Na fa’aaoga e le ali’i kovana ia Lolo Matalasi Moliga le avanoa na ia maua i le fonotaga mulimuli a lana Kapeneta i le vaiaso na te’a nei, e fa’aleo ai le agaga fa’afetai i Vaega Tumaoti uma a le malo e tusa ai o le latou tautua i le atunu’u i le 4 tausaga ua mavae atu, fa’atasi ai fo’i ma le tautua a le au Fa’asalalau i le atunu’u.

“Fa’afetai mo le tautua sa outou ofoina mai e ala i le tautuaina o le atunu’u i lenei 4 tausaga ua mae’a, e ui i le tau fa’asoasoa o le tamaoaiga o le malo, ae o lo o molimauina pea lo outou galulue fa’amaoni e ala i le tautuaina o tagata o Tutuila ma Manu’a”, o le saunoaga lea a le ali’i Kovana.

“E fa’apitoa foi lenei avanoa e fa’afetai atu ai i le au fa’asalalau ma le aufai nusipepa, e pei lava ona ma taumatau atu ma le afioga i le Lutena Kovana, ia maua pea la tatou sootaga ma le au faasalalau ina ia fa’ailoa gaioiga ma mea moni o loo tutupu, ae ui lava fo’i i  le ese o tala o loo fai atu ese fo’i tala o loo lolomi e le aufai nusipepa, ona o le taumafai lava e fai tala e taulia ai a latou nusipepa, ae o le itu taua o loo fa’aauau pea la tatou vaega o le galulue fa’atasi”, o le saunoaga lea a Lolo na tali e ai se vaega o lana kapeneta.

Na taua e le Peresetene o le Faletupe o Atina’e a le malo ia Ruth Matagi-Fa’atili le fa’aauau pea o le tautua a le aufaigaluega mo le atunu’u, e ala i le ofoina atu lea o nonogatupe e fesoasoani ai i le atina’eina o aiga.

Na taua e le tama’ita’i peresetene le tele o lu’itau sa fetaia’i ma le Faletupe i taimi ua mavae, peita’i o le taimi nei, ua faigofie gaioiga uma ina ua maua ni isi o alagatupe e fa’atupe ai nonogatupe mo atina’e i le atunu’u.

“O loo maua pea avanoa mo talosaga i nonogatupe e fesoasoani ai i le atina’eina o aiga, e ala i le matou galulue fa’atasi ma le Matagaluega o Fefa’atauaiga ma Alamanuia, e talosaga atu ai i le atunu’u ina ia aga’i mai i le Ofisa mo ni isi o fa’amatalaga e mana’omia”, o le saunoaga lea a Matagi-Fa’atili.

Mo le falema’i o le LBJ i Faga’alu, na taua e le Pulesili ia Taufete’e John Faumuina le aga’i pea i luma o taumafaiga ina ia fa’aleleia ma siitia le tautua a le falema’i i le itu tau tupe, ina ia maua mai pea vailaau mo togafitiga o le atunu’u.

Sa ia taua le fa’aauau pea lea o le galulue fa’atasi a lona Ofisa ma le Ofisa o le Medicaid e ala i fesoasoani tau tue, ina ia fa’afaigofie ai ni isi o tautua o loo moomia a le falema’i.

Na pau le fa’afitauli o loo fetaia’i ma le LBJ i le taimi nei e pei ona fa’ailoa e Taufete’e, o le faigata lea ona maua o se latou fesootaiga ma le Ofisa autu o le Vaega e Pulea Falema’i i le malo tele (CMS) i le aai i San Francisco, mo se fa’atanaga e mafai ai ona tatala le isi potu fa’amama toto lea ua mae’a ona fausia i le falema’i i Faga’alu.

Saunoa Taufete’e e fa’apea, afai e uma le vaiaso lenei e tumau pea le fiu e fesootai i le Ofisa a le CMS i San Francisco ae tumau pea le leai o se latou tali mai, o le a latou talosagaina loa se fesoasoani a le Ofisa o le ali’i kovana, mo se fesootaiga ma isi sui o le malo tele ina ia fa’a faigofie ai ona maua se tali mo le latou manaoga.

“O loo tele le manaoga mo le potu fa’amama toto i le taimi nei, ua to’atele naua gasegase ae le o lava le potu o loo i ai e fa’atino ai lea auaunaga, pau lena o le fa’afitauli o loo fetaia’i ma le LBJ i le taimi nei, ae o isi tulaga uma o le matou tautua o loo sologa lelei pea lava ma aga’i i luma”, o le saunoaga lea a Taufete’e.

Mo le Kolisi Tuufaatasi a le malo, le ASCC, ua fa’aalia e le latou peresetene fou ia Dr. Rosevonne Makaiwi Pato i luma o le Kapeneta se taumafaiga ina ia si’itia le aofa’i o fanau aoga e ulufale i le kolisi, ina ia mafai ai ona maua se isi fa’aopoopoga i tupe maua a le aoga e fa’atino ai lana tautua mo fanau aoga a le atunu’u.

Mo le Vaega Tosova’a a le atunu’u, le Shipyard i Satala, ua fa’aalia e le latou Pulesili ia Moefa’auo Bill Emmsley le mana’omia lea o se vaega tupe e fa’afou ai le vaega o loo toso ai i luga va’a mo le lipeaina, ona ua mae’a ona faia i ai se su’esu’ega ma iloa ai le tatau lea ona toe fa’aleleia lea vaega.

E ese mai i le manaoga e pei ona saunoa i ai Moefa’auo, sa ia taua le fa’aauau pea lea o feutanaiga ma le kamupani i’a a le StarKist Samoa, mo se avanoa e mafai ai ona latou fa’atautaia le isi pito o le Vaega Tosova’a mo le fa’atinoina o a latou galuga.