E LE O OE O SE SULI MONI - Vaega V

“ … o se olaga faigata ma pologa lea ua ou ola ai nei ae le’i masani mai ai lo’u olaga, ou te moe i loimata, alafa’i mai i loimata, e leai se fiafia ae na o le fa’anoanoa ma le ola pologa ma te fetaia’i i aso uma o lo’u olaga. Amuia se tama ma se teine aoga o loo i totonu o lenei potu aoga o loo ia lagonaina le mafanafana o le alofa i totonu o lona aiga. Amuia fo’i se tama ma se teine o loo i totonu o lenei potu aoga na te mauaina le fiafia i aso uma o lona ola, a’o a’u nei, e pei se avega mamafa taimi uma e tuua atu ai la’u aoga, e malu ifo lava le afiafi o fetaia’i pea ma feau mama ...”O le fa’amatala umi lea a le teineititi o Ianeta i luma o lana vaega fa’apea lana faiaoga, ina ua maua lona avanoa e fa’amatala ai lona olaga i totonu o lona aiga. Na leai ma se isi o le vaega na toe gagana i le taimi na mae’a ai le fa’amatalaga a Ianeta, ae ua na o le nonofo o tamaiti ma o latou foliga fa’anoanoa, ma latou vaavaai atu ia Ianeta o loo tu i luma o le vasega ma taumafai e solo ona loimata. Na fa’afuase’i ona tula’i i luga se tasi o teineititi o le vasega sa nofo i le pito lava i tua o le potu, ma savali atu i le pito i luma o loo tu mai ai Ianeta, ona ia fusi lea o le teineititi pologa ma musumusu atu i lona taliga, “Ianeta si a’u uo, aua e te loto vaivai, ia e loto tele ma fa’amalosi, o i tatou uma lava o pologa”. O se aso ese lea i totonu o le vaega, ina ua lolofi uma atu tamaiti i le pito i luma o le potu ma latou taumafai e pa’i atu ma fusi mai le teineititi o Ianeta, aemaise ai o le tu’uina atu i ai o fa’amatalaga e fa’alototele ai o ia.

 

O le tama’ita’i faiaoga o Lucy o lo o avea ma faiaoga a Ianeta, o se tasi lea o tama’ita’i meauli ua matua iloga lona tomai i auala e a’oa’oina ai fanau o lo o i ai mafatiaga o latou mafaufua, aemaise lava i latou o loo fa’apologa ma sauaina, ina ia maua e i latou le ola fiafia atoa ai ma le aveese mai o latou mafaufau mai faiga saua o loo latou fetaia’i i aso ta’itasi. Na ona tuua lava o le aoga i le aso lea, savali sa’o atu loa ma Lucy ua nofonofo mai i tafatafa o lana ta’avale, e fa’atali mai ai le gasolo atu o tamaiti aoga e o i latou aiga, e le’i umi ae ona vaaia loa ma le tama’ita’i o Ianeta ua savali atu, o lana ato fa’afafa i lona papatua, ma lana fa’amalu lanu enaena o loo u’u atu i lona lima, e fa’amalu ai mai le vevela o le la pe a fo’i i lona aiga. “Talofa Ianeta, e mafai ona ta talanoa mo se taimi puupuu”, na faliu Ianeta ma ia iloa atu ai lana faiaoga, le tama’ita’i o Lucy, ma ia tali fiafia atu i ai, e maua le avanoa la te talanoa ai. Ua oso Ianeta i totonu o le ta’avale, ona fai atu lea o Lucy i le teineititi, e sili pe a la ti’eti’e e momoli o ia i lona aiga ma la talatalanoa atu i luga o le ta’avale, e sili atu ai lena nai lo le la nonofo i le vaega o loo paka ai lana ta’avale ma la talanoa, ina ne’i tuai ai o ia i lona aiga. Ua alu le ta’avale a le faiaoga ma Ianeta, ma ua le masino se vaipanoa o le olaga pologa o Ianeta e lei oo i ai fesili ma su’esu’ega a Lucy, ona o lona fia malamalama atili lava i le aiga o loo nofo ai Ianeta, ae pe i ai fo’i se avanoa e mafai ai ona la o la te nonofo i lona aiga, ma avea ai Ianeta o tasi o lana fanau.

 

“Vaai oe Lucy, fa’afetai mo lou manatu mai, fa’afetai fo’i mo lou naunau e fa’ailoa mai lou alofa mo a’u, ae o le fa’amatalaga a lo’u matai, o le aso lava ou te alu ese ai ma laua, la te sailia ai a’u ina ia maua, ma auina atu loa a’u i se isi nofoaga o loo sili ai ona mamafa galuega e faia i tagata ma tamaiti pologa, ina ia ou nofo pologa ai, ae atonu e i ai lava se aso e mafai ai ona ta o i lou fale ta te tatafao ma ta eva ai”. Na ofo Lucy i le mamao o le nofoaga lea ua la oo i ai, ae le’i oo lava i le fale o Ianeta, ae ina ua oo atu le ta’avale i se tasi o togavao, na po po loa e Ianeta le lima o Lucy ma fai atu i ai, “Faiaoga, taofi le ta’avale ae tu’u a’u iinei, ou te savalivali i lo matou fale, aua o tua atu o le pa vao lea e sosoo ma le pioga e alu ai le auala i lo matou fale, ina ne’i iloa mai e lo’u matai le ta’avale o loo momoli atu ai a’u, ona avea fo’i lea ma se isi auala e fa’amamafa mai ai galuega ou te faia i lenei aso, ae fa’afetai i lou agalelei”.

Comment Here