E ono tu’u fa’atasi iloiloga o le paketi a le Fono Faitulafono


Le afioga i le Fofoga Fetalai o le maota o sui, Savali Talavou Ale. [ata AF]
ausage@samoanews.com

Ua fa’aalia e le Fofoga Fetalai a le maota o sui i le taeao ananafi, le tele o le avanoa e ono tu’u fa’atasia ai iloiloga o le paketi a maota e lua.

 

O lea tulaga e pei ona saunoa Savali Talavou Ale, e mafua mai i le tulaga faigata lea ua molimauina i le taimi nei, i le le mafai lea e Fa’atonusili ona auai i iloiloga a maota e lua pe afai e fa’atulaga i le taimi e tasi, e mafua mai i le vava mamao o nofoaga o lo o fa’atautaia ai galuega a maota taitasi.

 

O le aoauli ananafi na fono ai afioga i Ta’ita’i o le Fono Faitulafono, fa’apea ai ta’ita’i o Komiti o le Paketi a maota e lua, mo le talanoaina o le tulaga tonu e tatau ona i ai iloiloga o le paketi a le fono.

 

O le fa’aletonu e pei ona taua e Savali, na molimauina i le taeao ananafi, ina ua tula’i le afioga i le ali’i faipule ia Samuel Meleisea ma fa’alauiloa le toe tolopo o le iloiloga sa fa’atulaga i le itula e 8:30 i le taeoa nei, lea na fuafua e molimau ai le Teutupe a le malo e fa’atatau i le pili a le faigamalo a Lolo ma Lemanu e fa’aee ai le lafoga e 1% i pisinisi.

 

Na tula’i le afioga i le tamaitai faipule ia Vui Florence Saulo ma ia fa’aalia lona lagona fa’anoanoa, ona o lea ua toe tolopo se tasi o iloiloga e pito sili ona taua, e talanoaina ai le lafoga mo pisinisi, ae ua mae’a ona tuu atu lana talosaga i le taitai komiti ina ia fa’ataunu’u le iloiloga i le vaiaso nei.

 

Na avea le tau tula’i mai o se nunumi laititi i tulaga o folafolaga na mafua ai loa ona fesili Savali ia Meleisea pe aisea ua le oo mai ai le Teutupe, ae na tali Meleisea, o lo o auai atu fo’i o ia i le iloiloga a le Senate lea ua fa’atulaga mo le taeao nei.

 

E le i nofo lelei i le finagalo o le fofoga fetalai le tulaga o lo o fa’afoe ai galuega a le maota, aemaise ai fesootaiga i le va o molimau ma ta’ita’i komiti.

 

“A toe i ai ni suiga e tula’i mai fa’apea, logo mai le laulau, ae le o le nofo lava o le taitai komiti ma fai le faaiuga i lana lava pule,” o le saunoaga lea a Savali.

 

“E i ai lava tulafono e fa’afoe ai tulaga o galuega i le va o le maota ma le faigamalo, e le pulea mai e le Fa’atonusili galuega a le maota.”

 

Saunoa Savali e fa’apea, o ituaiga tulaga faaletonu la ia e tatau ai fo’i i le maota ona silasila toto’a i ai, a o taumafai ai e fetuuna’i le kalena mo iloiloga o le paketi. Sa ia taua atili e fa’apea, sa i ai le manatu e fai eseese iloiloga a maota e lua, ae afai o le tulaga lea ua maitauina, seiloga e uma ona molimau le Faatonusili i le senate ona fa’atoa sau lea e molimau i le maota o sui, ona tula’i mai ai loa lea o se tulaga popole.

 

I le talanoaina ai o mataupu e fa’atatau i le paketi, na tula’i ai le afioga i le ali’i faipule mai Manu’a #1 ia Vesi Talalelei Fautanu Jr ma talosaga i le maota, ina ia silasila alofa ane i le taimi e iloilio ai le paketi, mo se vaega tupe e fa’aopoopo i le Matagaluega o le Soifua Maloloina, e fesoasoani ai i le la’uina o nofoa fou mo tagata ua fa’amama toto mo Manu’a lea ua taunu’u, atoa ai ma le fa’atupeina o galuega mo le fa’apipi’iina.

 

I se la fonotaga ma le Faatonusili o le Soifua Maloloina, na taua ai e Vesi le fa’amaonia atu e le ali’i Fa’atonu o le taunu’u aloaia mai o nofoa sa oka e fa’aaoga e tagata o lo o fa’amama toto i Manu’a, ma le tau malaga mai i Tutuila nei e fa’aaoga le tautua o lo o maua i le falema’i i Fagaalu.

 

A o lumana’i ai fo’i le iloiloga o le paketi, ua talosagaina e ni isi o faipule ripoti i tulaga o tupe maua a le malo, ina ia tu’uina atu mo le silafia e le fono a o lumana’i ai le fesiligia o fa’atonusili ta’itasi ma a latou paketi.

 

I le fonotaga mulimuli a le kovana ia Lolo Matalasi Moliga ma lana Kapeneta i le amataga o le masina nei, sa ia fautuaina ai afioga i Fa’atonusili ina ia tapena uma mo le iloiloga o le paketi, ma ia onosa’i i ni fesili o le a fesiligia ai i latou e senatoa ma faipule, ae sili ai i lo na mea uma, aua le soona ofoina atu ni fa’amatalaga i le Fono ma le tele ai o fesili i le faigamalo.

Comment Here