Ads by Google Ads by Google

Fa’afetaia e le Fono Faitulafono le tautua a Aumua i Uosigitone


Le taimi na feiloa’i atu ai le afioga i le sui mai le laumua i Uosigitone ia Aumua Amata i afioga i Senatoa, ao lumana’i ai le feiloaiga ma le Fono Faitulafono i le taeao ananafi i le maota o le Senate. [ata AF]

Ta’ita’i o le Fono Faitulafono, le Peresetene o le Senate, le afioga i le Tama’ita’i o le Ao ia Gaoteote Palaie Tofau ma le Fofoga Fetalai o le Maota o Sui, tofa i le Tau Tootoo ia Savali Talavou Ale, fa’apea ai le sui filifilia o le atunu’u i le Konekeresi a Amerika, tofa Aumua Amata i le feiloaiga a le Fono ma Aumua i le taeao ananafi i le maota fono a le Senate, mo le fetufaa’iina o mataupu mo le manuia o Amerika Samoa. [ata AF]
ausage@samoanews.com

O le feiloaiga a le sui filifilia o le atunu’u i le laumua i Uosigitone, le tofa Aumua Aumata ma sui o le Fono Faitulafono a Amerika Samoa i le taeao ananafi, e le gata na maua ai le avanoa e fetufaa’i ai ta’ita’i o le atunu’u i auala e fa’aleleia ai le atina’e ma le tamaiaoga o le malo ma ona tagata, ae na mafai ai fo’i ona maua le avanoa e momoli ai le agaga fa’afetai a sui o le Fono Faitulafono i le tautua fa’aauau pea a le tama’ita’i faipule i totonu o le Konekeresi a Amerika.

 

E pei ona fa’atulaga e le Fa’avae Toe Teuteu a Amerika Samoa, le maua lea o le avanoa o le sui filifilia o le atunu’u e feiloa’i ai ma le Fono Faitulafono, ina ia mafai ai ona soalaupule ma fetufaa’i ta’ita’i i mataupu e fa’aleleia ai le tautuaina o le soifua manuia o le atunu’u.

 

I folasaga o lenei feiloaiga i le taeao ananafi, na fa’afetaia ai e le tofa a Aumua le tapuaiga a Amerika Samoa i ona ta’ita’i ma tagatanu’u uma, ao fa’atino ai ona tiute i le finauina lea o mataupu mo le manuia o le atunu’u i le fono a le malo tele o Amerika.

 

“E le tau fa’alauiloaina galuega fa’atauva’a sa ou fa’atinoina, aua o nei galuega, e le na o a’u sa fa’atinoina, ae sa mafai ona fa’atinoina e ala i lo outou lagolago mai atoa ai ma so’u malosi fa’atauva’a, fa’atasi ai ma le fa’amanuia mai o le Atua ia Amerika Samoa”, o ulua’i saunoaga ia a le tama’ita’i faipule mai le laumua i Uosigitone.

 

E tele mataupu na fa’alauiloa e Aumua i luma o le Fono Faitulafono o loo galulue i ai lona Ofisa mo le fa’amautuina, aemaise ai o ni isi o mataupu na amata fa’agasolo mai i le ulua’i 2 tausaga ua mavae atu o lana nofoaiga, ma o loo fa’aauau pea ona ia galue ai ma sui o le konekeresi a le malo tele.

 

O ni isi o nei mataupu sa ia fa’alauiloa e aofia ai talosaga mo le alagatupe fa’aopoopo e fesoasoani ai i le fa’aleleia o atina’e i totonu o Amerika Samoa e pei o auala, aoga, fale ma atina’e, aemaise ai taumafaiga ina ia maua se fesoasoani e fa’aleleia ai le auaunaga tau va’alele i le va o Tutuila ma Manu’a.

 

E pei ona manino i lana folasaga i luma o le Fono, o le isi lea fa’afitauli tele o loo fetaia’i pea ma le atunu’u i le tele o tausaga, o le leai lea o se kamupani va’alele mai fafo e fia tautuaina le va o motu o Tutuila ma Manu’a, e mafua mai i tulaga o tulafono a le feterale o loo tapui ai ni kamupani va’alele mai fafo ona lele i le va o ni ogaeleele o loo i totonu lava o le fa’amalumaluga a le Iunaite Setete.

 

O se tala fiafia e pei ona saunoa le tama’ita’i faipule, o le mafai lea e le maota o sui a le konekeresi ona pasia se pili sa ia fa’aulufaleina mo se tulafono taufa’aofi, e talosagaina ai le fa’alautele atu i le 6 masina e mafai ai ona maua le pemita e lele ai le va’alele mai le kamupani va’alele tua mo le tautuaina o auala tau femalagaaiga i le va o Tutuila ma Manu’a. O lo’o taoto nei i le senate a le konekeresi lea pili mo sa latou faaiuga.

 

I tulaga o atina’e tau pisinisi, na taua e Aumua le galulue pea o lona Ofisa e finauina tulafono e mafai ai ona fa’aagafua lafoga mo pisinisi, ina ia mafai ai ona maua le avanoa e fa’atosina mai ai pisinisi tetele mai fafo e fa’atutu a latou lala i totonu o Amerika Samoa, e le gata e maua ai tupe fa’aopoopo mo le malo, ae maua ai fo’i galuega mo tagata lautele.

 

Ina ua maua avanoa o afioga i senatoa ma faipule e fesiligia ai le sui faipule mai le konekeresi, sa mafuli ai saunoaga i le agaga fa’afetai ma le fa’amalo e tusa ai o galuega lelei o loo fa’aauau pea ona ia fa’atinoina mo le atunu’u.

 

Saunoa le afioga i le ali’i peresetene o le Senate ia Gaoteote Palaie Tofau e fa’apea, o galuega e pei ona fita i tuga i ai le afioga i le tama’ita’i faipule, e le o ni galuega e faigofie ona maua ni tali, ae fa’amoemoe lava le vave maua mai o tali lelei e fa’afiafia ai le atunu’u i le malosi o le tapuaiga a Amerika Samoa ma ona ta’ita’i.

 

Na fa’afetaia e le fofoga fetalai ia Savali Talavou Ale taumafaiga a Aumua i le finauina lea o auala e fa’aagafua ai tulaga o lafoga totogi mo kamupani tetele, ina ia mafai ai ona tatala le avanoa e ulufale mai ai kamupani tetele mai fafo e aofia ai ma le malo tele e fa’atutu a latou lala i le atunu’u, ma atili ai ona malosi le itu tau i le tamaoaiga o le atunu’u.