Ads by Google Ads by Google

E le tele ni suiga ua faia mo le Matagaluega o Aoga a le malo


Le taimi na feiloa’i atu ai le Faatonusili o Aoga a le malo ia Dr. Ruth Matagi-Tofiga i le afioga i le Faipule ia Sataua Dr. Mataese Samuelu ma Fagaoatua Dorian T. Salavea, o ni isi sa avea ma puleaoga i aoga maualuluga a le atunu’u i tausaga ua mavae, i le mae’a ai o le iloiloga a le maota o sui ma le Fa’atonusili o aoga i le taeao ananafi. [ata AF]
ausage@samoanews.com

Na fa’amanino e le Fa’atonusili o le Matagaluega o Aoga a le malo i luma o le maota o sui i le taeao ananafi e faapea, e le tele ni suiga ua ia faia i le fa’atautaiga o le Ofisa o Aoga talu ona filifilia o ia i le amataga o le tausaga nei, se’i vagana ai nai suiga laiti ua ia manatu e fa’aleleia atili ai le tautua a le Ofisa o aoga mo le atunu’u.

 

O ni isi o ia suiga e aofia ai lona tofia o se vaega fa’apitoa e galulue i le tusiaina o talosaga mo tupe fesoasoani mai le feterale, fa’apea ai ma le vaega e asia aoga eseese uma lava i totonu o le atunu’u e aofia ai ma aoga tua, ina ia mautinoa e silafia uma e le Ofisa manaoga o loo tula’i mai i totonu o aoga ta’itasi.

 

O le iloiloga a le Komiti o Aoga a le maota sa fa’agasolo i le taeao ananafi, i lalo o le ta’ita’iga a le taitaifono ia Vaetasi Tuumolimoli Saena Moliga ma le Fa’atonusili o aoga ia Dr. Ruth Matagi-Tofiga, o le fia malamalama lea o afioga i faipule i le tulaga ua i ai le fa’agasologa o galuega a le Matagaluega, atoa ai ma auala e faia ina ia foia ai fa’afitauli o loo tutupu soo mai i le osofaia lea ma le fa’aleagaina o faleaoga e tagata gaoi ma le talepe fale.

 

Na fa’amanino e Dr. Matagi-Tofiga le taua tele o alaga tupe mai le feterale o loo fa’atupe ai galuega a le Ofisa o Aoga, o le mafua’aga lea ua ia manatu ai e tofia se vaega fa’apitoa o tagata faigaluega ua i ai le tomai i lea matata e galulue i le tusiaina lea o talosaga mo tupe fesoasoani, aemaise ai o le saunia o ripoti e toe tu’uina atu i le feterale e fa’ailoa ai auala o loo fa’aaoga i ai tupe.

 

“O le isi lea vaega e sili ona taua i le fa’atinoina o galuega a le Ofisa, o le manino lea o ripoti i auala o loo fa’aaoga i ai tupe mai fafo, o le mafua’aga fo’i lea o loo matou galulue fa’atasi ai ma aoga tua uma lava i le atunu’u o loo agava’a fo’i i se vaega o tupe mai fafo, ina ia tutusa auala e tusia ai ripoti ma fa’amaumauga e tu’uina atu i fafo e fa’ailoa ai auala o loo fa’aaoga i ai tupe fesoasoani”, o se saunoaga lea a Dr. Matagi-Tofiga i luma o le komiti.

 

I tulaga o asiasiga i aoga, ua filifilia ai ni vaega se 2 e gafa ma le asiasia o aoga uma lava i le atunu’u e aofia ai Aunu’u ma Manu’a, ina ia mafai ai ona malamalama le Ofisa ma ona ta’ita’i i manaoga o loo tula’i mai i totonu o aoga eseese, ma taumafai atu i ai se fesoasoani talafeagai.

 

“O le vaiaso na te’a nei na mae’a ai ona asia aoga i Tutuila ma Aunu’u, ma ua fa’amoemoe o le vaiaso fou e asia ai aoga i Manu’a. O se tasi o vaega o loo taula’i i ai asiasiga a i latou ua tofia i totonu o vaega eseese nei e 2 o loo gafa ma le fa’atinoina o asiasiga, o le vaavaai lea i le tulaga o loo i ai le faleaoga, atoa ai ma le manaoga i auala e fa’aleleia ai le a’oa’oina o fanau aoga. O i latou uma ua tofia e avea ma totino o vaega asiasi nei e 2 a le Ofisa o Aoga, o ta’ita’i mai vaega eseese ua i ai le tomai e sailiili ai i auala e foia ai fa’afitauli i totonu o le matagaluega”, o se vaega lea o le saunoaga a le tama’ita’i fa’atonusili.

 

O le tele o mataupu sa talanoaina i le taimi o le iloiloga, o auala e fa’aleleia ai faleaoga i aoga eseese uma i le atunu’u, aemaise ai o le toe si’itia o le auala e aoao ai e faiaoga fanau aoga.

 

Na taua e le afioga i le ali’i faipule ia Vesi Talalelei Fautanu Jr le taua tele o le fa’amalosia o le puipuiga ma le saogalemu i totonu o aoga, ina ia mautinoa e malu puipuia le soifua o fanau aoga atoa ai ma faiaoga.

 

O se tasi o fa’afitauli na taua e Vesi o loo maitauina i totonu o ni isi o aoga i le taimi nei, o le ulaula tapa’a o faiaoga atoa ai ma fanau aoga i totonu o lotoa, ma o le popolega o loo i ai, ina nei avea le fa’atamala o faiaoga ma auala e toe saili ane ai, ua oo atu i totonu o faleaoga isi tulaga matuia e pei o fualaau fa’asaina ma a’upega mata’utia.

 

Na fesiligia e Vui Florence Saulo tulaga o ni faleaoga fou mo Tualauta, atoa ai ma le mataupu i vai taumafa mo fanau aoga pe afai ae faaletonu le suavai, ae na fa’amanino e le molimau e fa’apea, o le suavai taumafa o vaega ia e gafa ma le Vaega a le School Lunch ae o le fausiaina o faleaoga fou e gafa ma le Ofisa o Galuega Lautele a le malo.

 

Na taua e Fetui Fetu Jr le tatau lea ona tutusa polokalame o loo fa’atinoina i aoga i Tutuila nei ma aoga i Manu’a, ae na fautuaina e Kitara Vaiau le tatau lea ona fausia ni pa e si’omia ai faleaoga uma i le atunu’u mai le osofa’i ma fa’aleaga e tagata.