Ads by Google Ads by Google

Fa’afetai ni isi o Faipule i atina’e ua fa’atinoina e le malo

ausage@samoanews.com

I le toe amataina ai o galuega masani a le Fono Faitulafono mo lana nofoaiga lona 35 lea ua mae’a ona tatalaina i le taimi nei, na fa’aleo ai e ni isi o afioga i Faipule le agaga fa’afetai i le faigamalo, ona o atina’e eseese ua mafai ona fa’atinoina i totonu i itumalo ta’itasi o le atunu’u talu mai tausaga ua mavae.

 

E ui i le tele o fa’afitauli ma lu’itau o lo o fetaia’i ma le malo, e le gata i le itu tau tupe ae fa’apea fo’i i tulaga o le le lava o mea e fa’atino ai manaoga ma galuega, ae na taua e ni isi o afioga i Faipule le fa’aauau pea ona tu’uina mai e le malo o le latou tauau e fesoasoani ai i atina’e i totonu o itumalo ma afioaga eseese i le atunu’u.

 

I le aso Lulu na te’a nei, na fa’afetaia ai e le afioga i le ali’i faipule mai le itumalo o Manu’a #2 ia Vesi Talalelei Fautaunu Jr le va’a ua ofo mai e le malo e tautua ai le itumalo. Saunoa le ali’i faipule e fa’apea, e le na o se vaega toaititi na galulue i le fa’atinoina o le moemitiga ua mafua ai ona taunu’u mai le va’a o le MV Manu’atele, ae na tau fai galulue uma i ai le atunu’u atoa e pei o le faigamalo, Fono Faitulafono, fa’apea ai tagatanu’u lautele.

 

I le tulaga o le galuega tele o lo o fa’atinoina i le afioaga i Aua ma Leloaloa, na fa’afetaia ai e le afioga a Faimealelei Anthony Fu’e Allen le Pulega o le Eletise ma le Suavai (ASPA) e tusa ai o le galuega ua amataina, peita’i o le talosaga, e fia maua se tulaga ua taoto i ai le fa’amae’aina o lenei galuega taua, i le sosooina lea o paipa mo le suavai lafoa’i i le afioaga.

 

I tulaga o auala, na fa’afetaia ai e le afioga i le tama’ita’i Faipule ia Vui Florence Saulo le faigamalo, aemaise lava i le Matagaluega o Galuega Lautele a le malo, e tusa ai o le fausiaina o ni isi o auala i totonu o le afioaga i Pava’ia’i.

 

Saunoa Vui e fa’apea, e ui e silia i le 30 auala eseese i totonu o le itumalo o Tualauta o loo mana’omia le fa’atinoina ai o ni galuega fa’aleleia, peita’i o le agaga fa’afetai ona o lea ua amata ona tali mai le malo.

 

“O lea fo’i ua latalata mai le taimi e fa’atinoina ai le galuega mo le fa’aleleia o le vaega o le auala i Ottoville, le vaega e masani ona to’a ai le vai i luma o le malumalu o le Ekalesia Mamona, ma o ni isi nei o galuega ua tele tausaga o tu’uina atu i ai talosaga, a o lea ua lata i le taimi e tino mai ai lona fa’atinoina”, o le saunoaga fa’afetai lea a Vui.

 

I le alo atu ai o le Fono Faitulafono mo lana malologa e 2 vaiaso, ua talosagaina ai e ta’ita’i o maota e lua afioga i senatoa ma faipule ina ia fa’aauau pea galuega mo le mata’ituina o atina’e i totonu o le malo ma afioaga eseese, ina ia aua nei avea le malolo o le Fono ma auala e taofia ai le fa’atinoina o le fatuaiga tausi a afioga i Senatoa ma Faipule na mafua ai ona filifilia i latou e fai ma sui o itumalo ta’itasi.