Ads by Google Ads by Google

E LE O OE O SE SULI MONI

“O le a le uiga moni o lau tali, o lea e te fa’apea mai e leai, e te le i vaai i le Tama o le aiga, e te lei feiloa’i fo’i i ai”. O le isi lea fesili fa’a polofesa a le tamaloa o Meki ia Mekala, ae ua na o le nofo o le fafine ma le popole o lona loto. Na umi se taimi o nonofo Leoleonana faapea fo’i ma le fafine o Mekala e leai ma se isi na toe gagana. Ona tu lea o le tamaloa o Meki i luga ma savali i fafo o le potu, e le iloa e Mekala ma isi Leoleonana e to’alua o loo i totonu poo fea lea ua alu aga’i i ai le Ta’ita’i Leoleonana. Na ona savali atu lava o le tamaloa o Meki fa’asasa’o loa i le potu lea o lo o nonofo mai ai Ianeta ma Laneselota, ma ia talosagaina loa le ulugali’i ina ia fa’ata’alise atu i se fale’aiga lata mai e fa’atau mai ai sina mea’ai mo i latou atoa ai ma le fafine o Mekala, ona ua lagona fo’i le vaivai ma ua sau le fia ‘ai. Pe tusa o le 20 minute na aga’i ese atu ai Ianeta ma Laneselota e fa’atau ae toe fo’i mai iloa ma le taumafataga o le aso. E le i umi ae matala le faitoto’a o le potu, ma vaaia ai e Leoleonana ma Mekala ia Meki ua savali atu ma se afisiga fa’atau i ona lima. Ua tuu le isi taga pepa i luma o Mekala ae o isi taga pepa i luma o ana Leoleonana, ma le taga pepa e tasi i ona luma. Na ona uma lava ona fai e Meki o le tatalo mo le meaai, ona ia fa’apea atu loa lea, “E leai nisi upu, o tatou ua aai, ua lagona fo’i le vaivai ma le fia’ai ua alu le aso”.

 

Ua tau fai aai Meki ma ana Leoleonana, se’i vagana ai le fafine o Mekala o lo o nofo lava e le o ‘ai. “Mekala, e leai se mea e te popole ai fua, o lea ua fai le malologa, alo i le taumafataga”. O le talanoa atu lea a Meki ia Mekala, ma vaaia ai loa le aapa atu o le fafine i lana taga pepa ua toso fa’alatalata atu i ona luma, ona tatala lea ae amata ona ‘ai lana ipu mea’ai ma punou lava i lalo. O le latalata ina mae’a o le taligasua a le vaega i lea aoauli, na vaaia ai loa e Meki ma ana Leoleonana le amata ona maligi o loimata o le fafine o Mekala. E le i vave fa’alavelave Meki i foliga ua vaaia i le fafine, ae sa fa’aauau pea ona tali le sua a le tamaloa ma fa’afoliga na te le o amanaia le mea o lo o tupu. “Boss, e foliga mai e i ai se mea ua mamafa i le mafaufau o Mekala fua i le maligi o ona loimata”. O le musumusu atu lea a le isi Leoleonana ia Meki, ae na fa’aleano i ai le tamaloa ona e musu ina ne’i iloa mai e Mekala o lea o loo latou talatalanoa e fa’atatau i lana tagi lea ua tagi ai.

 

O le fai atu soo o le ali’i lea ia Meki, na mafua ai loa ona ea i luga le Ta’ita’i Leoleonana ma ia fa’apea atu loa, “Mekala, e i ai se mea e te fia talanoa mai ai ia te’i matou. Afai e i ai se mea ua e manatu e te fa’asoa mai, o le taimi lenei lenei e te fa’ailoa mai ai loa lena mataupu ina ia mafai ai fo’i ona matou iloa ma malamalama i ai”. Na vaaia le ea i luga o Mekala ona amata lea ona tau memu memu ona laugutu e pei o se tagata e le iloa tautala. Ua tau memu memu ai lava seia oo fo’i ona toe maligi ona loimata ma tagi, ma atili ai loa ona oso le inoino o le tamaloa o Meki. “Vaai oe Mekala, e le tatau ona e nofo ma oe le mataupu lena e te fia talanoa mai ai. O lea ua ou iloaina le mataupu lena e te tau memu memu mai ai. O la’u fautuaga, talanoa mai loa ma faailoa mai, manu o loo lava le taimi ina ne’i tuai ona fai lea ma lape o le tatou talanoaga i lenei aso”.

 

Na ona nofo sa’o lava o le fafine o Mekala i luga, amata loa ona ia talanoa atu ia Meki e fa’atatau i le fafine meaauli ma lona aiga lea o lo o latou nonofo. “E i ai se mataupu e fa’atatau i le aiga meauli lea o lo o matou nonofo ou te fia talanoa atu i ai”, o le tala tau le lagona lea a Mekala. Ae na pei o le a le oso atu o le tamaloa o Meki, e ala i le fa’aaoga o lona tomai fa’a Leoleonana ma fa’apea atu ia Mekala, “O lea ou te iloa le tala lena e te fia fai mai ai e fa’atatau i le fafine meauli. Ae ta’u mai loa ina ne’i fai ma avega i lou mafaufau”. “O le aiga lea sa sulu mai e fia maua se nofoaga e nonofo ai, ona ou tago atu lea ma talia lelei ma fa’anonofo i lo’u aiga ...”