Ads by Google Ads by Google

Fa’afetaia atunu’u lautele le tautua a ali’i ma tama’ita’i Leoleo


Le afioga i le Kovana ia Lolo Matalasi Moliga ma le Komesina o Leoleo ia Le’i Sonny Thompson i le taimi na latou asia ai le tula’i fa’aaloalo a le Ofisa o Leoleo ma ana tagata faigaluega. [ata AF]

Malu o le malo i le latou vaiaso fa’apitoa sa fa’amanatuina i le vaiaso atoa lenei [ata AF]
ausage@samoanews.com

Na fa’afetaia e le to’atele o le atunu’u le tautua a ali’i ma tama’ita’i Leoleo, a o fa’agasolo ai polokalame mo le latou vaiaso faapitoa i lenei vaiaso, lea na aofia ai ma le aso fa’apitoa mo Leoleo ma o latou aiga i le aso Tofi na te’a nei.

 

E le gata i le atunu’u lautele na maua le avanoa latou te fa’aleoina ai le agaga fa’afetai i le tautua a ali’i ma tama’ita’i, ae na o o lava fo’i i ta’ita’i o le malo e aofia ai ma le Komesina o Leoleo, sa latou fa’aaluina fo’i se taimi e fa’aleo ai le agaga fa’afetai i le tautua le fa’alogologotiga a le Ofisa o Leoleo i so o se taimi e mana’omia ai e le atunu’u se fesoasoani.

 

“E le faigofie la outou galuega o lo o fa’atinoina nei, o outou o le fa’amoemoega o le atunu’u i soo se taimi, i le tausiga o le filemu atoa ai ma le puipuia o le soifua o tagata ta’ito’atasi, e tusa lava po o le timu pe mugala fo’i le aso, e vaaia lava lo outou tali mai i soo se taimi, matou te momoe i o matou aiga i le malulu o le po ae o lo o outou tautua pea seia o o i le taeao”, o le saunoaga lea a le afioga i le ali’i Kovana ia Lolo Matalasi Moliga i lana saunoaga i le sauniga lotu e tatala aloaia ai le Vaiaso o Leoleo.

 

Saunoa le ali’i kovana e fa’apea, e ui o le Vaiaso o Leoleo o lo o fa’amanatuina i setete ma teritori uma o le Iunaite Setete, peita’i e tatau fo’i ia Amerika Samoa ona fa’ailoa lo latou lagolagoina o le tautua a ali’i ma tama’ita’i Leoleo, e ala i lo latou tula’i mai e fa’ailoa lo latou sapaia o fuafuaga ma polokalame fa’atino.

 

“O se tautua e le faigofie, e fa’alagolago le ola saogalemu o tagata i le tautua a ali’i ma tama’ita’i Leoleo, e le o i latou o ni agelu i le tele o taimi, ae o i latou fo’i o isi tagata soifua e pei o tatou uma, ae o lo o latou taumafai lava i le malosi e fa’atino ai le mea sili mo le atunu’u”, o le saunoaga lea a le ali’i kovana.

 

Na fa’aalu e le Komesina o Leoleo se taimi umi e fa’aleo ai lona agaga fa’afetai i ali’i ma tama’ita’i Leoleo, e tusa ai o le tautua o lo o latou fa’atinoina mo le atunu’u i aso uma. Na taua e Le’i le faigata o le galuega o lo o fa’atinoina e Leoleo i aso ta’itasi, ona o i latou o lo o fa’alagolago i ai le ola manuia o tagata uma, aemaise ta’ita’i totofi o le atunu’u.

 

“O se galuega e le faigofie, e le gata e galulue i le ao ma le po, ae ova fo’i itula e galulue ai i le tele o sifi, e mafua mai i le to’alaiti o le aufaigaluega. Afai e te fesili mai pe i ai se isi mea e sili atu ona taua i le Leoleo, o la’u tali, e taua i le Leoleo le saogalemu ma le sa’olotoga o tagata uma, o le galuega lena na fa’atauto i latou e fa’atino”, o le saunoaga lea a Le’i, le Komesina fou o Leoleo.

 

“Mo a’u fo’i ia, ou te fia fa’afetaia le tautua a ali’i ma tama’ita’i Leoleo, ua ou tofo i le faigata o le galuega ma ua ou lagonaina fo’i lo latou mafatia, e le maua se malolo, e le lava totogi, e tele lu’itau latou te fetaia’i, ae vaaia pea lo latou naunau e fa’atino le mea sili mo le atunu’u”.

 

Na fa’afetaia e Le’i lagona o le atunu’u e fa’atatau i le tautua a le Ofisa o Leoleo, o lagona fiafia atoa ai ma lagona fa’asea, ae tusa lava poo a ituaiga lagona e fa’aleo e le atunu’u, na taua e le ali’i Komesina fou o Leoleo le galulue pea o Leoleo e fa’atino o latou tiute na mafua ai ona fa’atauto i latou i lalo o le tulafono.

 

“E vaaia pea lava Leoleo i luga o le auala i aso uma ma taimi uma, afai e te le usita’i i le tulafono matou te taofi lau ta’avale ma tu’u atu se lapataiga ia te oe, po o le tu’uina atu fo’i o se sala ia te ia, ae afai e mamafa lau solitulafono, ona matou fa’atinoina lea o le isi gaioiga ina ia mafai ai ona aapa atu le tulafono e fa’atonutonu tulaga fa’aletonu ua e a’afia ai”, o le saunoaga lea a le ali’i Komesina o Leoleo.

 

Na fa’aleoina fo’i e ni isi o le atunu’u le agaga fa’afetai e tusa ai o le tautua a ali’i ma tama’ita’i Leoleo i le atunu’u.

 

Na taua e le afioga i le Tama a le Malo, Aumoeualogo Te’o J. Fuavai, lea fo’i sa avea muamua ma Komesina o le Ofisa o Leoleo a le malo i ni nofoaiga ua mavae atu, lona fiafia pea e fa’afetaia le tautua o loo fa’atinoina e Leoleo i totonu o le atunu’u i aso ta’itasi.

 

“E taua tele le tautua a Leoleo, o i latou na o loo mafua ai ona maua tagata solitulafono, o i latou na o lo o mafua ai ona leai ni fa’alavelave matuia e tutupu i luga o le alatele poo totonu o nu’u ma afioaga eseese, ma i’u ina ma’imau ai soifua o tagata lautele. Ana leai Leoleo e le saogalemu o fanau aoga i totonu o fale aoga, fa’apea ai tagata matutua i totonu o aiga, e taua tele la latou tautua, o le mafua’aga lena e le mafai ai ona galo i latou i talosaga i soo se taimi”, o le saunoaga lea a Aumoeualogo e fa’atatau i le tautua a Leoleo.

 

Na taua e se tasi o Tina matua o le atunu’u ia Agnes Tauinaola 67 tausaga o Fagaima lona fia fa’afetaia o le tautua a ali’i ma tama’ita’i Leoleo, lea ua mafua ai ona to’afilemu mea uma i totonu o le atunu’u.

 

Na fa’atusa e Tauinaola le tautua a ali’i ma tama’ita’i Leoleo o se pese malu e ofi gofie i loto o tagata, peita’i o tua atu o lo o i ai le lamatia o le soifua ma le oti o ni isi o taimi.

 

“Ou te fia fa’afetaia Leoleo uma o le malo e tusa ai o le latou tautua, e aofia ai ma Leoleo ua maliliu i le fa’atinoina o le latou tautua, e le galo outou uma”, o le saunoaga lea a Tauinaola.