Fa’aauau pea taumafaiga aumai fa’anana fualaau fa’asaina i le atunu’u


[ata: archive]
ausage@samoanews.com

O le taofia ai e Leoleo ma tu’uaia e le malo o se tagata faigaluega a le Falemeli a le malo tele i Amerika, i le moliaga o le umia fa’asolitulafono o vaega o le pauta fa’asaina o le aisa, e mafua mai i se fa’alavelave na tula’i mai i le lua vaiaso na te’a nei, ua atagia mai ai le fa’aauau pea o le fa’afitauli lea o loo tula’i mai pea, o le taumafai lea o ni isi o le atunu’u e aumai fa’anana vaega o fualaau fa’asaina i totonu o le teritori.

 

O le vaiaso na te’a nei na molia ai e le malo le tama’ita’i o Chevonne Lafaele i le moliaga mamafa, o le taumafai lea e umia fa’asolitulafono vaega o le pauta fa’asaina o le aisa, o se solitulafono e mafai ona fa’asala ai se tasi i le toese i Tafuna mo le umi e le itiiti ifo i le 5 tausaga, pe fa’asala fo’i i le salatupe e le itiiti ifo i le $5,000.

 

E pei ona taua i fa’amaumauga a le fa’amasinoga e fa’apea, o suega masani a le Ofisa o Tiute e fa’atinoina i soo se taimi e taunu’u mai ai uta o meli mai fafo, na masalomia ai e ta’ifau o le vaega a le K-9 le i ai o fualaau fa’asaina i totonu o le afifi lea na fa’atuatusi mai i le igoa o Lafaele.

 

Ae ina ua toe faia le isi suega masani a le Ofisa o Tiute i uta o meli o loo i totonu o le vaega e teu i ai meli mai fafo, na maitauina ai le afifi lea sa masalomia o loo i ai fualaau fa’asaina ua aveese mai le vaega sa i ai, ma fa’afeso’ota’i ai loa le Pule o le Falemeli e tusa ai o lea fa’afitauli.

 

Na taua i fa’amaumauga a le fa’amasinoga le fa’atonu e le Pule o le Falemeli o Lafaele ina ia ave muamua le afifi e siaki e Ofisa o le Tiute ao lei alu ma ia i le fale, ae ina ua siaki e sui o le Ofisa o Tiute le afifi sa masalomia, na maua i ai ni pepa iila se 4 o loo afifi i totonu o se vaega e teu i ai sipika.

 

O suega sa faia i afifi sa maua ma iloa ai, o isi afifi e 2 sa mafai ona sue ma maua i ai le vailaau o loo i totonu o le pauta o le aisa, ae o le isi afifi sa sue ma maua i ai le vailaau o loo i totonu o le laau fa’asaina o le mariuana.

 

O loo taua i fa’amaumauga a le fa’amasinoga le fa’ailoa e Lafaele i ali’i Ofisa e fa’apea, na te lei iloaina meatotino sa i totonu o le afifi na fa’atuatusi mai i lona igoa, ae o le afifi fo’i sa aumai lea i sana uo sa la masani i luga o fesootaiga tau initaneti e igoa ia Lisa Lafaele.

 

O le vaiaso na te’a nei na tula’i ai Lafaele i luma o le fa’amasinoga fa’aitumalo mo le ulua’i taimi, ma ua toe tolopo ai lana mataupu e toe fofogaina lea i le fa’aiuga o le vaiaso nei. E $5,000 le vaega tupe lea ua fa’atulaga e le fa’amasinoga e totogi e tatala ai le ua molia i tua, e fa’atalitali ai taualumaga o lana mataupu lea ua fa’agasolo i luma o le fa’amasinoga.

Comment Here