Vaega 118

Na ona mae’a lava o le fa’atalatalanoaga a Leoleonana ma le fafine o Mekala i le aoauli lea, fa’atonu loa e le Ta’ita’i ia Meki lana vaega, ina ia alu loa se osofaiga i totonu o le fanua a le ulugali’i i le taimi lava lea, manu e le’i toe fo’i atu Mekala i lona aiga. Na pei o le emo o le uila le vavave o gaioiga a le vaega a Meki ina ua latou maua le fa’atonuga mai le latou Ta’ita’i. “Ia aga’i sa’o lava le osofaiga i totonu o le fale, saili uma mai ni fa’amaumauga o loo i ai e fa’atatau i tagata uli sa fa’apologa e le ulugali’i, ae vaai le isi vaega e aga’i sa’o lava i totonu o le fanua, taumafai e saili mai ni fa’amaoniga o le Tamaloa lea ua maua i ripoti o loo tanu i lalo o se tasi o laau tele lava i le tuaoi o le fanua. Afai e maua uma mai fa’amaumauga na, ona aumai lea se’i tau tu’u fa’atasi ai sa tatou ripoti e tuuina atu i le Ofisa o le Loia Sili, mo le talosagaina o se poloaiga mai le Fa’amasinoga e pu’e fa’apagota mai ai le ulugali’i lenei ae molia loa i faiga fa’apologa atoa ai ma le fasiotia o tagata uli i totonu o le malo”. Sa na o le fa’alologo o le vaega a Meki ao talanoa atu le tamaloa e fa’atatau i le gaioiga e tatau ona faia. E pisi le vaega mo le fa’atulagaina o le latou osofaiga ae o le taimi lea o loo nofonofo ai lava na o le fafine o Mekala i le potu malolo o le Ofisa o Leoleonana, ua le fia alu ese ona o le le mautonu o lona mafaufau  i se gaioiga e tatau ona fai.

E pisi le osofaiga a Leoleonana ae o le taimi lea o loo pisi ai fo’i le tama’ita’i o Ianeta ma lona to’alua o Laneselota i le tau fa’amautuina o le nofoaga fou lea fa’atoa mae’a ona tatala ai le ofisa Loia Tuto’atasi a le tamaloa o Laneselota i totonu o le taulaga. E fetaui le toe aga’i atu o Ianeta ma Laneselota i le ofisa Leoleo mo le pikiina mai o pepa e mana’omia mo le isi mataupu o loo tauaveina e Laneselota, ae fetaui loa ma le savali mai i fafo mai le ofisa o Leoleonana o le fafine o Mekala o loo tagi mai. Ua faigata ona iloa e Mekala o Ianeta lea o loo savavali atu ma lona to’alua, ona ua matua le tama’ita’i ma ua suia fo’i ona foliga. Na momomo le loto o le tama’ita’i i le alofa ina ua vaai atu i le savali mai o lenei Tina matua ona foliga fa’anoanoa. O lea na ia fesili atu ai loa pe ua i ai se mea ua tupu ua mafua ai ona mata fa’anoanoa.

“Tina, e foliga mai o loo i ai se mea matuia lava ua mamafa i lou loto ua mafua ai ona e mafatia. O e mana’omia se fesoasoani i lenei taimi”, o le fesili lea a Ianeta i le fafine o Mekala, ae ua na o le savali lava o le fafine e foliga mai e le o fia talanoa lava i se tasi. “Siaula, ta o muamua e piki mai pepa o loo mana’omia ona ta toe fo’i mai ai lea e fesiligia le olomatua pe manaomia se fesoasoani”. O le talanoa atu lea a Laneselota ia Ianeta, ma fa’aauau lava le la savavali faanatinati aga’i i le ofisa o Leoleonana, peita’i ina ua la toe fo’i ane, sa la fiu e tau autilo le olomatua sa la fesili i ai poo fea ua alu aga’i i ai. E lei toe fa’atali le ulugali’i ae ua la toe aga’i atu loa i le Ofisa mo le fa’aauauina o galuega o le aso.

Se’i o tatou liliu atu lava i le Falema’i tele lea o loo taofia ai le fafine meauli ma lana fanau e to’atolu ina ua fa’amaonia le a’afia o i latou i le siama e mafua mai i meaola. O le afiafi o le aso lava na maua ane ai e le tamaloa o Meki se tala fa’anoanoa, ua i’u lava ina maliu le tama a le fafine meauli lea na muamua taofia i le falema’i, ina ua siliga se fesoasoani mo ia, e mafua mai i le tele o masina talu ona maua o ia i le siama, ae sa le mafai e le fafine o Mekala ma lona to’alua ona fa’ataga o ia e ave i le falema’i. “Talofa i lau susuga a le Ta’ita’i Leoleonana, o le Ofisa lenei a le Falema’i tele a le malo i le taulaga, e fia fa’ailoa atu, o le afiafi nei lea na maliu ai le tama a le fafine meauli lea na auina mai mo togafitiga, ina ua siliga tali i seu se lavea’i mo ia, se’i vagana ai lona Tina ma isi tamaiti e to’alua o loo tau fao pea le vai ma le magalo ona o le matuia ma le mata’utia o aafiaga o le siama o loo a’afia ai i latou”.