Elei Samoa: Lona Uiga ma Lona Taua


O se vaaiga i le fanau sa auai i le polokalama ua fiafia e fa’ailoa mai a latou Upeti Samoa ua mae’a taina mai laupapa sa saunia e le Arts Council ina ia aoaoina ai i latou mo lea fo’i tomai fa’apitoa. [ata: Leua Aiono Frost]
ausage@samoanews.com

Mai le 4 vaiaso talu ai, sa fa’atautaia ai le Polokalama a le Arts Council mo le fanau 5 tausaga se’ia o’o i le 16 tausaga le matutua, ua mae’a nei ma ua fiafia fa’atasi i latou ma o latou aiga i le toe aso ona o latou meaalofa matagofie, o a latou gallega sa lalaga, taina ma gaosia i le taimi atoa o lea poloakalama fa’atino ai galuega alofilima fa’asamoa.

 

Na maimoaina e le mamalu o e uma na auaí a latou fa’afiafiaga, o nisi nei o agaifanua sa mautinoa lava le naunauta’i o le Arts Council ina ia mautu i loto ma agaga o le fanau talavou a le atunu’u, ia iloa ona fa’afiafia fa’asamoa.

 

O pese sa taina fo’i i le Ukulele, sa a’oa’o ai i latou uma, sa faia folasaga a nei faia’oga ese’ese, ia fa’ailoa mai, pe a mai se taumafaiga a le fanau ua i ai, ina ua mae’a nei le polokalama sa auai. I le vasega o tina matutua mai le Ofisa o Tagata Matutua . le TAOA na fa’afaia’oga i le lalagaina o galuega taulima fa’asamoa, e aofia ai Ato Fu’e umu, pulou launiu, taulima laufala, pulou laufala, sei, polo ta’alo e fa’aaoga ai launiu mata, mailo e laulau ai mea’ai, pe’ape’a launiu, pale launiu ma pale laufala, atoa ma ula sa su’ia e fa’aaoga ai mea taulima Samoa.

 

Ua aofia I totonu o latou ‘ato o meaalofa, latou ie lavalava elei ma mitiafu ua latou laeia i le aso mo latou toniga siva ma le pese. O nei gallega uma, fa’atasi ai ma ni mitiafu ma ie lavalava e mana’o lava le tamaititi latou e aumai lona aiga e fia elei, ua fai ma latou fa’amanatu taua i le taimi na aoaoina ai i nei faiva alofilima fa’asamoa i lenei taumafanafana.

 

I le saunoaga a le susuga le Fa’atonu o le Arts Council, Paogifie Fiaaoga, sa ia fa’ailoa ai le aoga o le talavou ae ua mae’a iloa nisi o faiva alofilima a Samoa, e le oge lona aiga ma le tamaoaiga tausi, aua ua gafatia ona ia iloa faia nisi matata nei e sapaia ai lona aiga pe a leai se galuega e maua.

 

“O le elei ma le taina o Upeti mo laei Samoa, ua tele ina fa’aaoga e nisi e fa’atupe ai le tausiga o latou aiga i inei fa’apea fo’i Samoa Tuto’atasi. Afai e mafai e na sui ona faia, lea ua e iloa le mea e ao ina e faia, pe afai ae mana’omia e lau autalavou ona faia se toniga elei, lea ua e maua iinei le tomai. Oso i ai, fai e maua ai au tupe mo nai ou matua.”

 

Na ia fa’afetaia i latou uma sa avea ma faia’oga i lenei polokalama, “Aua o le fa’asoa o se tomai o e agava’a ai, o se meaalofa sili lea ona taua mo I latou ua e fa’asoa atu i ai. Ua e iloa fo’i, e ono i ai nisi o le a fa’atauva mai ia te oe ma lau sailiga o le tamaoaiga ona o le nei faiva ua e faia i lenei aso, ae tupu mea avea! Upu a le atunu’u, e tima’ia ai i tatou ina ia fa’asoa le atamai, fa’asoa le taleni na aumaia e le Atua, ina nei fano le atunu’u a taeao i ona tupulaga fai a’e.”

 

O le susuga i le Faife’au EFKAS i Gataivai, Rev. Tini Filisi, sa avea ma sui o le aufaigaluega a le Atua e taita’ia ma fa’ai’uina le polokalama fa’atautaia a le Arts Council e fa’amae’a ai le polokalama a le fanau i lenei taumafanafana.

 

Na fa’alauiloa fo’i suafa o i latou na tautiga mo le a’oina o Pese ma Siva, Ta Ukulele ma taina o fa’atagata ma upeti Samoa, ae maise o le gaosiga o le elei ma le lalagaina o galuega alofilima eseese sa maimoaina.

 

O le a’oina o tala Fa’asamoa na tapena lea e Feagia’i Mauigoa. O le vasega ta ukulele na a’oina lea e Roseta Maiava. O le aoaoina o le lalaga galuega alofilima na tapena lea e: Cinderella Tuaimalo, Leaia Vaimaona, Sauitua Fesuiai, Siniva Va’a, Tualele Mailo ma Meleane Lemapu.

 

O le taina o fa’atagata ma Upeti Samoa sa faia’oga ai le sui ua lauiloa i ana ata tusia ma taina i la’au, o Tile Tuala Tamaalelagi ma Taligalu Sili.  Sauniga o le Siapo Samoa sa fa’atautaia lea aoga e Niuafolau Pua ma le Elei Samoa sa faaaoaoina lea e Fa’amata Ugapo ma Joyce Purcell. O le fa’amatala fagogo sa fofogaina lea e Feagia’i Mauigoa.

 

Fa’afetai fo’i i le aufaigaluega  a le Ofisa o le Arts Council mo le faatautaia o lenei mafutaga ma e faamoemoe e toe maua fo’i se isi polokalama fa’apenei mo le fanau i le tausaga a sau, i le tu’uaga umi o a’oga.

Comment Here