E LE O OE O SE SULI MONI - Vaega XIV

Na ona uma lava ona fai atu o le tala lea a le tamaloa o Meki i le fafine saua o Mekala, faliu loa ma le tamaloa ma toe fa’aauau lana savali i lana ta’avale, ona tatala lea o le faitoto’a ma oso i totonu, fa’aola le ta’avale ma toe aga’i atu loa i le Ofisa, ae tutu ai lava na o le fafine o Mekala i le vaega e paka ai ta’avale, e pei o se tagata ua leai se fa’amoemoe, ao matamata lelei mai ai lava le tama’ita’i faiaoga o Lucy mai totonu o lana potu.

 

Na avea le pisi o le tama’ita’i faiaoga o Lucy i mataupu a lana vasega ma itu na le’i toe alu ai lona mafaufau i le fafine o Mekala lea o loo tutu atu i le vaega e paka ai ta’avale, ae ina ua oo i le taimi o le malologa, na tau fai pisi uma ai loa tamaiti aoga e tafafao i totonu o le malae, e pei lava ona latou faia i aso ta’itasi o le olaga aoga, sa le’i alu fo’i le ulu o Lucy i le teineititi o Ianeta poo fea o loo malolo ai i le taimi o le malologa. Ae ina ua ta le malologa, na fa’anatinati atu ai loa le teineieiti o Ianeta i le fale’aiga a le aoga e fia fa’atau sana meaai ina ua lagona lona fia ‘ai. E fetaui lava le faliu mai o le fafine o Mekala i le isi itu o le faleaoga, ae tau atu loa ma lana vaai i le teineititi o Ianeta o loo savali aga’i sa’o atu lava i le itu o loo tu mai. Na matua ese lagona o le fafine i lea taimi ina ua ia vaaia le teineititi pologa o Ianeta ma ana teuga aulelei, o ona foliga ma ana lavalava aoga o loo fai, ma ua fa’afuase’i ai ona sioa le pupula a le fafine, ae ina ua tau mai le vaai a Ianeta i le fafine o Mekala, sa fa’afuase’i ona tu ma fa’atau pupula mai i ai.

 

“Ianeta! sau ta o”, o le valaau atu lea a le fafine ia Ianeta, ae ua na o le tu o le teineititi ma fa’ataupupula i le fafine mo ni nai minute, ona vaaai lea o ona loimata ua maligi ma ua foliga mai ua mafatia lona loto, ae o le fafine o Mekala, ua atili ai ona naunau lona loto e fia pa’i atu ia Ianeta ma la o ese loa.

 

“Ianeta si a’u tama, sau ta o, vaai ua ou le moe lelei i le tau sailiina o oe poo e saogalemu. Ua leva ona ou sau iinei e tau saili solo oe, e le o lelei fo’i se moe a lou tama o loo fa’atali mai i le fale, ona o le popole poo fea ua e alu i ai”, o le fa’atauanau atu lea a Mekala i le teineititi o Ianeta, ae o lo o tu tu pea le teineititi e aunoa ma sana upu e tali atu i ai, se’i vagana ai le maligi o ona loimata, ae ina ua tuana’i nai sekone, sa vaaia ai loa e Mekala le savali mai o le teineititi o Ianeta ma tatala le faitoto’a o le ta’avale ma oso i totonu o le ta’avale.

 

E lei toe fa’atali le fafine saua o Mekala, ae ua oso fiafia nei i totonu o le ta’avale, fa’aola le ta’avale ma la aga’i ese atu loa ma le lotoa a le aoga manu e le’i maua ane i laua e le faiaoga poo le tama’ita’i pule aoga, ona toe taofi lea o Ianeta. O le mae’a ai o le malologa a le aoga i le aoauli lea, na toe fo’i uma ai loa tamaiti aoga i totonu o a latou potu aoga, peita’i e na o Ianeta lava e lei toe fo’i i totonu o lona potu aoga. Ina ua mae’a uma tamaiti i totonu o potu aoga, ma ua fa’amaonia fo’i ua le vaaia Ianeta, na pisi ai loa le fafine o Lucy e tau saili solo le teineititi poo fea ua alu i ai. Na te’i sei tamaloa o Meki i le tatagi o le telefoni a lona to’alua o Lucy ae le masani ai, ae na tau pe le fatu o le tamaloa o Meki ina ua fa’ailoa ane e Lusy ia te ia, “Ua leai se Ianeta, ua fiu e saili poo fea ua alu aga’i i ai”. Na ona uma mai lava o upu ia Lucy, nanati atu loa ma le tamaloa o Meki ua oso i lana ta’avale, ma aga’i sa’o atu loa i le fale o Mekala pe le maua atu i ai Ianeta, ae o le taimi fo’i lea ua ia fa’afesoota’iina ai ma lona to’alua ina ia la fetaui i le fale o Ianeta.

Comment Here