Ads by Google Ads by Google

E LE O OE O SE SULI MONI - Vaega XIII

Na vaaia e le Puleaoga se suiga i le pupula a le fafine o Mekala, o lea na ia tago ai loa i le telefoni ma fa’afeso’ota’i le faiaoga a Ianeta ina ia oo ane i le Ofisa se’i o latou talanoa, e lei umi ae ulufale le tama’ita’i faiaoga o Lucy i totonu o le potu aoga, ma ia vaaia ai se fafine o lo o saofa’i mai i le isi nofoa, ona fa’ailoa loa lea i ai e le Puleaoga ia Lucy le fafine o loo la talanoa, o ia lea o Mekala o lo o tausia le teineititi pologa o Ianeta. “Talofa Mekala, o a’u o le faiaoga a Ianeta. E le o mafai lava ona talanoa se isi ia Ianeta i le taimi nei, e le o i ai fo’i o ia i le potu aoga i le taimi nei, ae o loo togafitiina o ia i se tasi o falema’i i le taulaga, ona o tulaga fa’aletonu i lona tino, e mafua mai i le leaga o le fale o loo nofo ai o ia, atoa ai ma le fa’aletonu o ana mea’ai e ‘ai, e ui o loo mamafa ana galuega o lo o fa’atinoina i aso ta’itasi, ae sili pe a tuu mai ni nai aso se’i fa’amae’a gaioiga uma o loo faia e fa’atatau i lenei mataupu, ona toe logo atu ai loa lea o oe e fa’atatau i se fa’aiuga ua i ai”. O le fa’amatalaga umi lea a Lucy, peita’i e le’i talia e le fafine saua o Mekala, ona e i ai lona talitonuga, o i laua ma lona to’alua, o ni isi o tagata milionea fa’aaloalogia i le malo, sa tu’u mai i ai le vaavaaiga o meatotino uma a le aiga o Ianeta, atoa ai ma le avea o Ianeta ma pologa ia i laua.

 

Na motu fa’afuase’i talanoaga a i latou nei i totonu o le potu o le puleaoga ina ua tu’itu’i mai se tagata i le potu, ma tula’i atu ai loa le tama’ita’i faiaoga o Lucy ma tatala, ae ona vaaia ai lona to’alua o Meki o lo o tu mai i le faitoto’a ma lona toniga i lana galuega o loo galue ai i le malo, o le puipuia lea o aia tatau o tagata pologa i totonu o le atunu’u. “O a’u o Meki, o se tasi o ta’ita’i i le Ofisa e puipuia aia tatau o tagata pologa i le atunu’u, ma ua ou oo mai e su’esu’e le mataupu e fa’atatau i se teineititi pologa e igoa ia Ianeta e pei ona ripotia atu i le matou ofisa, e fa’apea le tala e le o lelei le tausiaina o ia e le aiga o lo o nofo ai”, o le talanoa atu lea a le tamaloa o Meki ia Lucy, e pei lava e le masani i ai, ona fa’aulufale loa lea e Lucy le tamaloa o Meki i totonu o le Ofisa, ma fa’aauau ai loa le talanoaga, aemaise ai le i ai ma le fafine o Mekala. “E fa’apefea ona tutupu nei mea e aunoa ma lo maua iloaina o se fa’aletonu o lo o tupu ia Ianeta”, o le fesili fia malamalama ane lea a le fafine o Mekala, ae na fa’ailoa i ai e Meki e fa’apea, “Sa ripotia mai e ni isi o le atunu’u se teineititi pologa o lo o ia fa’atinoina ni galuega mamafa ae ua pogisa le aso, o le mafua’aga lea na asia ai loa e le matou Ofisa le nofoaga e nofo ai lea teineititi, ma matou pueina ai ata uma o galuega ma gaioiga sa ia faia. Afai la e te fia malamalama atili i lenei mataupu, e sili pe a ta aga’i atu i le matou ofisa ta te talanoa ia, ona o lea ta te fa’alavelave i galuega a nai tama’ita’i faiaoga nei”, e fai lava tala a le tamaloa o Meki ma tu i luga ua savali i fafo ma le ofisa, ae mulimuli atu ai fo’i ma le fafine o Mekala ona toe fa’aauau ai lea o le la talanoaga i fafo, ma le lilo i le mafaufau o Mekala, o le ulugali’i tonu lea o loo laua tausia Ianeta i le taimi lea ma agalelei i ai.

 

“Se fa’amolemole lava lau susuga, e i ai la se isi auala e mafai ai ona e fesoasoani mai ia te a’u, ina ia mafai ai ona ma toe mafuta ma Ianeta”, na faliu mai i tua Meki ma fai atu i le fafine, “E leai se lava se isi gaioiga e mafai ona e toe faia, pau le laasaga lea ua aga’i atu i ai le matou Ofisa, o le vaavaai lea i ata uma ma fa’amaumauga sa matou aoina mai e fa’atatau i lenei mataupu, afai loa e fa’amaonia tulaga uma e pei ona taua, ona vaavaai loa lea i le tulafono pe i ai se vaega o le tulafono ua aafia, ona fa’atoa iloa ai loa lea iina o le isi laasaga e tatau ona faia, ae o le fautuaga mo oe i le taimi nei, fo’i i lou aiga ma mafaufau, ae tu’u ai pea Ianeta i le nofoaga o lo o i ai i le taimi nei”.