E LE O OE O SE SULI MONI - Vaega XV

O le taimi lava na maua ai e Lucy le telefoni mai lona to’alua, na fa’atuua ai loa ma lana vasega ae savali sa’o atu ua talanoa i le tama’it’ai pule aoga e fa’ailoa i ai le fa’alavelave ua tula’i mai, aemaise ai o lea ua vili mai lona to’alua la te fetaui i le fale o Ianeta, atonu e maua atu ai o ia iina. Se’i o tatou liliu atu lava i le malaga to’alua a le fafine saua o Mekala ma le teineititi pologa o Ianeta lea ua alu atu nei. Na ona alu ese mai lava o le ta’avale a Mekala ma Ianeta mai le faleaoga, fa’asasa’o loa ma le ta’avale i le fale ona o lea o loo fa’atali mai ai le tamaloa o Pulusi. “Aisea ua e alu ese ai ma le aiga. O ai ga fai aku ia ke oe e ke alu ese, ah, kaukala mai lou gutu”, o le mau fesili lea na fesili atu ai le fafine o Mekala i le teineititi, ae sa na o le nofo lava o le teineititi ma tagi. Ia e fa’alogo lelei mai lava, ua uma oga ou fai aku ia ke oe, e le o oe o se suli mogi o le aiga miliogea sa gogofo i le fale ma le fagua o loo kakou gogofo ai, o oe o le kama a le keige pologa sa kia’i i le falema’i, ma o aku ai loa le ulugali’i miliogea sa oukou gogofo ma aumai oe ma kausi i le lo lakou aiga”.

 

E ui i le pisi o le auala i le to’atele o tagata faigaluega ua amata ona manava, aemaise ai o fanau aoga ua tuua aoaoga, ae na mafai lava ona vave taunu’u le ta’avale a le fafine o Mekala i le lotoa ma aga’i atu loa i totonu, ona ia tapuniina loa lea o le faitoto’a tele i le vaega e ulufale atu ai ta’avale ma tagata i totonu, e taofi ai se ta’avale mai le toe soona ulufale atu i le lotoa. O le ita tele o le fafine o Mekala i le teineititi pologa na mafua ai ona ia tatala le faitoto’a ae fa’atu o ia i le malae i le vevela o le la, fa’atoa savali ai i le faitoto’a o le fale ma aga’i atu i luag i le fogafalelua, ona ia valaau mai lea i le teineititi pologa e savali atu i totonu o le fale, ae ina ua taunu’u le teineititi i totonu o le fale, sa amata loa ona otegia o ia e le fafine o Mekala ma fa’ailoa i ai le fuafuaga e oo ia te ia pe afai ae toe sola ese mai le latou aiga. Na ona mae’a lava ona fai o fa’atonuga i le teineitiiti pologa, fa’atonu loa e le fafine milionea o Mekala o ia ina ia savali sa’o loa i le vaega o le fanua o loo i ai le fa’atoaga ma amata loa ona fai ana galuega masani.

 

Talofa i le olaga pologa ma le leai o se saolotoga e maua, na lilo i le mafaufau o le fafine o Mekala, e le o mapu le ulugali’i o Meki ma lona to’alua faiaoga ia Lucy i le sailiina o le teineititi pologa o Ianeta. E fetaui lava le taunu’u o le ta’avale a le tamaloa o Meki i luma o le faitoto’a o le lotoa o le fanua, ae taunu’u loa fo’i ma le ta’avale a lona to’alua o Lucy, ona la fa’atonuina loa lea o le fafine o Mekala ina ia tatala le faitoto’a, o lea ua aga’i atu sui o le Ofisa e vaavaaia tamaiti o loo tausia fa’apologa ina ia mautinoa o lo o tusa ma ala o le tulafono le tausiaina o i latou. O ata uma na mafai ona tapu’e e le ulugali’i i soo se taimi la te asia ai le teineititi aemaise ai o le faiga o ana feau ma le fale o lo o nofo ai, na mafai ona fa’ailoa uma e le tamaloa o Meki i le fafine o Mekala i le taimi lea, ma fautuaina ai loa o ia ina ia tu’u atu le teineititi o Ianeta latou te malaga, manu e lei uia isi ala o le tulafono, peita’i na fa’ailoa e le fafine lona musu e tu’u atu le teieititi e o ma le ulugali’i.

Comment Here