Ads by Google Ads by Google

Fa’aauau pea tautua Ofisa o le TAOA mo tagata matutua


Le Faatonusili o le Ofisa o Tagata Matutua, tofa Ale Tifimalae i totonu o le maketi o lo o fa’atau ai galuega taulima a tagata matutua, lea na tatalaina i le taeao ananafi. [ata AF]
ausage@samoanews.com

O le taeao ananafi na fa’alauiloa ai se tasi o vaega tele o le tautua a le Ofisa o Tagata Matutua mo Tama ma Tina matutua i le atunu’u, e ala i le tatala aloaiaina o le latou Maketi o Galuega Taulima, atoa ai ma le fa’alauiloaina o tagata faigaluega fou ua mafai ona talia i totonu o le Ofisa a le TAOA i lenei taimi o le tausaga.

 

Na taua e le afioga i le Fa’atonusili o le Ofisa o le TAOA, tofa Ale Tifimalae i lana saunoaga e fa’apea, o le taua o le polokalame o lenei vaiaso, e le gata o le tatalaina lea o le Maketi mo Galuega Taulima a Tama ma Tina matutua, ae o se avanoa fo’i lea e talia aloaia ai Tama ma Tina matutua fou e to’a 27 lea ua talia i lalo o polokalame o lo o faatupe mai e le malo feterale, e mafai ai ona maua galuega e galulue ai tagata matutua.

 

“O Tama ma Tina fou e to’a 27 lea ua maua le avanoa e galulue ai mo le Ofisa o le TAOA, ua mafai ona maua a latou galuega ina ua malolo le isi to’a 27 sa galulue i avanoa faigaluega nei, ina ua atoa le fa tausaga sa galulue ai i latou i lalo o le polokalame”, o le saunoaga lea a Ale i luma o tagata matutua i le taeao ananafi.

 

Sa fa’afetaia e le ali’i Fa’atonusili le tautua a le to’atele o tagata matutua o lo o galulue i le Ofisa o le TAOA, ona o galuega lelei o lo o latou fa’atinoina mo le atunu’u i soo se taimi.

 

“O la outou tautua ua molimauina e le to’atele le taua, e le gata ua aoga mo fanau aoga ae faapena fo’i i le atunu’u atoa”, o le saunoaga lea Ale.

 

Na maua le avanoa e fa’afeiloaia ai sui fou e to’a ua talia e galulue mo le TAOA, ma ua fuafua o le to’atele o i latou o le a tufatufa atu i nofoaga eseese o le a galulue ai, aemaise lava i nofoaga o lo o i ai aoga eseese i le atunu’u.

 

“O i latou fou e to’a 27 ua fa’aopoopo mai i le galuega, o le a tufatufaina atu i latou i aoga eseese i le atunu’u e galulue ai ma isi tagata matutua ua leva ona i ai, ae o isi o le a saili Toomaga eseese e galulue ai”, o le saunoaga lea a sui sinia o le Ofisa o le TAOA i le Samoa News.

 

Ina ua fesiligia e le Samoa News ni isi o le vaega fou ua maua le avanoa e galulue ai i le TAOA, sa latou taua le agaga fa’afetai ina ua maua nei avanoa e maua ai galuega, ma maua ai tupe e fesoasoani ai i le atina’eina o aiga.

 

“Ua leva ona ou fa’atalitali mai i tua i se taimi e maua ai so’u avanoa, lea la ua maua, o se fiafiaga lena ia e a’u, o le a maua se galuega e maua ai se isi alagatupe fa’aopoopo e fesoasoani ai i le tausiga o le aiga, ou te ta’utino atu, o le a ou le fa’atamala i le fa’atino o la’u vaega e tofia ai a’u”, o le saunoaga lea a le susuga ia Mikaele Viliamu.

 

Ae na taua e se tasi o Tina matua e fou i le polokalame e fa’apea, e lagona lona agaga fa’afetai i le faigamalo ona o avanoa ua mafai ona ofo atu e maua ai galuega mo i latou tagata matutua.

 

“O le taua o le avanoa lea ua ou mauaina ou te galue ai mo le Ofisa o le TAOA, o le a maua ai fo’i ma le avanoa e fa’alautele ai lo’u tomai i le lalagaina lea o ni isi o galuega taulima a le atunu’u, e le gata e fesoasoani ai i fanau aoga, ae maua ai fo’i le avanoa e fa’atau atu ia galuega taulima pe a mae’a ona gaosi ma maua ai tupe e fesoasoani ai i le Ofisa o le TAOA”, o le saunoaga lea a se tasi o tina fou ua talia o ia i le polokalame.

 

Na taua e Ale i le Samoa News e fa’apea, e silia i le to’a 200 Tama ma Tina o lo o i ai i le lisi fa’atalitali, ma o lo o tapua’i mai i tua i aiga i maota ma laoa, po o afea e maua ai so latou avanoa e galulue ai i le TAOA.

 

“O le fautuaga mo i latou uma ua maua avanoa e galulue ai i le TAOA, ia fa’aaoga lelei le avanoa ua maua ma ia fa’amaoni i le galuega”, o le saunoaga lea a Ale.

 

O le vaega e lua o le sauniga, o le tatala aloaiaina lea o le Maketi o lo o faalauiloa ai galuega taulima a tagata matutua.

 

O le Tina matua ia Hannah Thompson, 90 tausaga le matua o lona soifua na ootiina le lipine e tatala aloaia ai le maketi o galuega taulima, ma tatala ai loa le avanoa mo maimoaga.

 

Na molimauina e le Samoa News le fa’atumulia o totonu o le maketi i galuega taulimaga eseese sa galulue i ai Tama ma Tina matutua, o ni isi o i latou ua mae’a a latou taimi i le galuega, ae manatua pea i latou i a latou galuega taulima sa fa’atinoina.

 

O ni isi o galuega taulima o lo o i ai e aofia ai galuega o lo o vane i ogalaau, o galuega e lalaga i laufala e pei o taulima, pulou, ili ma ato, atoa ai ma le anoanoa’i o isi ituaiga galuega taulima e lasi i lau maimoa.