Talu ai o lo o fa’atali pea le Ofisa o Fa’atoaga a Amerika Samoa i se ripoti mai le Ofisa o Fa’atoaga a Samoa, i le fa’aiuga o le latou suega ua auina atu i Siamani e fa’amaonia ai le ituaiga fa’ama’i (virus) lea ua masalomia le a’afia ai o le taro i se vaega o Upolu, ua mafua ai loa ona faia le fa’aiuga ina ia fa’aauau pea le taofia le tumau o le toe auina mai o le taro mai Samoa i totonu o le teritori mo le taimi nei.

O lea tulaga sa mafai lea ona fa’amaonia e le Fa’atonusili o le Ofisa o Fa’atoaga a le atunu’u ia Rev. Filifa’atali Michael Fuiava, i se iloiloga sa faia i luma o le Komiti a le Ofisa o Fa’atoaga a le maota o sui i le taeao ananafi, lea sa la molimau ai ma se sui mai le Vaega o le Land Grant a le Kolisi Tu’ufa’atasi, susuga Mark Schmaedick.

Talu ai o le to’atele o le aufai fa’atoaga aemaise ai tagata faipisinisi o loo tu’u fesili i le mafua’aga o le taofia le tumau o le taro mai Samoa, na valaauina ai loa le iloiloga a le maota o sui i le taeao ananafi e fa’amanino ai lea mataupu, lea sa taitaia e le Taitai Komiti, le afioga i le ali’i Faipule ia Su’a Alexander Eli Jennings.

Na fa’amanino atili e le Fa’atonu e fa’apea, e ui e le o mafai ona fa’amaonia e le Ofisa o Fa’atoaga a Samoa le ituaiga fa’ama’i ua masalomia le a’afia ai o le latou taro, ae sa faia lava lana faaiuga fa’a ta’ita’i ina ia taofia loa le toe auina mai o le taro mai Samoa mo se taimi le tumau, ona o le puipuiga lava i le malupuipuia o fa’atoaga i le atunu’u.

Ona o le mataupu e pei ona fa’amalamalama e le ali’i Fa’atonu, na mafua ai loa ona fesiligia e ni isi o afoga i Faipule se gaioiga a le Ofisa o Fa’atoaga ua faia ina ia mautinoa ai e le o a’afia ai ma fa’atoaga taro i Amerika Samoa.

Na taua e le ali’i Fa’atonu le faia o asiasiga a le Ofisa o Fa’atoaga i fa’atoaga uma a le atunu’u o lo o toto ai le taro, mo le faia i ai o suesuega ina ia mautinoa e le o a’afia fa’atoaga a le atunu’u i lenei fa’ama’i.

Na fesili le afioga i le ali’i faipule ia Gafatasi Afalava pe ua mautinoa e le o aafia le taro a Amerika Samoa i lenei fa’ama’i, ae na saunoa le Fa’atonu, “ua mae’a ona faia suesuega e le o i ai ni fa’ailoilo o ni a’afiaga o fa’atoaga taro i Amerika Samoa”.

“E to’atele le aufai fa’atoaga mai Samoa sa talosaga mai mo se avanoa e tatala ai pea le auina mai o le taro, na oo lava i le latou Minisita o Fa’atoaga sa tusi mai ia te a’u ma talosaga mai ina ia toe iloilo le fa’aiuga ua ou faia, ae sa ou fa’ailoa i ai, o lo’u tiute o le puipuia lea o le saogalemu o fa’atoaga a le atunu’u ina ne’i a’afia i ni fa’ama’i mata’utia, sa ou fa’ailoa fo’i i ai e fa’aoo mai faamatalaga e faamaonia ai le ituaiga fa’ama’i lea ua masalomia le a’afia ai o le taro i Samoa, peita’i e oo mai lava i le taimi nei e le i tu’uina mai lava ia fa’amaumauga”, o le saunoaga lea a Filifa’atali.

Saunoa atili Filifa’atali e faapea, o le taimi lava e tauaaoina ai e lona Ofisa se ripoti mai Samoa e tusa ai o le suega ua auina atu i Siamani, ona fuafua ai loa lea o se malaga i Samoa e vaavaai i le tulaga tonu o lo o ia i lea fa’ama’i.

Na talosagaina fo’i e Filifa’atali le Au Fa’asalalau ina ia fa’ailoa i le aufai fa’atoaga a le atunu’u, afai e i ai se tasi ua ia masalomia se tulaga tau a’afia i lana fa’atoaga taro, ia faafesootai atu le Ofisa o Fa’atoaga mo se asiasiga.