Ads by Google Ads by Google

E LE O OE O SE SULI MONI - Vaega XIX

Na ese lava lagona o le ulugali’i ina ua taunu’u le la ta’avale i luma o le faitoto’a o le pa e afe ai i totonu o le lotoa o le fale o loo nofo ai le teineititi pologa o Ianeta, ma ua ese ai lava lea aso i aso uma lava talu ona la o e asi le teineititi. Na tau fai tilotilo le isi i le tasi ona fa’afuase’i lea ona fa’apea atu le tala a Lucy i lona to’alua, “Ua ese lava o’u lagona i lenei afiafi, pei lava o lo o i ai se fa’aaliga o loo taumafai lo’u mafaufau e fa’ailoa mai ia te a’u, ua oso lava lo’u le fia aga’i atu i totonu o lenei lotoa”, o tala ia a le fafine o Lucy i lona to’alua o Meki ao aga’i malie atu i totonu o le lotoa o le aiga o Ianeta le la ta’avale, ona alu atu lea ma paka i luma tonu lava o le tama’i fale o loo nofo ai Ianeta, e pei ona masani ai ona la faia i soo se taimi la te aga’i atu ai e asi le teineititi pologa. Na ona tu lava o le ta’avale, tatala loa e le fafine le faitoto’a ma oso i fafo, ma fa’ananati atu lana savali i totonu o le tama’i fale o le teineitiiti, na te fia iloaina poo ai mai o ia, ae aisea fo’i na le aoga ai, peita’i na pei e taia le vaai a le fafine i se vaaiga uiga ese ina ua tau atu lana vaai i le aluga ma le ie afu a Ianeta o loo ta’atitia mai i lalo o le laulau, e foliga mai na ato i ai ese tagata, o lea na savali faanatinati atu ai loa le fafine faiaoga o Lucy ma tago atu i le ieafu ma le aluga a Ianeta, ma ia iloa ai o loo susu uma le aluga ma le ieafu, e foliga mai e le’i afu ai se isi i le po ua mavae.

 

Na avea le umi ona i ai o Lucy i totonu o le fale ma itu na tau oso ai le masalosalo o le tamaloa o Meki, ona ia oso ai loa lea i fafo ma le ta’avale ae savali atu i totonu o le fale, peita’i o se vaaiga na fa’ateia ai le tamaloa ina ua tau atu lana vaai i lona to’alua, o loo tootuli mai i le moa o le fale ma tagi, ae o loo uu i lona lima le ieafu ma le aluga a Ianeta ma fa’apipi’i i lona fatafata. “Suga, o le a le mea ua tupu”, o le fesili fia iloa lea a le tamaloa o Meki, ae na tali ane i ai Lucy, “Pei lava ua aveese si a’u tama o Ianeta ma ave i se isi nofoaga, ai o le mafua’aga lea na le aoga ai o ia i lenei aso”, o le tagi tautala lea a le fafine faiaoga ma uu mau lava i ona lima le ieafu ma le aluga, ae o le tamaloa o Meki i le taimi lea, ua tago i lana telefoni ma fa’afeso’ota’i loa le latou Ofisa autu e tusa ai o le mataupu e fa’atatau i le teineietiti pologa o Ianeta, atoa ai ma lona talosagaina lea o se gaioiga ina ia sailia vave mai ai o ia, ae o le taimi lea o loo matamata mai ai le fafine saua o Mekala mai luga o lona fale i gaioiga a le ulugali’i o loo fai atu i lalo, ma ataata aamu ina ua ia iloaina, ua le pa le pomu sa taumafai le ulugali’i lenei e fai ina ia la mauaina ai Ianeta.

 

“Lau susuga Meki, e i ai se mea ou te fesoasoani atu ai ia te oulua ma lou faletua”, o le valaau ane lea a le fafine saua o Mekala mai luga o lona fale fogafalelua i le ulugali’i, a o feofeoa’i solo ai le ulugali’i i totonu o le tama’i fale sa nofo ai le teineititi pologa o Ianeta ma o la mafaufau ua le mautonu i se gaioiga o le a faia. Na faliu le tamaloa o Meki i tua ma ia vaaia ai le fafine saua o Mekala o loo tu mai i luga o le fogafalelua o le la fale maualuga ma lona to’alua, ma ona foliga fiafia. “Ma te le o mana’omia sau fesoasoani, pau le itu na ma malaga mai ai, e fia asia mai Ianeta poo ai mai o ia, ae foliga mai ua e aveesea o ia ma tu’u i se isi nofoaga”, e fai lava tala a le tamaloa o Meki ma savali aga’i atu i le vaega o loo tu mai ai le fafine o Mekala, ae mulimuli atu ai i tua lona to’alua o Lucy ma ona foliga fa’anoanoa ma le mafatia ina ua le vaai ia Ianeta. Na fiu le ulugali’i e tu’i fesili le fafine o Mekala poo fea ua ave i ai Ianeta, ae tasi lava le tali a le fafine, sa i ai lava o ia i lona tama’i fale i le aso ananafi atoa ai ma le po atoa. “Ua lelei, afai ua e olegia i maua, o le avanoa mulimuli lenei mo oulua, ia ma toe malaga mai i le afiafi nei i le itula e 6:00 ua toe fa’afo’i mai Ianeta iinei, afai e leai, o le a oo loa la tatou mataupu i se isi tulaga”.