Ads by Google Ads by Google

E LE O OE O SE SULI MONI - Vaega IX

Na vaaia e le tamaloa o Meki le to’a o le teineititi o Ianete i le taimi na la talanoa ai, o lana gagana ma le auala sa ia feso’ota’i atu ai ia te ia, na iloa gofie ai o ia o se teineititi e fa’aaloalo i soo se tagata. Na oomi e Ianeta le logo o loo i pipi’i i le fasitepu pito i lalo o le fale, a o tu le tamaloa o Meki ma vaavaai i ai, e le i umi ae fa’alogoina se leo o fa’apea mai, “O le a se mea e te mana’o i ai lou teineitiiti pologa”. Na ona mae’a lava o le tala lea a le fafine o Mekala, faapea atu loa ma le teineititi o Ianeta, “O lea lava lo’u matai, o lau auauna pologa lenei, ua ou fa’alavelave atu, ona o lo o i ai se ali’i Ofisa mai le malo o lo o fia talanoa atu ia te oulua”. E le i umi ni nai sekone ae fa’alogoina loa e le tamaloa o Meki ma le teineititi o Ianeta le pao mai o le sitepu o le fale, ua savali mai i lalo le fafine o Mekala, ae o le taimi fo’i lea ua toe fo’i ai Ianeta e fa’aauau ana galuega masani o le aso. “Talofa i lau susuga i le ali’i Ofisa o le malo, o a’u o Mekala”, o le fa’afeiloa’i atu lea a Mekala i le tamaloa o Meki, ona faafeiloa’i atu fo’i lea o le tamaloa o Meki i le fafine ma fa’ailoa atu i ai lona igoa, o lana galuega, ma le mafua’aga o lona soli atu o le lotoa, o le fa’atinoina lea o lana asiasiga i nofoaga eseese uma lava i totonu o le atunu’u o lo o fa’a faigaluegaina ai tagata pologa, ina ia mautinoa o lo o tusa ma ala o le tulafono le fa’a faigaluegaina o i latou.

 

A o talatalanoa atu Meki i le fafine o Mekala, na vaaia e Meki suiga i foliga o le fafine, e pei o se tagata ua le mautonu lona mafaufau, ma ua amata fo’i ona autilotilo solo le fafine i fafo i le vaega o le lotoa o lo o fa’atino mai ai galuega a le teineititi o Ianeta. “O lea ua mae’a la’u asiasiga i totonu o le nu’u atoa lenei e aofia ai ma le lua aiga, ua mae’a ona ou tapu’eina ata o galuega o lo o fa’atinoina e tagata pologa, o fale e nonofo ai, atoa ai ma ituaiga galuega o lo o latou fa’atinoina, ae mo le nofoaga lava lenei o lo o galue ai le teineititi pologa lea e to’atasi”, e fai lava tala a Meki ma tusi lona lima ia Ianeta o lo o pisi ane i le isi itu i le fa’atinoina o ana galuega, “ua mae’a ona tusia le ripoti ma pu’e ata e tusa ai o gaioiga uma ma mea sa ou molimauina, i totou o le vaiaso atoa lea sa fa’atinoina ai la’u asiasiga”, o le fa’amatalaga lea a Meki ma ia tauaao atu loa le kopi o lana ripoti lea ua mae’a ona tusia ma fa’atumu i le fafine o Mekala. “Tina, afai e i ai se mataupu e fia malamalama i ai oulua ma le Toeaina, poo se fesili fo’i e fa’atatau i la’u ripoti, ona feso’ota’i atu lea o a’u i le telefoni o lo o tusia i totonu o le ripoti, ou te fiafia ou te toe oo mai tatou te fa’asoa fa’atasi mo nisi o mataupu o loo fia malamalama atili i ai, ae o le a ou fo’i e fa’aauau la’u asiasiga i isi nu’u o lo o soo atu”, e fai lava tala a le tamaloa o Meki ma tu’u atu lona lima e fa’atalofa ai i le fafine o Mekala, ona ia savali ese loa lea. E faliu loa Meki o le a fo’i ae fetaui ma le oo ane o le teineititi o Ianeta ma le isi ana avega o lapisi e ave e tia’i, ona tu lea o le tamaloa ma fa’apea atu i le teineititi ma lona loto ua momomo, “Tama’ita’i, malo lava le galue”, ae na o le savali pea o Ianeta i le fa’atinoina o ana galuega masani.

 

O le taimi lava nna alu ese atu ai le ta’avale a le tamaloa o Meki, o le taimi fo’i lea na savali telea’i ai Mekala i luga o le fale ma fa’asoa i lona to’alua le la talanoaga ma Meki, atoa ai ma le pepa lea ua ia taulimaina. Na umi se taimi o fa’asoa le ulugali’i i le pepa sa tu’u atu e Meki, i totonu o le pepa, o lo o taua ai le sala o le la aiga i le mamafa o galuega o lo o la fa’apologaina ai Ianeta, e le o tusa lea ma tulafono e fa’a faiglauega ai tagata pologa i totonu o le malo. Ae o le itu e sili ona pologa ai, o le mamafa o galuega e fa’atino e Ianeta ae ua na o ia o se teinititi laititi. O le tulafono a le malo, o aiga milionea uma o lo o latou fa’a faigaluegaina pologa, latou te mauaina se vaega tupe tele mai le malo e fesoasoani ai i le tausiga o tagata pologa o lo o latou fa’a faigaluegaina, ae le fa’atagaina le fa’apologaina o fanau laiti.