Ua manino i fa’amaumauga na mafai ona fetufaa’i e foma’i ma i latou o lo o galulue i le tausia o le soifua maloloina i totonu o Samoa ma Amerika Samoa i le vaiaso na te’a nei, e anoanoa’i auala eseese o lo o mafua ai ona a’afia le soifua maloloina o tagata lautele i totonu o le atu Samoa, e le gata i le itu o le soifua maloloina, ae fa’apena fo’i ma le saogalemu o fanau i totonu o aiga.

I le tulaga o le soifua maloloina o tagata, na atagia i fa’amaumauga na mafai ona fetufaa’i i le fonotaga lona 7 i le va o Samoa e lua na fa’ai’uina i le vaiaso na te’a nei, o le taumafa i meaai le paleni le pogai autu o le a’afia o le soifua maloloina o tagata i fa’ama’i eseese, ae i le tulaga i le a’afia o le saogalemu o fanau laiti ma a’afia i faiga le manuia, e mafua mai i le ola tu’inanau o tagata matutua i le fa’atinoina lea o gaioiga e naunau i ai, ma tula’i mai ai loa tulaga o le fa’atamala i le vaaia atoa ai ma le tausia lelei o fanau.

Na taua e le afioga i le Minisita Lagolago o le Soifua Maloloina a Samoa, afioga Salausa Dr. John Ah Ching, o se tasi o tulaga ua maituaina i totonu o aiga i le taimi nei o lo o mafua ai ona a’afia le saogalemu o fanau, o le tu’inanau lea o matua e fa’atino gaioiga e fiafia i ai e pei o ta’aloga Bingo, Poka ma isi fiafiaga, ae galo ai fanau laiti o lo o tia’i i le fale.

O ni isi fo’i o taimi ua ave le fa’amuamua a matua i galuega ma fa’agaioiga a aulotu, nu’u ma fa’alapotopotoga, ae laititi ai le taimi e fa’aalu mo fanau talavou.

Mo se fa’ata’ita’iga e pei ona saunoa Salausa i le fonotaga, e le o utuva le alia’e mai pea o fa’afitauli o lo o a’afia ai le soifua maloloina o fanau, i le tua’i lea e matua o fanau tama’ita’i laiti i le fale i le po, ae malaga i ta’aloga Bingo po o galuega fo’i, o isi fo’i taimi, ua o matua ma ave fanau tama’ita’i laiti i nofoaga o lo o faia ai ta’aloga Bingo, ona tia’i lea o i latou i fafo ona e fa’asa tamaiti i totonu, ma maua ai le avanoa o tagata amio le taupulea e tafili saunoa ai i fanau ma a’afia ai lo latou saogalemu.

“Afai e fesili le atunu’u po o le a se auala e tatau i matua ma tagata lautele ona fa’atinoina ina ia foia ai lenei fa’afitauli, o la’u tali, ave le fa’amuamua i le soifua manuia o fanau laiti, ae fa’aitiitia le ave o le fa’amuamua i isi fiafiaga ma gaioiga o lo o tu’inanau ma fiafia i ai matua”, o le saunoaga lea a Salausa.

Sa ia taua atili fo’i le fa’atupulaia pea lea i totonu o Samoa e lua o mataupu eseese nei e fa’atatau i fanau laiti o lo o a’afia i faiga fa’asolitulafono.

“Ou te iloa e laina tutusa Amerika Samoa ma Samoa i le faatupulaia o ituaiga solitulafono mamafa nei ma mataga, e le gata i le faia e tagata amio le taupulea o uiga mataga i fanau laiti, ae ua o o lava fo’i i tagata o aiga e aofia ai uso tama, tuagane o tina poo le Tama moni fo’i o ni isi o fanau laiti, ua a’afia ai lava lo latou saogalemu, ma ua faigata ai ona maua se auala e puipuia ai i latou, ae i lo’u talitonuga, e leai se isi auala e pito sili ona malu puipuia ai le saogalemu o fanau mai le fa’aauau pea lea ona a’afia i faiga le alofa nei, nai lo le ave o le fa’amuamua a matua e puipuia ai fanau”, o le saunoaga lea a Salausa.

Ina ua fesiligia e le Samoa News le se tasi o sui usufono mai Samoa, o lo o galulue i le Ofisa o le Puipuia o fanau mai le a’afia i sauaga ma faiga mataga, na taua ai e le susuga ia Vincent Alai’asa le i ai o se gaioiga ua mafai ona fa’atinoina e le latou Ofisa i Samoa, e fesoasoani ai i tupulaga ua a’afia i faiga le alofa nei.

“E talitonu lenei Ofisa, e leai se isi auala e sili atu ona vave e mafai ai ona fa’ailoa faiga le manuia o loo aafia ai olaga o fanau talavou, nai lo le vave faia o fa’atalatalanoaga i totonu o aiga, ekalesia, nu’u ma aoga, e fa’ailoa ai i fanau le tatau lea ona fa’ailoa mai mea o lo o tutupu i o latou olaga, atonu e fa’a faigofie ai ona latou fa’asoa mai ni isi o gaioiga o lo o faigata ona iloa e matua ma le to’atele, ma mafai ai loa ona fesoasoani atu le Ofisa e saili se auala e foia ai ia fa’afitauli”, o le saunoaga lea a le susuga a Alai’asa.

Mo se fa’ata’ita’iga e pei ona saunoa atili le sui mai Samoa, e i ai fanau tama’ita’i o lo o a’afia i sauaga i totonu o aiga, ae o lo o faigata ona latou fa’ailoaina nei tulaga ona o le popolega i lo latou saogalemu, ae o le avanoa ua tatala atu latou te fa’asoa mai ai i lalo o a latou polokalame fa’asolo, o le a mafai ai loa ona maua se fofo mo lenei fa’afitauli.

E to’alua ni tama’ita’i talavou na taua e Alai’asa na a’afia i sauaga i totonu o aiga i Samoa, ma ua mae’a ona tu’uina atu i le Ofisa o Leoleo ia mataupu mo le fa’aauauina i ai o a latou su’esu’ega.

Ae mo Amerika Samoa, na taua ai e le afioga i le ali’i Fa’atonusili o le Matagaluega o le Soifua Maloloina ia Motusa Tuileama Nua e fa’apea, e ui o lo o tele fa’afitauli fa’apenei o lo o tutupu i vaega eseese o le atunu’u, ae o lo o fa’aauau pea galuega a le Matagaluega e ala i le tu’uina atu lea o auala e puipuia ai fanau mai le a’afia i sauaga.

I le tulaga o gasegase e mafua mai i le fa’aaogaina o meaai le paleni, na taua ai e le sui o le Soifua Maloloina a Samoa ia Otilia Vaelupe le fa’atupulaia o tagata e a’afia i gasegase le pipisi, e mafua mai i le taumafa i meaai le paleni.

“O le fa’afitauli lenei ua tele tausaga o a’afia ai Samoa e lua, e fiafia tele le atunu’u e tausasami ae tau leai se fa’amalosi tino, pe’ita’i o polokalame ua faia e le Soifua Maloloina a Samoa i le taimi nei, ua fautuaina ai le to’atele o tagata ina ia toaga e fa’amalosi tino ina ia mafai ai ona fa’aitiitia le tino puta ae maua ai le malosi ma le soifua maloloina.

O ni isi o fa’amaumauga sa mafai ona fetufaa’i i lenei fonotaga, o auala e tatau ona fa’atinoina e tagata e puipuia ai i latou mai le tino puta, a’afia i gasegase le pipisi e pei o le ma’i fatu, suka ma le toto maualuga, atoa ai ma le mafai lea ona tete’e atu i isi ituaiga fa’ama’i eseese.

“O le fautuaga malosi lava mo tagata Samoa fa’apea ai Amerika Samoa, ia fa’amalolosi e fa’amalosi tino i aso ta’itasi, ma ia taumafai e fa’aaoga taumafa paleni e fesoasoani ai i le tino maloloina”, o le saunoaga lea a Vaelupe.