E LE O OE O SE SULI MONI

Vaega 110

 

Pe tusa o le 20 minute talu ona aga’i atu i totonu Tausima’i ma le pepe, ae vaaia loa le toe aga’i mai i fafo, ua tulioso i le la ta’avale ma toe aga’i ese atu loa. Sa mulimuli atu ai loa ma le ta’avale a ali’i Leoleo nana ia e to’alua e fia iloa poo fea lea laa aga’i i ai le ta’avale. Na vaaia e Leoleonana le aga’i sa’o o le ta’avale i le nofoaga tonu lea o lo o lalafi mai ai Meki ma le isi a latou vaega, le nofoaga e aga’i i le fale o Mekala ma lona to’alua o Pulusi. E lei toe fa’atali le au ali’i ia ae ua la fetagofi atu loa i le uaealesi ma vili ai loa le latou ta’ita’i o Meki.

 

“Sole, o le a se isi tala mai e uiga i le ta’avale na tuli atu oulua e vaai”, o le fesili lea a le tamaloa o Meki. Ae na tali atu i ai le isi ana tama fa’amoemoeina. “O lea ua matou latalata atu i le nofoaga lena o loo outou lalafi mai ai. O le ta’avale lea na alu i le falema’i e momoli se pepe meauli na sii atu e tama’ita’i tausima’i e to’alua o loo i totonu o le ta’avale, ma o lea ua toe fo’i atu le ta’avale i le nofoaga o loo outou i ai”. Na luelue le ulu o le tamaloa o Meki ona toe fa’apea atu lea i le uaealesi, “Faalogo mai oulua, aua ne’i i ai lava se gaioiga e faia, tau lava o le mulimuli ma vaavaai ne’i te’i ua i ai lava se isi ta’avale e osofa’alava ane poo ni tagata fo’i e osofaia le ta’avale lena, ae tu’u pea le ta’avale a tama’ita’i tausima’i e agai pea i le nofoaga o loo la aga’i i ai”.

 

E latalata loa le ta’avale a tausima’i i le a’ega e alu ai le auala i le nofoaga e i ai le fale o Mekala ma lona to’alua, ae vaaia loa e ali’i Leoleonana e to’alua se sipi uliuli ua ala mu ane i o la tafatafa i se saoasaoa uiga ese, ae ina ua oo atu i tafatafa o le ta’avale a tausima’i, sa fa’afuase’i ona oso i le pito i luma le sipi uliuli lea ma foliga mai o lea ua ia taumafai e fa’alemu le o a ta’avale i luga o le alatele. Na vave ona tago le isi ali’i Leoleonana i le uaealesi ma faafesoota’i ai le la ta’iata’i o Meki, ma fa’ailoa i ai le tulaga e pei ona maitauina i le sipi uliuli, atoa ai ma gaioiga o loo faia i luga o le alatele.

 

“Aua le popole, ta’atia le sipi lena o lea la’a tuli atu le isi ta’avale e fa’afilemu, Mulimuli mai pea oulua i le ta’avale a tausima’i”, o le fa’atonuga lea a Meki i ana Leoleonana e to’alua, ma ia fa’atonuina ai loa le isi ana vaega o loo lalafi i le isi itu e le mamao ese mai i le itu o lo o aga’i atu ai miliga a le sipi ma le ta’avale a tausima’i ina ia fa’asalavei ma taofi mai le fa’alavelave i le latou misiona o lo o taumafai e fa’ataunu’u. Pe tusa o le 5 minute ae vaaia loa le aga’i mai o le isi ta’avale a le vaega a le tamaloa o Meki ma fa’afetaui le sipi uliuli ae fa’aauau ai pea le ta’avale a tausima’i atoa ai ma ta’avale a le isi sui o le vaega a Meki o loo mulimuli atu ai i tua. Na ona aga’i atu lava o le ta’avale a tausima’i tu i luma o le faitoto’a e ulufale ai i le fale o Mekala, ona oomi lea o le ki o le masini ma valaau e tatala mai le faitoto’a.

 

“O ai lea”, o le fesili mai lea a le tagata i luga o le masini, “O Tausima’i mai le falema’i tele a le malo, o lea ua ma toe fo’i mai sa ma o e momoli le pepe mo togafitiga a foma’i, ona ua matua aafia lava o ia i le siama o le fa’ama’i. Afai ae le faia se gaioiga vave i totonu o le fanua ma le lotoa i se taimi vave, e ono aafia atu ai ma oulua i le siama o le fa’ama’i fou lea ua pipisi i totonu o le fanua”. O le tali lea a le teine Tausima’i na mafua ai loa ona matala le pa ma la ulufale loa i totonu. E taunu’u atu le ta’avale ua leva ona tu mai le fafine o Mekala i luma o le malae e fa’atali le taunu’u atu o le ta’avale, peita’i na aga’i atu le ta’avale ma alu sa’o lava i le nofoaga o loo i ai le tama’i fale lea o lo o nonofo ai le fafine meauli ma lana fanau to’atolu. “Ao fea si a’u tama”, o le fesili ane lea a le fafine meauli i Tausima’i. “Aua e te popole, ua i ai nei lau tama i le falema’i, le nofoaga e pito sili atu ona saogalemu ai lona ola. Ae o le fesili, o ai uma tagata o le tou aiga”, ae na tali le fafine, “Toe lava o a’u ma la’u fanau e to’atolu o loo totoe, o lo’u to’alua ua oti ma o loo tanu i lalo o se tasi o laau tele lava i tua o le fanua”. E fetaui le uma atu o le tala a le fafine meaauli ae ulufale atu loa i totonu ma le fafine o Mekala.

Comment Here