Ads by Google Ads by Google

E LE O OE O SE SULI MONI - Vaega XVIII

O le fefe tele o le teineititi o Ianeta ina ne’i iloa mai e ali’i e to’alua o loo fa’afoeina le ta’avale o ia lea ua ala i luga, na mafua ai loa ona taotooto i luga o le moega lea o loo taoto ai ma mafaufau loloto i le mafua’aga ua aveese mai ai o ia fa’apea e le fafine saua o Mekala. Na aga’i pea le ta’avale i se nofoaga mamao e le’i oo muamua i ai le teineititi, peita’i e le’i umi ae fa’alogoina loa e Ianeta le ta’avale ua tu, peita’i sa faigata ona ia iloa atu ni tagata i fafo ona o le soloatoa o le ta’avale o loo taoto ai i totonu.E lei umi ae fa’afuase’i loa ona ola uma moli i totonu o le vaega o le ta’avale lea o loo taoto ai, ma ia vaaia ai loa le faitoto’a pito i tua ua matala, ma ia iloa ai, o luma o se fale tele lava lea o loo tu ai le ta’avale. Ao tau autilo Ianeta i fafo pe na te iloa atu ni tagata, ae na fa’afuase’i ona valaau mai se tagata i lona, ona ia faliu lea i luma i le vaega o loo i ai le feouli o le ta’avale, ma ia vaaia ai ali’i tino lelei e to’alua sa latou malaga mai o loo fa’atalofa mai ia te ia ma fa’aali mai o la foliga fiafia.

 

“Ianeta, o lea ua tatou taunu’u mai i le nofoaga fou lea ua fa’amoemoe e te nofo ai ma avea ma ou aiga tumau. Aua e te popole i se mea e tasi, ae tula’i tatou aga’i atu i fafo o le fale, mo le fa’asinoina atu o le fale e te nofo tumau ai”, e fai lava tala a le ali’i ave ta’avale ma tago atu ua oomi le isi ki o loo pipii i le faitoto’a o le ta’avale, ona vaaia ai loa lea e Ianeta le tau fai pepe uma o moli i totonu o le ta’avale, ona ia tu ai loa lea i luga mai le moega o loo taoto ai ma oso i fafo ma le ta’avale, ma o se tulaga na ofo ai lona loto i le matagofie o le fale lea o loo paka ai i luma le ta’avale na latou malaga atu ai, e foliga mai o se fale o se tagata milionea i totonu o le malo. “Ianeta, tatou aga’i atu i totonu o le fale”, o le valaau ane lea a le ali’i ave ta’avale ma latou savavali atu ai loa i totonu o le faitoto’a muamua lava sa latou tau atu i ai, ma fa’aauau atu ai pea seia oo atu i le vaega tele o le fale lea o loo ogatotonu i le vai taele ma nofoaga e tamomo’e ai tagata, ona toe fa’apea atu fo’i lea o le ali’i ave ta’avale i le teineititi pologa, “Ianeta, ua e vaai atu i le faitoto’a le la o loo tusia mai ai le numera 10 i luma, ia e savali sa’o atu lava i le faitoto’a le la ma tatala, ona e ulufale ai loa lea i totonu o le potu, o iina e te mapu ma malolo ai i le po nei, se’i malama le aso fou ona toe maua lea o se isi fa’atonuga mo oe”.

 

Na ona mae’a lava o le fa’atonuga a le tagata lea ia Ianeta, savali ese loa ma aga’i atu i le isi itu o le fale, ae ua fa’aauau fo’i le savaliga a Ianeta i le itu o lo o i ai le faitoto’a lea o lo o tusia ai le numera 10. Na ona taunu’u lava o le teineititi i luma o le faitoto’a, maligi loa ma ona loimata, ina ua toe tau lona mafaufau i le fafine faiaoga o Lucy ma lona to’alua o Meki lea o loo la taumafai malosi e aveese mai o ia mai le fale o le fafine saua o Mekala, a o lea ua i’u lava ina manumalo taumafaiga a le fafine o Mekala. Na aapa atu le teineitiiti ma tatala le faitoto’a, ma fa’afuase’i ai ona mumu le moli, ona ia iloa atu lea o se moega ma ni aluga ma se ieafu, ona ia savali sa’o atu loa lea ma nofo i luga o le moega ma autilotilo solo ona mata i totonu o le potu. O le malulu o le po na i’u ai loa i le taoto i lalo o Ianeta i luga o le moega ma moe gase loa.

 

Sei o tatou liliu atu lava i le ulugali’i o Meki ma lona to’alua faiaoga o Lucy. Ina ua le alu atu Ianeta i le aoga i le aso lea, na telefoni ai loa Lucy i lona to’alua ma fa’ailoa i ai Ianeta e le o aoga, peita’i sa tali i ai le tamaloa o Meki, e onosa’i se’i tau fa’afeso’ota’i le Loia a le Ofisa e logo i ai le fa’afitauli o loo tula’i mai, ina ia mafai ai ona tau saili se auala e mafai ai ona aveese mai Ianeta mai le aiga o le fafine saua o Mekala, ae talu ai le pisi tele o le tamaloa o Meki i lana galuega i lena aso ma tuai ai ona manava, na tonu ai loa i lona manatu fa’atoa toe o i le aso e sosoo ai ma lona to’alua o asi Ianeta i lona aiga.