E LE O OE O SE SULI MONI - Vaega VI

Ina u mae’a le tala a Ianeta sa fai atu i lana faiaoga, na aapa atu le fafine faiaoga o Lucy ma uu mau lona lima ona ia fa’apea atu lea i ai, “Ianeta, ia e iloa, e le o oe o se pologa, afai e i ai se mea e tupu ia te oe, pe e te mana’omia fo’i se fesoasoani i soo se taimi lava, ia e telefoni atu ia te a’u, ou te fiafia e fesoasoani ia te ia”. Na luelue le ulu o le teineititi pologa ma ia aapa atu ua tatala le faitoto’a o le ta’avale, ona oso lea i fafo ma tete’e lona fa’amalu, ona savali loa lea aga’i i le fale, ae o lo o tu pea le ta’avale a le fafine faiaoga o Lucy ma vaavaai atu ma ona loimata i le savali ese atu o lenei teineititi pologa. Na aapa Lucy i lana telefoni ma vili lona to’alua e fa’amatala i ai ona lagona nutimomoia e fa’atatau i le la talanoaga ma Ianeta. O le mafatia tele o Lucy i luga o le telefoni, na fa’atonu ai loa o ia e lona to’alua e paka pea lana ta’avale i le vaega o le auala o lo o i ai, ae o lea o le a alu atu la te talanoa, e le’i umi ae taunu’u le tamaloa i le vaega o le alatele o loo paka ai le ta’avale a lona to’alua, ona ia fa’anatinati atu loa lea i le ta’avale ma ia fusimau si ona to’alua.

 

“Lucy, aisea ua e fa’apea mai ai i lenei aoauli, e le masani ona e telefoni mai ia te a’u ma e tagi mai i luga o le telefoni i ni taimi fa’apenei. Mai le tele o tausaga o le ta mafutaga, fa’atoa e telefoni mai lava pe a latalata ina ou manava, e fa’ailoa mai ua mae’a ona tapena le taumafaga o le afiafi, ae aisea lava ua e mafatia ai i lenei aoauli”, o le fesili atu lea a le tamaloa ia Lucy, ao ia fusi isi ona to’alua. Na taumafai le fafine faiaoga o Lucy e soloi ese ona loimata, ao ia taumafai e fa’amatala le mafua’aga ua ala ai ona mafatia lona loto, ona o le fa’amatalaga a Ianeta sa ta’u atu ia te ia e fa’atatau i le olaga pologa o lo o ola ai. “O ai Ianeta”, o le fesili naunau atu lea a le tamaloa i lona fiailoaina o lea tagata, ae na tali Lucy i lona leo tau le lagona ma le vaivai, “O Ianeta, o se tasi lea o teineititi fou o la’u vasega, e nofo i le fale lea e i luma atu o le pioga lea e fa’asaga mai i o ta luma”, o le tali atu lea a Lucy ma tusi lona lima i le vaega o lo o i ai le fale o Ianeta. Sa na o le fa’alologo o le tamaloa ao fa’amatala e Lucy tala’aga e fa’atatau i le aiga o Ianeta, ae o le itu e pito sili ona fa’amomoi loto ai, o le fa’amatalaga a le teineititi e fa’atatau i le fale lea ua avea nei ma ona fale e nofomau ai, o le fale sa fai ma fale e teu ai laau a lona grandmother i aso a’o soifua mai si olomatua, a’o lea ua fa’aaoga e le ulugali’i milionea lea ua tausia o ia e nofo ai mo lona olaga atoa.

 

“Lucy si o’u to’alua pele, ou te vaai atu ua e mafatia tele ona o Ianeta, ae ta’u mai poo le a se mea e te mana’o ou te faia mo Ianeta, ina ia te’a ai lagona mafatia o lo o ia te oe”, o le fesili fa’ataunau atu lea a le tamaloa ia Lucy, ae na tali le fafine faiaoga, e mana’o ia la faia se mea e sili atu ona lelei mo lenei teineititi pologa, ina ia ona lagonaina ai le mafanafana o le alofa fa’a matua i fanau.  Ao talanoa Lucy ma lona to’alua i luga o le alatele e fa’atatau ia Ianeta, ae o le taimi fo’i lea ua taunu’u ai le teineititi i luma o le faitoto’a o le pa, ona tu ai lea e fa’atali le taimi e matala ai le faitoto’a. Na vaaia e le fafine saua o Mekala ia Ianeta o loo tu atu i luma i le faitoto’a, ona ia savali ane loa lea ua oomi le ki e matala ai le faitoto’a, ma ulufale atu ai loa Ianeta ma aga’i sa’o atu loa i le tama’i fale o lo o nofo ai. “Iageka, a uma loa oga e ‘ai, oga vaai loa lea o le pa laau e vele ma fa’amama, o le faaiuga o le vaiaso e kaugu’u mai ai ofisa o le malo mo le faia o le asiasiga i le kogalaau aemaise ai o le fagua akoa”.

Comment Here