“O ai”, o le fesili toe tuli tatao atu lea a Meki i le sui o lana vaega lea o loo la talanoa i luga o le uaealesi, “Se o le teineititi pologa o Ianeta lea ua matou mauaina i se vaega o le vaomatua, o loo moe i lalo o se laau tele lava, ma ua tatau nei ona tatou toe fa’anatinati atu i le ta’avale ma tatou o ese loa manu e le’i tuliloa maia le teineititi e auauna a le tupu”, o le fa’amatalaga lea a le sui o le vaega a Meki ma tape loa le uaealesi, ona ia faliu atu loa lea i lana vaega ma fa’atonu loa ina ia latou toe fo’i i le vaega sa latou ui mai ai. Na ona mae’a lava o le talanoaga a Meki ma le isi sui o lana vaega, ona ia faliu atu loa lea i lana soa sa la to’alua e fa’ailoa i ai le tonu lea o le a faia, peita’i na matua fa’ateia Meki ina ua faliu atu i ona tua e le o mulimuli atu lona soa ia te ia. Na taumafai Meki e toe fa’alapopo’a te isi ona mata ina ia manino lelei ai lana vaai, ona o lea o loo pogisa le vaega o le mauga lea ua la oo atu i ai, peita’i ua fiu lava le ali’i e autilo solo lana soa ua leai se isi, ae o le taimi lea ua matua tau le lagona se mea i le pisapisao o tagata pologa meauli ia latou fa’afiafiaga ma siva o loo faia i luma o le malae.

Na tago Meki i lana moli uila ua ki solo se’i tau siaki ai lana soa poo fea o i ai, ae na avea le ki o lana moli ma itu na iloa mai ai e tagata uli o loo leoleo i luma o le faitoto’a le moli, ma alalaga leotetele ai loa e fa’ailoa atu ai i tagata o le nu’u e i ai tagata ia ua aga’i atu i le nofoaga o loo latou nonofo ai. Na muta fa’afuase’i le fiafia ma le poula a tagata pologa sa faia i lea po, ma ua vaaia ai le alu o le tuli a fafine ma tamaiti i lalo o fale e ato i lauvao ma lalafi mai ai, ae o tamaloloa ma taulele’a tino malolosi ma uumi ua tofu ma le tao ma aga’i mai i le vaega o le auala lea na latou iloa mai ai le emo solo atu o le moli uila. Ua matua fefe lava le tamaloa o Meki i le taimi lea ina ua ia iloa, afai ae maua i laua ma lona soa e tagata uli nei, lona uiga o le iuga lea o i laua.

Ao lafi fa’apupu’u Meki i tua o se tasi o pito papa ma taumafai e autilo pe na te tau iloa atu ni isi e aga’i atu i le itu o loo lafi mai ai, na fa’afuase’i ona ia fa’alogoina le alalaga leotetele o tagata ma pisapisao, mulimuli ane ae ona fa’alogoina loa le leo o lona soa ua ee ma alaga leotele mai, “auoi, auoi, fia ola fa’amolemole”, ae o le taimi lea na fana ai e le isi tagata meauli tino maualuga ma foliga saua lana fulu a u ma tu ai i le ogavae o le soa a Meki, ma vaaia ai loa le sa’esa’e ane e tagata uli o lona soa ma amo aga’i atu i le malae lea sa faia ai a latou fa’afiafiaga. Na vaaia e Meki le toe aga’i mai i le itu lea o loo lafi atu ai le isi vaega toatele o tagata uli, e foliga mai ua latou iloa le pito lea o loo lafi ai, ona atili ai lava lea ona lafi lilo le tamaloa, o lana uaealesi i le isi ona lima ae o lana tama’i naifi i le isi ona lima. E fetaui loa le latalata ane o le tagata uli i le vaega lea o loo lafi ai Meki, ae fa’afuase’i loa ona tatagi lana uaealesi, o lea ua toe feso’ota’i ane le latou vaega lea ua latou mauaina le teineititi pologa o Ianeta ia i laua, poo fea ua la oo atu i ai, o lea ua latou fiu e fa’atalitali mai i luma i le faitoto’a i le vaega o loo paka ai le latou ta’avale. Na avea le ee o le uaealesi a le tamaloa o Meki ma itu na lagona ai ai o ia e isi tagata uli sa latalata ane, ma latou taufetuli atu ai loa i le itu lea ma taumafai e sosogi solo pe latou te mauaina ai se tagata, e le’i umi ae maua loa e tagata uli ia le tamaloa o Meki, ona latou saisai fo’i lea o ona lima ma vae ae amo aga’i atu i le malae i le vaega tonu lea o loo ta’atiatia mai ai lona soa ua mae’a fo’i ona saisai vae ma lima. Manatua fo’i, o lea sa ola le uaealesi a Meki, ma o loo lagona uma mai e lana vaega le tulaga lea ua tupu, ua i ai tagata ua latou mauaina i laua, ona faia ai loa lea o le tonu a le au ali’i ia ua latou mauaina le teineititi o Ianeta, o le a latou fo’i loa i tai manu e lei oo atu le tuliloaina o le teineititi e auauna a le tupu poo tagata uli fo’i.