua i tulaga manuia, e le o se tautua ma’imau la, le tatou tautua.”

 

Sa toe fa’amalosi le kovana i lana kapineta, aua galuega a le malo o lo’o lumana’i.

 

“E sili atu ona faigata taimi ia o lo’o totoe o le tatou nofoaiga, i le o taimi ia ua mavae atu,” o a Lolo lea. “Aisea? Ona o le taua o le soifua o le atunuu. Uma lenei nofoaiga tuu ni mea ua mafai ona tatou faia mo taitai o lo’o mulimuli mai, ae ia soifua manuia le tatou atunuu.”

 

I le saunoaga a le afioga i le lutena kovana, sa ia faailoa ai i le kapineta e fa’apea ai, “o le galuega lea ua tatou tautua ai le atunuu, o se galuega e le faigofie. O le galuega e finau.”

 

“O la outou galuega e fai i aso uma, o le galuega lena a le kovana, o le tautuaina o le atunuu. Malo le galulue, malo le finau. Malo lava i le saili o mea lelei aua si o tatou atunuu,” ose vaega lea o le tautalaga a Lemanu.

 

I le amataga o le saunoaga a le kovana, sa momoli ai foi le fa’afetai i le ‘au tusitala mai vaega o nusipepa ma le au fa’asalalau (media) i le atunuu. Sa taua foi e le kovana, le aoga o le vaega fa’asalalau ma le au tusitala i totonu o malo fa’atemukalasi o le lalolagi.

 

“O le mea muamua, o le sa’olotoga lea e fa’asalalau ai, ma fa’ailoa ai so’o se faigamalo, o se tulaga aloaia lea i totonu o faigamalo fa’a-temukarasi,” o le saunoaga lea a Lolo. “A le i ai le media, le i ai le fa’alauiloa, e foliga mai, o se malo pulea e ta’ita’i ‘au ma vaega ‘au.”

 

“O le isi lenei elemeni  e pito sili ona taua, i so’o se faigamalo fa’a-temukarasi, ia lelei ona feso’otai le media ma le faigamalo. Fa’afetai atu i le tatou au fai nusipepa. E ui lava foi ina eseese i le tele o taimi, ae o eseese e aoga mo le aga’i i luma o le tatou faigamalo,” o le vaega lea o le tautalaga a le kovana.