Ads by Google Ads by Google

Fa’aauau pea suesuega mataupu tu’uaia ai tafana ta’avale Leoleo


[ata: foa'i]
ausage@samoanews.com

O le aso 6 Aperila 2018 lea ua fa’atulaga e toe valaau ai le mataupu a le ali’i o lo o tu’uaia i le fa’alavelave, lea na tafana ai se ta’avale a Leoleo i le masina o Tesema na te’a nei i le vaega o lo o i ai le malae Baseball a Tonu Solaita i Tafuna.

 

O lea fa’aiuga mai le Fa’amasinoga Maualuga, na faia ina ua talia e le Fa’amasino Sili le talosaga a le loia a le malo ia Woodrow Pengelly, mo se avanoa e toe tolopo ai le mataupu a Thomas Siaumau mo se isi 30 aso, ona e le i mae’a su’esu’ega a Leoleo o lo o fa’agasolo i lenei mataupu.

 

Na fa’ailoa e le loia a Siaumau ia William R. Olson mai le Ofisa Loia a le RDA Law Firm i le fa’amasinoga, lona fa’atali pea i le taimi e tuu atu ai e le malo mau fa’amaonia e uiga i lenei mataupu.

 

Ae na faailoa e Pengelly e fa’apea, e to’atele isi molimau o lo o mana’omia le fesiligia e Leoleo, mo le fa’amautuina lava o le tagi a le malo fa’asaga i le ua molia. E le gata fo’i i lea, o lo o i ai le fuafuaga e lafo i fafo i Amerika ni isi o mea molimau o lenei mataupu, ina ia fesoasoani ai i le malo mo le fa’amautuina lea o le latou tagi ua i luma o le Fa’amasinoga.

 

Na talia e le Fa’amasinoga le talosaga a le malo, ma faia ai loa le fa’aiuga e toe tolopo le mataupu a Siaumau seia aulia le masina o Aperila. O lo o taofia pea Siaumau i le toese i Tafuna e aunoa ma se tupe ua fa’atulaga e tatala ai o ia i tua, e fa’atalitali ai taualumaga o lana mataupu.

 

O lo o tu’uaia e le malo o ia i moliaga mamafa e 6, e aofia ai moliga o le fa’ao’olima atoa ai ma le umia o se a’upega. O lo o i ai fo’i moliaga mama e 3 o lo o tu’uaia ai o ia e le malo.

 

O le mataupu e pei ona taofia ai Siaumau i le toese i Tafuna, na afua mai i le fa’alavelave lea na tula’i mai i le po o le aso 14 Tesema na te’a nei, ina ua a’afia se ta’avale a Leoloe i ni pulufana.

 

O lo o tu’uaia e le malo e fa’apea, i se taimi o le po i le aso 14 Tesema e pei ona taua, na talosagaina ai e le Leoleo po a le Ofisa o Fesootaiga a le malo i Tafuna (ASTCA) le ofisa o Leoleo mo se fesoasoani, i le mae’a ai lea ona maitauina e le ali’i Leoleo po o ni mea fa’apapa (cherry bomb) na tauai atu e se tagata i totonu o le lotoa.

 

E le i umi ae taunu’u se ta’avale pikiapu a Leoleo o lo o malaga atu ai ni ali’i Leoleo se to’alua, ma amata loa ona ta’amilo i le lotoa a le ASTCA. A o ta’amilo Leoleo e siaki autafa o le lotoa a le ASTCA, sa la maitauina ai o lo o matala le pa o le Tony Solaita Baseball Field.

 

Na taua e le Komesina o Leoleo, tofa Le’i Sonny Thompson i se fa’atalatalanoaga ma le Samoa News ina ua fa’atoa tula’i mai lenei mataupu, a o aga’i atu Leoleo i le faitoto’a o le pa o lo o matala, sa maitauina ai e le isi Leoleo se moli e foliga tutusa ma le moli i luma o a’upega poo fana, o lo o ta’i mai i le isi tulimanu o le pa.

 

Pe tusa o ni nai sekone talu ona vaaia e Leoleo le moli ae fa’alogoina loa ua tafana mai e se tagata poo ni tagata fo’i le ta’avale a Leoleo.

 

E 2 pulu fana na fa’amaonia mai e le Komesina o Leoleo i le Samoa News na a’afia ai le ta’avale, ma o se tasi o pulu na mafai ona maua i totonu o le ta’avale, ma ua avea nei ma mea molimau a le malo i lenei mataupu.

 

O le isi pulu fana na fa’aleagaina ai le vaega fa’alagolago ai le ulu i le nofoa o le ave ta’avale, ae o le isi pulu fana na fa’aleagaina ai le pito o le faitoto’a i le itu o le pasese.