A o taumafai ai le faigamalo e saili auala e fa’asao ai ana tupe mai le soona fa’aalu i auala e le mana’omia toe leai se aoga i le atunu’u, o le taeao ananafi na tauaao ai e le maota o sui se ripoti e fa’atatau i potu sui le tumau mo afioga i Faipule, lea ua sauni le malo e fa’aalu le silia i le $30,000 e fausia ai.

O le tupe lea ua fa’amoemoe e fa’aalu i le tau o meafaigaluega (material) e fausia ai le galuega, ae le o aofia ai le totogi o le fa’atinoina o le galuega, fa’apea ai le tau mo le fa’apipi’iina atu i le suavai ma le sewer line a le Pulega o le Eletise ma le Suavai (ASPA).

Na tauaao e afioga i Faipule kopi o le ripoti ao lumana’i ai le tatala aloaiaina o le latou fonotaga i le taeao ananafi, ma fa’alogoina ai finagalo fa’asea mai ni isi o faipule i le mafua’aga o le a fausia ai fua nei potu sui le tumau mo faipule, ma fa’aalu ai lenei tupe tele ae o lo o tele manaoga taua ma le aoga e tatau ona fa’amuamua i totonu o le atunu’u, e pei o le fa’aleleia lea o auala o lo o sili ona fa’aletonu.

E ui e leai se Faipule na ia fesiligia lenei mataupu i le taimi o folafolaga a le maota o sui ananafi, ae na atagia i lagona fefa’asoaa’i fa’asamasamanoa i le taimi ao lumana’i le tatalaina o le aofia a le maota, le fesiligia e ni isi o i latou o le tulaga o le a fausia ai fua nei potu sui mo faipule, atoa ai ma le tatau lea ona tuuina atu muamua le mataupu e fesiligia ma fa’atalanoaina i luma o le maota.

I se tusi mai le afioga i le Fa’atonusili o le Matagaluega o le Tamaoaiga ma Alamanuia a le malo (DOC) ia Keniseli Lafaele, lea sa tauaao atu i le Fofoga Fetalai o le maota o sui ia Savali Talavou Ale ma afioga i Faipule, o lo o taua ai le tau atoa e fausia ai potu le tumau e sui ai afioga i Faipule i le aofaiga e $33,814.38.

Na taua e Keniseli i lana tusi ia Savali e fa’apea, “e tusa ai o le tatou talanoaga mo le fausiaina lea o ni potu le tumau e sui ai afioga i Faipule, ao fa’aaoga ai e le maota o sui le fale o loo i le itu i Matau o le Fale Laumei mo a latou galuega mo le isi 2-3 tausaga, ua fa’apipi’i atu ai i tua o lenei tusi le lisi o oloa ma o latou tau mai kamupani eseese i le atunu’u, ua fa’amoemoe e fa’aalu i le fausiaina o le galuega”.

E pei ona taua i le ripoti sa fa’apipi’i fa’atasi atu ma le tusi a Keniseli, e $540 le tau o uta oneone mai le kamupani a Vailu’u & Sons; $400 le tau o uaea (amplimesh wire) mai le K & K Island Star Corporation; $935.52 mo mea faigaluega tau eletise mai le Neil’s ACE Home Center, ma le $31,938.86 o mea faufale mai le kamupani a le Tool Shop.

E le o taua i totonu o le ripoti le igoa o le Konekarate lea ua sauni latou te fausia le galuega, ae pe fia fo’i le tau e fausia ai e le Konekarate le galuega.

Na taua e se tasi o afioga i Faipule le tatau lea ona tu’uina atu mataupu fa’apenei e soalaupule i ai le maota, ina ia manino tulaga uma e fa’aalu i ai tupe a tagata totogi lafoga a le atunu’u.

Saunoa atili lea Faipule e fa’apea, e le fesiligia galuega lelei fa’apenei aemaise o tulaga uma e fa’aaoga e afioga i Faipule, pau le itu e tatau ona fa’amanino, ia silafia e le maota fuafuaga mo galuega fa’apenei, atoa ai ma le fa’amaninoina o i latou e fa’atinoina le galuega, pe fausia e le Ofisa o Galuega a le malo, pe la’a tu’u atu fo’i e fausia e konekarate tua.