Ads by Google Ads by Google

Fa’aaliga - Talitonu i ai pe Leai?


O se va’aiga i le taimi na feiloa’i ai le tama’ita’i o Toaipuapuaga Opapo ma le afioga le Pope a’o aofia fa’atasi o ia ma lona tama, Rev. Opapo ma lona to’alua, lana tama teine fa’apea fo’i nisi o Tama’ita’i Sa o le latou au malaga mai Samoa. [ata: foa’i]

Manatua le tama’ita’i na fa’ailo manu’a i ona foliga ma ona lima i le vaitimi o le Aso Maliu i le tausaga ua tuana’i, ua fa’ailoa mai, ua matua o’o lava o ia i Roma ma ia feiloa’i ma le Pope, ma fa’ailoa mai, ua mae’a valoia e ia mea o le a tutupu i le lalolagi i se taimi lata mai, ma ua finagalo fo’i le Pope ina ia fa’alauiloa mai e i latou i se taimi e le o toe mamao

 

Na malaga fa’atasi le tama’ita’i o Toaipuapuaga Opapo ma lona tama, o se Faifeau o le EFKS i Samoa, fa’atasi ma Toa ma lona to’alua ina ia molioo le tama’ita’i vavalo i Roma mo se la’ua feiloa’iga aloaia ma le Pope atoa ai ma le vasega o ta’ita’i o lea lava Ekalesia, ona o le manatu lava ina ia talitonu i latou i manu’a o lea tama’ita’i.

 

O le masina o Oketopa 2016 na to’ai taunu’u ai Toaipuapuaga ma le aumalaga i Roma, ae fa’ailoa mai, e 44 fe’au taua ua mae’a valoia e ia, e aofia ai ma pagatia o le a fetaiai ma lona tama Rev. Opapo Soana’i, pe a taliu mai i Samoa. O lea fe’au e tu’u sa’o mai i le susuga le ta’ita’ifono o le EFKS i Samoa, Rev. Elder Senara Tautiaga, ma e le mafai ona fa’alauiloa se’i vagana o lana susuga lea.

 

Ua i ai le fa’ailoga ua mae’a fa’ailoa fo’i e Toa i le vasega o taitai o le Ekalesia Katoliko Roma, ma sa fa’aoo lea fa’aaliga i le Pope ma ua fai mai Rev. Opapo, “sa tigaina tele Toa i le taimi na fa’aosofia mai ai lea fa’ailoga ma na va’aia e le to’atele le toto mai o ona foliga ma ona lima, aua e ogaoga fo’i tiga sa ia fa’alogoina.”

 

Ua taoto lea fa’aaliga i ta’ita’i o le Ekalesia Katoliko ina ia mua’i sailia mea ua fa’aalia pe fa’amaonia, ona fa’ato’a fa’alauiloa mai lea. O lea fa’aaliga, sa mana’omia lava ona aofia ai ma le Pope ona fa’ato’a ia fa’aalia lea ia Tesema 18, 2016.

 

Ua fa’ailoa e Opapo i le Talamua, “O nei fa’ailoga uma ua tusia e Toa i le gagna Eperu, ma ua amatalia fo’i suesuega a polofesa i Roma e tusa ai o nei mea uma ua tusia. Peita’i, i lenei tama’ita’i, e le iloa fa’atasi e ia se fa’a-Eperu mai lona soifua mai.”

 

E ese mai suesuega a le Ekalesia  Katoliko i nei mea ua ia tusia, ae ua fa’apena foi ona faia sailiga a foma’i o le mafaufau ma le tino pe mata o afaina le soifua maloloina o Toaipuapuaga. Peita’i, talu mai le amataga o nei mea uma i le aso Maliu 2016, e le o ma’i lava Toa.

 

E ui ina tele faitioga e fa’asaga i lenei tamaita’i ona o lenei mea, ae maumaututu pea fa’ailo ua va’aia e tagata e tusa ai fo’i ona tiga pe a o’o ina afuafua mai se fa’aaliga.

 

O lea ua oo ina tulaueleele o ia i le Vatikana, aua o se tasi o fa’aaliga, e tatau ai ona oo o ia i lea a’ai tele a le Ekalesia Katoliko mo fa’aaliga taua i ta’ita’i o le Ekalesia, ae maise le Pope. Ua liu lotu fo’i Toa ma ua fa’aipoipo ai i lona to’alua, lea ua latou malaga uma i Roma.

 

Ua fa’ailoa mai, ua toe fa’aopoopo le isi ono masina o le nonofo ai o Toa ma lona aiga i Roma, ae taliu mai lona tama, ina ia sailiilia uma nei valoaga ua ia fa’aalia e ta’ita’i ma polofesa o le Gagana Eperu i Roma.