Ads by Google Ads by Google

Fa’afetaia to’atele o matua tautua Foma’i o le fatu mai Amerika


[ata: freevector.com]
ausage@samoanews.com

O le toe taunu’u mai ai o se vaega o Foma’i mai le Iunivesite o Oregon Health Science (OHSU) lea ua fa’amoemoe e taunu’u mai i le atunu’u i le faaiuga o le vaiaso nei, mo le fa’aauauina o le latou tautua o lo o ofo fua mai i fanau o lo o a’afia i le gasegase o le fatu i Amerika Samoa, ua fa’aalia ai e ni isi o matua o lo o a’afia ai a latou fanau i lenei gasegase lo latou fa’afetaia o lenei tautua, ua mafai ai ona latou maua fua togafitiga ma tautua mo nai a latou fanau, ma fa’asao mai ai i latou mai le tau malaga atu i Amerika mo le fa’atinoina o nei togafitiga mo a latou fanau.

 

Na taua e le susuga a Tavita Lome o Leone lona agaga fa’afetai i le vaega a le OHSU, ina ua mafai ona fa’aauau pea la latou tautua mo fanau o le atunu’u o lo o a’afia i le gasegase o le fatu e aofia ai ma si ona afafine e 15 tausaga le matua.

 

“O le 4 lenei o tausaga talu ona maua fua e si o’u afafine lenei tautua mai foma’i o le fatu o lo o malaga mai i Amerika, mo le ofoina mai o le latou fesoasoani mo fanau a le atunu’u, o se tautua e le mafai ona fa’atupe e maua ma le Tina o le aoga, peita’i o le alofa o le Atua ua mafua ai ona aumai i Amerika Samoa lenei tautua, ma ua lagona ai le fiafia o le loto ma fa’afetai ai i le Atua”, o le saunoaga lea a Lome i le Samoa News i le aso ananafi.

 

Na taua e le susuga a Lome e fa’apea, talu ona auai si ona afafine i tautua maua fua nei a foma’i o le fatu mai Amerika, ua molimauina lava suiga ua i ai i lona malosi, ma o lo o fa’amaoni lava fo’i i laua o matua e fa’amanatu i si a laua tama ana vai e tatau ona inu ina ia maua ai lona malosi.

 

“Ou te fa’aigoaina e a’u lenei tautua maua fua, o Samaria Agalelei, ina ua latou tuua aiga ma galuega i Amerika ae malaga mai e tautua mo Amerika Samoa e aunoa ma se totogi”, o le saunoaga lea a Lome i se talanoaga i luga o le telefoni ma le Samoa News i le taeao nei, i le mae’a ai lea ona ia maua o le tala mai le Falema’i i LBJ, o le fa’aiuga o le vaisao nei e taunu’u mai ai foma’i o le fatu mai Amerika, ma galulue ai mo le vaiaso atoa i le falema’i i Faga’alu mo le fa’atinoina o le latou tautua masani.

 

Na taua e le Tina o Margaret Liliu o Aua lona agaga fiafia ina ua maua tala o le fa’aiuga o le vaiaso nei e toe taunu’u mai ai foma’i o le fatu mai Amerika e fesoasoani i le togafitiina o fanau a le atunu’u o lo o a’afia i le gasegase o le fatu e a’afia ai ma si ona atali’i ua 13 tausaga le matua.

 

O se molimau ola e pei ona taua e lenei Tina vavega sa faia e le Atua i lo la aiga, ina ua maua le lavea’i mo si ana tama o lo o a’afia i le gasegase o le fatu i le 2 tausaga talu ai, ma mafai ai loa ona fesoasoani foma’i i le togafitiina o si ana tama.

 

“E lima vaivai le ma aiga, e na o a’u e faigaluega i le kamupani i’a ae o le Tama ua nofo fale ina ua ma’i, ae tula’i mai loa le fa’aletonu e pei ona a’afia ai si a’u tama i le gasegase o le fatu, ae ui i lea tala fa’anoanoa, na mafai ona fesoasoani foma’i mai Amerika i si a’u tama ina ua malaga mai i le tausaga e 2014, lea ua mafua ai ona tele le suiga ua ou vaaia isi a’u tama i lenei taimi, o le viiga lava ia e fo’i i le Atua”, o le molimau lea a le Tina ia Liliu.

 

Sa ia taua le taugata o le tau o togafitiga e mana’omia mo lana tama, ina ua logoina i laua o lana tama ua a’afia i le ma’i o le fatu, peita’i ina ua la taumafai e saili se fesoasoani, sa fa’afuasei’ ona toe fa’ailoa atu e le falema’i i Fagaalu ia te i laua, o lo o i ai foma’i mai Amerika e galulue mo le togafitiina o tamaiti e a’afia i le ma’i o le fatu, atonu e mafai ai ona fesoasoani mo si ana tama.

 

“Talu mai le 2 tausaga talu ai seia oo mai i lenei taimi, ua tele le suiga ua molimauina i si a’u tama, e mafua mai i le galuega fesoasoani o Samaria Agalelei sa latou ofoina mai lenei tautua mo Amerika Samoa, ma ua matou toe fa’atalitali atu fo’i i lo latou toe malaga mai i lenei tausaga e fa’aauau le latou tautua”, o le saunoaga lea a le tina ia Liliu.

 

Ina ua fesiligia e le Samoa News le vaega e togafiti ai fanau i le falema’i o le LBJ i le aso ananafi, na taua ai e le tama’ita’i tausima’i sinia ia Laufofoga Ale le to’atele o matua ua mae’a ona fa’atulaga avanoa mo a latou fanau e vaai ai le foma’i mo le vaiaso fou.

 

“O fanal uma lava ia ua mae’a ona fa’atulaga a latou avanoa, o i latou ia o lo o fa’aauau pea ona faia a latou tui puipui i tausaga uma lava e malaga mai ai le vaega lenei o foma’i o le fatu mai Amerika, o lea fo’i la o lo o tatala atu pea le avanoa i matua ma fanau e valaau mai ai i le falema’i poo le vaega o le Soifua Maloloina, mo le fa’atulagaina o avanoa e vaai ai a outou fanau”, o le saunoaga lea a le tama’ita’i tausima’i ia Ale.

 

Na taua atili e Ale e fa’apea, o le vaega o foma’i lea ua fa’amoemoe e taunu’u mai i le po nei i le atunu’u, ma amata ai loa le latou tautua mo le vaiaso atoa o lo o lumana’i nei, a o lumana’i ai lo latou toe malaga ese atu ma le atunu’u i le po o le aso Faraile o le vaiaso fou.

 

“O le tautua a le vaega lenei o foma’i e ofo fuaina mai mo le atunu’u, ma o se avanoa lelei fo’i lea mo matua e fa’aauau ai le siakiina o fanau o lo o a’afia i le gasegase o le fatu”, o le saunoaga lea a Ale.

 

E le gata o togafitiga ua fa’amoemoe le vaega lenei o foma’i e ofo fua mai mo le atunu’u, ae o le a maua ai fo’i le avanoa e faia ai aoaoga mo le aufaigaluega a le falema’i e pei o Teine Tausima’i o lo o galulue i le tautuaina o le atunu’u, i le tomai ma agava’a e fa’atatau i le latou tautua.

 

E pei ona taua e Ale, o le vaega lenei o foma’i o le fatu na amata osia lenei galuega fai fa’atasi ma le LBJ i le 6 tausaga talu ai, ina ua talosagaina sa latou fesoasoani mo le togafitiga o fanau e a’afia i le gasegase o le fatu, ma fa’aauau mai ai lava seia oo mai i le taimi nei, ina ua malaga mai ona sui e ofo fua mai lenei tautua mo Amerika Samoa.

 

Na faamanino atili e Ale i le Samoa News e fa’apea, e na o fanau lava o lo o fa’aauau pea ona faia a latou talavai ma le vaega o foma’i fatu nei e mafai ona faia avanoa e vaai ai le foma’i i le vaiaso fou.