E LE O OE O SE SULI MONI

Vaega 109

 

Na gata mai la tatou tala fa’asolo i le taimi lea na aga’i atu ai Tamaitai Tausimai i totonu o le lotoa o loo nonofo ai le ulugali’i o Mekala ma Pulusi, mo le faia o tui puipuia o tagata uma o loo nonofo i totonu o le lotoa lea, mo le puipuiga mai se tasi o fa’ama’i pipisi ua maitauina le a’afia ai o le to’atele o tagata o le aai i le taimi lea.

 

E tulioso loa i fafo Tamaitai Tausimai mai le la ta’avale ae la vaaia loa se fafine ua savali sa’o atu lava i le itu o loo paka mai ai le la ta’avale. Na ona taunu’u ane lava o le fafine lea, fesili loa i Tamaitai Tausimai poo ai i laua, ae na la faailoa i ai, o laua o Tausima’i mai le Falema’i tele a le malo, o loo ta’amilo mo le faia o tui puipuia mo tagata uma o le malo ina ia puipuia mai ai i latou mai le fa’ama’i oti o loo pipisi i le atunu’u i lea taimi. “Faamolemole lava, e mana’omia se fesoasoani mo a’u ma si a’u fanau e to’atolu o loo matou nonofo i le tama’i fale le la e tu mai, ua matua tigaina lava si a’u fanau, ae le mafai ona matou o atu i le falema’i”, o le augani atu lea a le fafine meauli lea i Tausima’i. E le i toe fa’atali Tausima’i ae ua fetagofi atu i a la ato ma mea uma e mana’omia mo togafitiga ma la aga’i faanatinati atu loa i le tama’i fale lea o lo o tu mai i le isi itu o le malae mo le ofoina atu o le fesoasoani.

 

E taunuu loa Tausimai i le faitoto’a o le tama’i fale o le a ulufale i totonu ae faalogoina loa se leo ua valaau atu. “eh, o ai ga fai aku e ke lua o aku i le fale lega”. Na tutu Tausima’i ma tau fai tepa mai i tua, ma la iloa mai ai se fafine tino maualuga ma ona laei e pei o se tagata tauaoloa o loo tu atu i tafatafa o le la ta’avale. Na ulufale le isi to’atasi o Tausima’i i totonu ma amata togafitiga, ae o le isi Tausima’i ua toe fo’i atu i le fafine lea o loo valaau ane. “Talofa, o i maua o Tausima’i mai le Falema’i tele a le malo ..” E lei uma atu le fa’amatalaga a le Tausimai ae oso atu le fafine o Mekala ma ona foliga saua, “Ia lua o ese gei lava ma kokogu o le lokoa magu e lei kupu se mea ia ke oulua. E lei faakagaiga oulua e ke lua sooga solia le fagua legei”. Na tali atu le Tausimai i le fafine ma fai atu i ai, afai na te teena le la galuega, e ono oo se faaletonu ia te ia ma lona aiga.

 

“Ou ke le popole poo ai ga mea e ke kau folafola mai e kukupu ia ke a’u, pa’u la’u kala, ia lua o ese loa ma le fagua i le kaimi lava legei”. Na ona uma lava o le fa’amatalaga lea a le fafine o Mekala, faliu loa ma toe fo’i i lo la fale, ae ua toe savali le Tausima’i i le tama’i fale lea o loo galue ai le isi ana paga i le togafitiina o le Tina meauli na alu ane mo se fesoasoani ma lana fanau. E fetaui le oso atu i totonu o le Tausima’i ae vaaia le aga’i mai i fafo o lana paga ma afisi mai se tamaititi i ona lima. “Ou te mana’o ta te faanatinati i le falema’i i le taimi lava lenei, afai e toe umi atu se isi taimi o i ai pea lenei tamaititi i le fale, e ono uma lona ola. Ua matua tulaga matuia lava aafiaga ua i ai lona soifua maloloina”. E fai lava tala a le Tausima’i lea ma savali faanatinati atu i le ta’avale, ua tatala le faitoto’a ae fa’ataoto ai i totonu le tamaititi ma’i, ma faanatinati atu loa i le falema’i.

 

E fai una nei gaioiga ae o loo mata’itu uma mai e le vaega a le tamaloa o Meki ma ana leoleo nana o lo o lalafi mai i tulimanu o le auala. Na ona ulufafo lava o le ta’avale a Tausima’i, fesootai atu loa ma Meki i le isi ana vaega e tuliloa le ta’avale ma vaai poo fea e aga’i i ai. Na mulimuli le ta’avale a Leoleo nana i tua o le ta’avale a Tausima’i, ma aga’i sa’o atu ai lava le ta’avale lea ma paka i luma o le vaega e aga’i atu i totonu o le falema’i gasegase tigaina. Na vaaia e ali’i Leoleo nana gaioiga a Tausima’i e to’alua, o lo o faanatinati e ave se pepe i totonu o le falema’i. Na faafesootai e Leoleo nana le la ta’ita’i ia Meki ma fa’ailoa i ai tulaga uma e pei ona la molimauina, atoa ai ma le fautuaga, e onosa’i laititi le osofaiga se’i vaavaai pea i gaioiga a Tausima’i o lo o faia.

Comment Here