Ads by Google Ads by Google

Fa’aaoga totoga o ta’avale a le malo e fai ai ta’avale tua


[ata: sweetclipart.com]
ausage@samoanews.com

O se tasi o tulaga le manuia o lo o fa’aauau pea ona faia e ni isi o tagata faigaluega a le malo, o le tatala ese mai lea o totoga o ta’avale a le malo ae fa’aaoga e fai ai a latou ta’avale, e pei ona taua e le afioga i le ali’i kovana i luma o le Kapeneta i le vaiaso na te’a nei.

 

Na fa’aigoa e le tofa i le tootoo ia Lolo Matalasi Moliga lea ituaiga amioga, “o mea sa masani mai ai lava le atunu’u a o laiti”, lea lava ua o o mai i aso nei o lo o fa’aauau pea ona faia, ma ua tatau ona taofia lea faiga le manuia.

 

Mo se fa’ata’ita’iga o lana saunoaga, sa ia fa’amatala ai se tasi o ona uncle sa faigaluega i le malo i aso ua mavae, e na o lana salama ma le fuatoso e tu’u i totonu o lana ato e alu ma ia i le galuega, ae a manava, ona vaaia lea o lana ato faigaluega ua amo mai ua tumu i mea faigaluega a le malo ua alu ma ia i lona fale.

 

“O le mafua’aga lena o la’u fa’amatalaga sa fai atu, e le o ni mea fou mea ia o lo o tutupu i lo tatou atunu’u i le taimi nei, o le fa’aaoga e tagata o meatotino a le malo i auala e le sa’o, ae o la tatou galuega o le taumafai e taofi ma fa’asa’o mea sese o lo o fai”, o le saunoaga lea a Lolo.

 

O le mataupu e fa’atatau i meatotino a le malo aemaise lava i ta’avale o lo o tutu solo i Fale Inisinia tua, na aofia i le saunoaga a le ali’i kovana i le taimi na ia taua ai le fai ma ia asia nofoaga o lo o i ai faleaoga ma atina’e a le malo i le taimi e manava ai ana galuega i ni isi o aso.

 

O ana asiasiga ia na te molimauina ai i le tele o Fale Inisinia tua, toeititi leai se Fale Inisinia e le o tutu ai ni ta’avale a le malo pe ta’i 4, 5 poo le sili atu fo’i, ae o ni isi o nei ta’avale na tutu mai ai lava i nei nofoaga talu mai le tausaga e 2010 poo tua atu fo’i.

 

“O le mea mata’utia na ou maitauina i la’u asiasiga lea, o le tele o ta’avale a le malo o loo tutu i ni isi o Fale Inisinia tua, ua tatala ese totoga e pei o le “faga uila” ae ave e fa’aola ai ta’avale a tagata tua, ma ou te iloa e le o se mea fou lea o loo tupu i ta’avale a le malo, o le fa’aaoga lea e fai ai galuega tua”, o le saunoaga lea a le ali’i kovana.

 

Saunoa atili le ali’i kovana e fa’apea, ina ua ia maitauina tulaga fa’aletonu i ta’avale a le malo, sa ia fesiligia ai loa ni isi o tagata faigaluega a Fale Inisinia mo ni isi faamatalaga, ma taua ai e i latou nei e fa’apea, o tagata faigaluega lava a le malo o lo o faia le amio o le la’u atu o ta’avale a Ofisa e fa’atutu i fale Inisinia pe a i ai ni vaega o totoga e fa’aletonu, ae a oo loa i le taimi e fa’aletonu ai ta’avale a tagata faigaluega, ona valaau atu loa lea e tatala ese mai totoga o ta’avale a le malo e fai ai a latou ta’avale.

 

O le vaiaso na te’a nei na malaga mai ai i le atunu’u sui o le Initeria e asia meatotino a le malo e aofia ai ma ta’avale, na fa’atau i vaega tupe fesoasoani o lo o maua mai i le Initeria, ma o se tulaga taua tele le tatau lea i le faigamalo ona silasila toto’a i auala e tausia lelei ai meatotino a le malo.

 

“Tusa lava pe le tele ni ta’avale na fa’atau i le taimi o la tatou nofoaiga, o lo tatou tiute le tatau lea ona fa’amaopoopo ta’avale uma a le malo ina ia mautinoa e umi tausaga o aoga pea e tautua ai le atunu’u”, o le saunoaga lea a le ali’i kovana.

 

Ua i ai ni isi o matagaluega a le malo ua mae’a ona galulue mo le toe fa’aleleia o a latou ta’avale ua tele tausaga o tutu i fale inisinia tua e pei o le Ofisa o Leoleo.

 

Na taua e le Komesina o Leoleo ia Le’i S. Thompson i le Samoa News le i ai o se ali’i Inisinia faapitoa ua fa’a faigaluega e le Matagaluega, e galue i le toe fa’aleleia o ta’avale a le Ofisa o Leoleo ua tele tausaga o fa’aletonu, ma o le tele o nei ta’avale ua vaaia le toe feoa’i i luga o le alatele.

 

Saunoa Le’i e fa’apea, e tele le vaega tupe a le matagaluega o Leoleo ua fa’asao ina ua fa’a faigaluega le Inisinia na te toe fa’aleleia ta’avale, nai lo le tulaga sa i ai, o le ave lea i fale inisinia tua e fa’alelei mai ai ma tele ai tupe a le matagaluega e alu ai.