"E le tau sulaina le Toga Lelei!"


O le taimi ua mae'a suia le ie o le misasa pa'ia sa ufiufi ai lona Sa, ae ua fa'aaogaina le Ietoga mamae na'ua, aua o ia o le tama'ita'i o aiga, o ia fo'i o se tasi e pele ia te ia lona aiga, ae maise lava i lana tapua'iga. [ata: Leua Aiono Frost]

O Joan Latasi Galea'i - Holland, lona uso o lo'o soifua mai ma o ia fo'i sa faia le ulua'i molimau mo lona uso e puipui tele ia te ia a'o talavou o la'ua olaga. O se tasi e le alo fo'i ona manatu fa'aalia i so'o se mea i totonu o le aiga potopoto. E ese mai lea e alofa tele e fa'asalafa lona alofa i a latou fanau uma lava! O lo'o pu'ea lo la'ua ata ma le tina o Rosa Fa'aola mai le afio'aga o Amaluia. [ata: Leua Aiono Frost]

"Aua o le faia le finagalo o lo'u Tama o i le lagi, o lo'u uso lea ma lo'u tuafafine ma lo'u Tina!"

 

O le fetalaiga tu'u sa'o a Iesu lea ua fa'aaogaina, aua o le toe taimi o le tina peleina Amanda Galeai Iuli, sa iloga ai, e taua tele ia te ia lo la'ua va ma lona Atua, nai lo le tele sa'afi'afiga o le olaga nei.

 

O se tasi sa taua ia te ia lona fa'atuatuaga i lona Atua ma lana Ekalesia e faauia atu ai lana tautua mo lona Atua, e le femalueluea'i lona avea ai ma tama'ita'i Katoliko.

 

O se tina e tausi fanau, ua avea uma lava alo o le tama o le aiga, Le Fitafita o le Fuava'a a le Malo Tele, Kapeli Iuli ma ana fanau, e aofia uma ai ma isi fanau uma a lona aiga Sa Faiivae ma Ta'eleifi, le Sa Godinet ma Sa iuli, e laugatasia i latou i le agalelei ma le alofa lima foa'i o Amanda, a'o soifua mai lona ali'i na mafuta e o'o mai fo'i ina tu'ua le mafutaga.

 

E taua upu fa'amavae a le susuga Patele na ta'ita'i lona Misasa Pa'ia, lea sa ia fa'apea ai, "Sa e manatu e leai ma se molimau e faia i le sauniga o lou Misasa Pa'ia, fa'afetai i lau fa'amuamua  lou Atua, o le ala fo'i lea o la'u fa'alauiloga o oe, "E le tau sulaina le toga lelei!" E le tau faia ni fa'aupuga e mataituina ai lau amio na lelei, ma sou sao ua o'o i luma o le Atua le sasala ma le manogi lelei! Ua muao muao ua fa'asao!"

 

Ua toetoe atoa le 91 tausaga o le soifua o Amanda Galea'i Iuli, ae tu'umalo. Sa soifua i ona matua Galea'i Apelu ma Lina Schmidt Galea'i i Ta'u Manu'a, o ia o le lona tolu o la'ua fanau ia Ianuari 24, 1927 ae o lea ua tu'ua le malo ia Ianuari 08, 2018. Peita'i i le talitonuga o le Ekaelsia Katoliko Roma, o le aso na maliu ai, o le Ulua'i aso lea o le Sauniga o le Papatisoga. O se vaitau o fa'amanuiaga mo so'o se tasi ua fa'atuatua i lona Atua, ua fa'afou le mafutaga ma lona Atua e ala lea i le tanumia fa'atasi ma ana agasala i le tu'ugamau suavaia, ae fa'afou le mafutaga ma lona Ali'i. Ua tonu ma lona talitonuga le vaitau e fa'amavae ai ma lenei olaga le tumau i le lalolagi o tatou o i ai!"

 

I lona tuputupu a'e i le olaga talavou ua tu'ua Ta'u, Manu'a ae ua taliu mai i Leone, e matua tele le taimi o Amanda e mafuta ai ma Tama'itai Sa o le St Theresa. Ona avea lea o ia ma faia'oga ina ua mae'a ana a'oa'oga i Tama'ita'i Sa.

 

"O se tina e fiafia e talatala lona gafa ma iloa lelei lona aiga. E tautala fo'i o ia i ona tuagane i mea e lelei ai aiga, ia nofo lelei ma ola fealofani ma fai le mea sa'o. E le faigofie i nisi taimi ona manatu i e matai o le aiga, peita'i o se fautua e le 'alo lava e tautala i ai, e tu'usa'o mai ona taofi."

 

Ua iloga o ia i tina o le latou aiga potopoto. e fai uso e pei lava ta'ito'alua o ona tuagane o ona uso. E o'o fo'i i ta'ito'alua o lana fanau ma Kapeli Iuli, e pei lava o lana fanau moni i latou.

 

E alofa o ia i so'o se tasi lava e tupuga mai ona tuagane ma ona uso, o a latou fanau o fanau uma fo'i ia te ia. E osiosi ona aiga, na te le tu'ua se mea pe a va'aia le mana'omia. I molimau na fa'afofogaina mai nisi o tina o le aiga, Milovale Palepa Seui sa ia fa'ailoa ai, "O lenei tina, sa mafua ai ona maua le o'a e fa'aa'o'oga uma ai i matou e o matou matua, aua sa lelei le la'ua fa'ato'aga, ae avatu le seleni e fa'atau mai ai uma e Kapeli ma Amanda matou fua o fa'aeleeleaga e tausia ai o la'ua aiga. Fa'afetai Amanda, aua e le o misia lava le tala, i tua atua ose tama lelei, o se tina fautua silisili ona lelei."

 

Molimau fo'i le afioga le Maluolefale, Faiivae Alexander Godinet, "Ona o i matou lava o se fanauga pito i to'atele i le Aiga Sa Iuli i le matou tutupu a'e, e to'a 16 i matou, e le misia le oso atu o le ta'avale a le tama o le Fuava'a a le Malo tele ma le faletua ia Amanda, e asi atu i matou e avatu lava le mea e faia ai le mea'ai mo i matou uma. E popole atu i le matou to'atele, fa'afetai le fautua alofa, ua e maliu lava e le tu'ua lau tu'u alalo i mea e lelei ai aiga! E te fesili ma toe fa'ailoa ma fa'amanatu mai le aluga o mea e ao ina faia ai, fa'afetai i lou alofa fa'atina."

 

I le molimau a se tasi o alo tama'ita'i o lona uso matua, Pulotu Filemoni, sa avea ma faletua o le faife'au, ma sa fa'alagi e lona tama o le "afafine mativa" ona sa tu'ua aiga ae aga'i atu i le galuega a le Atua, "E iloga lava le alofa o Amanda e le'i faia le Kerisimasi ae ua taunu'u le fa'amanuiaga, o lo'o fafao atu ai le tupe i totonu. Lona lua e le misia le pusa lavalava e fa'ao'o atu pe a to'ai taunu'u i Tutuila nei, ina ia fa'aofu i matou ma matou uso ma tuagane i le galuega."

 

E ui ina e le maluelue lona avea ma le tama'ita'i o le Ekalesia Katoliko, ae sa faitugane lava o ia, i le ata o lana polokalama mulimuli o lona maliu, o le ata sa pu'eina i le malumalu EFKAS - Siona le Mauga Pa'ia i Leone lava.

 

I fatuga sa peseina e le susuga Tialuga Vincent Iuli, sa ia fa'aupuina, "Koluse Pa'ia pele, e saumani afaese lava oe, manatua mai a'u i lau tatalo fa'amolemole." Na fa'ailoa e ia o le 65 tausaga o lona tina sa fa'amanatu i lona alu i le lauina o le Losalio i Niu Ioka, o se fa'atasiga sili lea ona tele mo lea fa'amoemoe talu ona faia e le Ekalesia Katoliko Roma. O le fa'amanatuga o lona aso fanau lona 75, sa malaga ai i Roma i le Vatikana ma sa ia maimoaina le matagofie o malumalu tetele o St Peter i lena a'ai tele o lana ekalesia. Na te le'i manatuina le Persetene na tula'i i le tausaga na soifua mai ai i le lalolagi 1927, ae matua tauloto le afioga le Pope na ta'ita'ia le Ekalesia Katoliko Roma i le 1927 i le Vatikana o Pope Pio 11 lea na fa'aigoa ai Katinale Pio Taofinu'u o Samoa na lua."

 

O lana fa'ataua lea i lana ekalesia ma sa ia talosaga fo'i i Patele, aua lava ne'i faia se molimau i lona toe misasa, ae ia faia lava na'o le misasa e si'i ai le vi'iga i le Atua, aua a faia molimau e pepelo uma lava na mea, aua o lo'o faia e tagata soifua.

Comment Here