Ads by Google Ads by Google

Fa’afetai aloaia tagata gasegase i le LBJ i ta’ita’i o le malo

ausage@samoanews.com

O laufofoga o le fiafia ma le fa’agae’etia o le loto na lofia ai fofoga o le to’atele o tagata matutua fa’apea ai fanau sa taofia i le maota o sulufaiga a le atunu’u i Faga’alu i le aso Lulu na te’a nei, ina ua fa’ateia i latou i le asiasiga faapitoa a ta’ita’i o le malo a ofo atu ai meaalofa e fa’afeiloa’i ai le kerisimasi ma le tausaga fou o lenei tausaga.

 

Ao ulufale atu ai le afioga i le Lutena Kovana ia Lemanu Peleti Mauga, fa’apea ai le faletua o le ali’i kovana ia Cynthia Moliga i le tufatufaina atu lea o meaalofa i potu ta’itasi uma sa taofia ai le mamalu o le atunu’u na a’afia i gasegase o le tino i lenei vaiaso, sa fa’alogoina e le Samoa News si’u leo o le fa’afetai ma le fiafia mai le mamalu o le atunu’u, ina ua maua le avanoa e asiasi atu ai ta’ita’i o le atunu’u i o latou moega.

 

Na taua e se tasi o Tama matua e 72 tausaga o lona soifua ia Lemanu lona fiafia tele ina ua mafai e ta’ita’i o le malo ona asia tagata mama’i i luga o latou moega.

 

“E le faigofie la outou galuega ua fa’atinoina nei”, o le saunoaga lea a lea Tama i le lutena kovana ao la luluaao. “O ai matou o tagata mama’i ua fa’aeleelea ai lau afioga i le ta’ita’i o le atunu’u ma le faletua o le kovana, ou te talitonu o lo oulua alofa fa’amaoni i le atunu’u aemaise ai o le lua naunau e fa’ataunu’u folafolaga a le Fa’aola ina ia alolofa i tagata fa’atauva’a ma mama’i e pei o a’u nei, o le mafua’aga lena ua fa’aeleelea ai oulua”.

 

Ina ua tuua e Lemanu tafatafa o le moega o loo fa’ataotolia ai lenei Tama matua, sa ia faliu mai i le Samoa News ma fa’apea mai ai, “Ia momoli i le akugu’u lo’u agaga fa’afekai i le Kovana ma le malo, oga o meaalofa ua ofo fua mai mo i makou kagaka mama’i”, ae ina ua fesili atu i ai le Samoa News poo le a sona lagona ina ua la lulu aao ma le lutena kovana i luga o lona moega, na maligi loimata o le Tama ma saunoa e fa’apea, “E lagona le fiafia toe fa’ateia fo’i ina ua asia i matou nei e ta’ita’i o le malo, atonu e le faigofie i se ta’ita’i o se atunu’u ona ia asia ni nofoaga fa’apenei ma tagata le taualoa e i ai a’u nei le Tama matua, o le mafua’aga lena o le fiafia o le loto ina ua maua le feiloaiga ma le lutena kovana, o le meaalofa sili fo’i lea mo a’u i lenei kerisimasi, ua ma feiloa’i ma lulu aao ma le lutena kovana faapea ai le faletua o le ali’i kovana”.

 

E su’ifefiloi lava lagona o tagata gasegase i taimi e asia ai i latou e le afioga i le lutena kovana, o ni isi o i latou e feiloa’i ma loimata ae o isi o i latou e fa’afeiloa’i mai lava i le ata, e uma lava le asiga e na o taliega gaioiga o loo faia.

 

“Aisea ua e ma’i ai ali’i”, o le fesili lea a Lemanu i se tasi o Tama matua pe tusa ma le 60 tausaga, ae na tali le Tama matua lea, “Ua ou ma’i iga ua le maua so’u ko’alua”. Na toe fesili Lemanu i le Tama matua, “E te mana’o la ou te alu e su’e mai ni ta ta’ito’alua”, ae na toe tali le Tama matua, “Alu e su’e mai ao lea o le a ou fa’akali aku, aua e ke koe fo’i mai seiloga lava e maua gi ka ka’iko’alua”.

 

Ae o le isi Tama matua e 68 tausaga o lona soifua sa asia e le afioga a Lemanu, na fa’ateia ai le lutena kovana ina ua fa’afeiloa’i atu ae fa’afuase’i ona saunoa mai le Tama matua, “E ke silafia lau afioga i le lukega kovana, ou ke iloa lelei lava ou kuaa, ua leva oga makou ola mai ma ou kuaa i aso la, ao kaimi ga o loo e laikiki lava, lea la ua e makua ma avea oe ma lukega kovaga, o la’u kakalo i le Ali’i, ia foa’i le poko ma magaku aoga e ka’ika’i ai le malo. Ga mafua oga e gofo i le gofoa lega, o le filifiliga a le akuguu ga fa’avae i le finagalo o le Ali’i, ia maguia oulua ma le afioga i le ali’i Kovana”.

 

O ni isi ia o ituaiga o talanoaga sa mafai ona fetufaa’i ai le afioga a Lemanu ma ni isi o Tama ma Tina matutua na maua le avanoa e asia ai i latou i luga o tofaga i le maota gasegase i Faga’alu i le vaiaso nei.

 

Na taua e le Tina matua ia Akenese Lilomaiava, 63 tausaga le matua mai Lauli’i e fa’apea, e leai se lagona pito sili ona fiafia ai lona loto ina ua maua le avanoa e feiloa’i ai ma ta’ita’i o le atunu’u.

 

“E lagona lo’u fa’atauva’a ma lo’u fiafia ina ua mafai ona feiloa’i ma le faletua o le ali’i kovana a o le i oo i le fa’aiuga o le tausaga, e ui e taua meaalofa ua ofo fua ina mai, ae o le mea’alofa sili ona taua, o le ofo atu o le alofa i se tasi tagata ma fa’ailoa atu i ai lagona moni o le Ali’i”. o le saunoaga lea a le Tina matua ia Lilomaiava.

 

Ae na taua e le Tina o Nancy Filimaua, 42 tausaga mai Aua e fa’apea, sa fa’amanuiaina fo’i o ia i le asiasiga a le faletua o le kovana i le tausaga e 2014, ao taofia o ia i le potu failele ina ua tu’u eseese i laua e le Atua ma lana pepe fou lea ua atoa nei le 2 tausaga i le masina lenei.

 

“O le taimi muamua lava na ou fa’atalofa atu ai i le faletua o le kovana i le 2014, sa maligi o’u loimata ina ua ou lagona le fa’atauva’a, poo ai lava a’u nei ua afio mai ai le Tina o le atunu’u, ae o lea fo’i ua toe maua lenei avanoa ma te toe feiloa’i ai ma le Tina o le atunu’u, ua lagona ai fo’i le fiafia ma le loto tele e finau i tiga o le tino, ma ia lata mai se aso e toe fo’i atu ai i tua i le aiga”, o lagona ia o le Tina ia Filimaua e tusa ai o le la feiloaiga ma le tina o le atunu’u i lenei vaiaso.

 

Tau ina ia maua e i latou uma o loo fa’ataotolia i le maota gasegase le fiafia o le Ali’i ao tatou i ai i vaitau fiafia ma le fa’aiuga o lenei tausaga.