Na pei e pe le fatu o le auauna ina ua faliu atu i le nofoa pito i tua o le ta’avale sa nofo ai le teineititi pologa o Ianeta, ua leai se isi o nofo mai ai. “Lau susuga i le Ta’ita’i Fitafita, ua leai se teineititi pologa sa i totonu o le ta’avale”, e fai lava tala a le auauna ma tago atu ua toe fa’a solomuli le ta’avale, ma toe aga’i atu loa i le vaega o le auala lea sa la aga’i mai ai ma le teineititi pologa lenei, atonu na te toe maua atu ai, ae o le Ta’ita’i Fitafita i le taimi lea, ua matua tumu i le le fiafia, ona o lea ua tau masalosalo lona loto i le mafua’aga na ala ai ona aga’i mai le au ali’i ia sa latou feiloa’i i luma o le faitoto’a o le nofoaga, e o mai e avatu fa’agaoi le teineititi pologa lea ua mae’a ona fa’atau mai e lo latou matai ina ia fai ma pologa i totonu o le malo.

E tiga ona manu’a vae o le teineititi meauli i le taimi na oso ai i fafo ma le ta’avale, ae na onosa’i lava le tiga ae ua sola ausulusulu i lalo o laau tetele o loo tu mai i le isi pito o le togavao ma le fa’amoemoe e maua i ai sona mapusaga, na ona taunu’u atu lava o le teineititi i lalo o se tasi o laau tele lava, ona nofo ai loa lea i lalo o a’a tetele o le laau ma to ai lona sela mo sina taimi puupuu, ona toe fa’aauau ai lea o lana sola’aga ina ne’i maua mai o ia e le auauna. Ua manaia le agi malu mai o le savili i lea afiafi, ma ua fa’alogoina fo’i e le teineititi pologa pesega a manu felelei i luga o laau, ma ua pei ai lava ua toe oo i lona aiga sa ola a’e ai i afiafi fa’apea, e le gata i le malu o le savili e puaina atu e laau, ae o le malu fo’i o pesega e momoli atu e manu felelei o le vaomatua. O le vaivai tele o le teineititi, lagona le fefe ma le manaia o le malu o le ea i lalo o le laau tele o loo lafi fa’apupu’u ai, na fa’afuase’i ai lava ona fa’agalegale moe le teineititi, ma i’u ai lava ona moe gase loa.

A o moe le teineititi pologa o Ianeta, sa fa’afuase’i ona fai lana miti, fai mai ua malu le afiafi ona faia lea o le la lotu afiafi ma lona grandfather, ma tu’u atu ai le avanoa ia te ia na te faia ai le tatalo, ona ia tatalo ai lea ma le fiafia, ina ua maua le avanoa e talanoa ai i le Atua ma fa’afetai i ai mo mea lelei uma ua ia faia mo le la aiga. O le malulu o le po ao moe e leai se ie afu i lalo o a’a o le laau tele i le togavao, na fa’afuase’i ai loa ona motu fa’afuase’i le miti a le teineititi meauli ina ua ala i luga ma ia vaaia ai le susulu manaia o le masina i le po, fa’atasi ai ma le pogisa o lalo o laau o loo nofo ai. E lei lagona e le teineititi se fefe, se’i vagana ai lona fia oo i lona aiga, le fale o le fafine saua o Mekala ma lona to’alua le alofa o Pulusi.

Sei o tatou liliu atu lava i le osofaiga a le tamaloa o Meki ma ana Leoleo fa’apitoa lea ua aga’i mai. E fetaui lava le malu ane o le afiafi ae taunu’u loa i totonu o le loloto o le vaomatua le osofaiga a le tamaloa o Meki ma lana vaega. Manatua fo’i, e eseese uma itu ia ua aga’i atu i ai le osofaiga, o Meki ma le isi ana tama fa’apitoa o loo ui atu i le itu i sasa’e o le nofoaga o loo i ai tagata pologa, ae o isi ali’i e to’atolu o loo ui aga’i atu i le itu i sisifo, o le itu tonu lava lea o loo aga’i mai ai le sola’aga a le teineititi pologa o Ianeta. O le pogisa o le po na faia ai loa le tonu a Meki ma lana soatau, o le a la malolo i lalo o se tasi o laau tele mo le po, e fa’atali ai le oso a’e o le la i le taeao, sa fa’apena fo’i ona faia e isi ali’i o le latou vaega i le isi itu, ae o le ta’aligoligoa o le po ua leai se mea e toe gase, na taia ai i le fa’alogo a Meki ma lana soatau leo o pesega a tagata o loo sau mai se tasi o itu e le mamao ese atu ma le nofoaga o loo la i ai, o lea na faia ai loa le tonu o le a la toe tula’i ma fa’alatalata atu i le nofoaga o loo aga’i mai ai pesega ma leo o tagata o loo pisapisao. Ua aga’i atu le sailiga ma aga’i atu pea, seia oo ina la taunu’u atu i luga o se tasi o pito mauga, ma la vaaia ai le motu o tagata uli o loo faia a latou siva ma fiafiaga i totonu o le aai lea o loo nonofo pologa ai.