E LE O OE O SE SULI MONI

Vaega 111

 

“Aisea na oti ai lou to’alua”, o le fesili atu lea a le isi Tausima’i i le fafine meauli, ae fa’auilavea loa le fafine o Mekala. “Aisea e te lua suesueina ai fua na mea e le oo i ai lo oulua malosi. Ia tapena ese loa ma o ese ma le fanua manu e lei taunu’u mai leoleo e aveese oulua”. O le tala muamua lava lea a le fafine o Mekala ina ua ulufale atu i totonu o le tama’i fale lea e nonofo ai le fafine meauli pologa ma lana fanau e to’atolu. “Siaula, o e faalogo mai i la’u fa’atonuga lea ua fai atu, tapena ese loa ma le fale ma o ese ma le fanua”. E leai ma se isi o Tausima’i na usita’i, ae sa na o le nonofo lava i lalo ma faaauau pea le la galuega o loo fai o le togafiti lea o le isi tamaititi meauli o loo ta’atia fa’agaulua i le isi tulimanu o le fale ma ona foliga ma’i. “Malie oe Tina, e le mafai ona ma tula’i ese ao lea e mafatia le fafine ma lana fanau. Na auina mai maua e le malo e fesoasoani i tagata mafatia e i ai lenei fafine ma lana fanau, ma ia mautinoa e puipuia le atunu’u atoa mai le aafia i le siama o le fa’ama’i oti lea ua amata ona pipisi i le atunu’u atoa”.

 

E lei uma lelei atu le fa’amatalaga a le Tausima’i ae aapa atu loa le fafine o Mekala ma fa’atu mai le isi o i laua i luga ma fai atu i ai, “Toe tasi lava la’u tala lea laa fai atu ia te oulua e te le lua usita’i, ona o mai loa lea o leoleo e aveese faamalosi oulua ma auina atu i se nofoaga e te lua lei oo muamua lava i ai”. E fai lava tala a le fafine saua o Mekala ma faatau pupula atu ona mata i Tausima’i, ae na o le nofo lava o le isi e leai ma se ano ane i ai, sei vagana ai le tama’ita’i tausimai lea na tu i luga ua amata ona fefe i folafolaga ma foliga saua o le fafine o Mekala lea ua faaali atu ia te ia. Ona ia punou lea ma fa’apea atu i lana paga, “O le tonu, e sili pe a ta tula’i ese ina ne’i a’afia atu ai o ta ola i lenei fafine saua”. Ae faapea ane le tali a le isi ana soa, “Afai o le a ta o ese, ae o le a faafefea le fafine meauli lenei ma lana fanau o loo manaomia se fesoasoani ona o le siama lea ua amata ona maua ai i latou”. Na tu tu le isi tausima’i ua le gagana, ua le mautonu lona mafaufau i le tonu o le a fai, pe solomuli ese pe fa’aauau pea ona la nonofo ai i le nofoaga lea se’i tau togafiti le tulaga fa’aletonu lea ua oo i ai le fafine meauli ma lana fanau.

 

E le i toe fa’atali le tausima’i o loo nofo i lalo, ae ua ia tago atu loa ma fa’atu i luga le fafine meauli ma lana fanau ma fai atu i ai, “O tatou lea laa o i le falema’i, e le tatau ona toe nonofo outou iinei”. E fai lava tala a le tama’ita’i tausima’i lea ma tago atu ua faatutu mai i luga le fafine ma lana fanau mama’i, ma amata loa ona latou savavali i fafo o le fale ma le fa’amoemoe e aga’i atu i le ta’avale. O le ita tele o le fafine saua o Mekala i gaioiga a tausima’i ia ua faia na mafua ai loa ona ee i luga ma tago atu ua vili lana telefoni, ma fa’apea ana upu i le telefoni, “O mai loa i le taimi lava lenei, ia aua ne’i toe tuuina se avanoa i tagata tagata fia ulavavale”. Na ona uma lava o le telefoni a Mekala, savali faanatinati atu loa i fafo o le fale ma taumafai e toso mai le fafine meauli ma lana fanau ma fai atu i ai, “O le aso fo’i lenei e maua ai ma le iuga o oe ma lau fanau. Seiloga e fasioti uma outou ma tausima’i nei ona fa’atoa outou iloa lea o le mea e ta’u o le usita’i i se faatonuga e tuuina atu. A o faia tauiviga a le tausima’i ma le fafine o Mekala i le tau faloina o lima o le fafine meauli ma lana fanau, ae fa’afuase’i loa ona vaaia le aga’i mai o ni ta’avale lanu uli solo atoa se 2 i totonu o le lotoa, ma aga’i sa’o mai lava i le nofoaga o lo o tu atu ai le ta’avale a tausima’i. Na ona tu lava o sipi lanu uli nei, tulioso loa i fafo ma ni ali’i e ofu uli soloatoa uma ma aga’i atu ua aveese mai tama’ita’i tausima’i e to’alua ma toso fa’anatinati loa i totonu o sipi. A o faia nei gaioiga, ae faafuase’i loa le vaaia o ni sipi lanu meamata se 3 ua ulufale mai fo’i i totonu o le lotoa. Na ona tu tu lava o sipi lanu meamata nei tuli oso loa i fafo ma ni ali’i e toniga leoleo nana ma a’upega i o latou lima.

Comment Here