Vaega 108

Na ona vaai atu lava o Meki o lo o fa’atuatusi uma meli o loo i totou o le pusa meli i le igoa o le fafine o Mekala, tago atu loa i lana uaealesi ma fesoota’i i le isi a latou ta’avale o loo paka mai i le isi tulimanu o le auala, e faailoa i ai le vaaiga lea ua ia maua. “O lea ua ou mauaina tusi o loo i totonu o le pusa meli, o loo faatuatusi uma i le igoa o Mekala, ma ua lava lea e ta’u mai ai, o loo nonofo pea Mekala ma Pulusi i totonu o le nofoaga lenei, ae tatau ona tatou matua mautinoa lelei e moni ma fa’amaonia masalosaloga, ina ne’i tatou osofaia le lotoa ae emo ane e ese tagata o loo nonofo i totonu o le fale”. O le talanoa atu lea a le tamaloa o Meki i lana vaega o Leoleo nana. Na umi se taimi o tu le tamaloa ma uu i lona lima tusi sa i totonu o le pusa meli o loo i luma o le pa, ona ia toe tuu lea i totonu ma savali atu i lana ta’avale ma nofonofo ai. E lei leva ae faalogo atu ua fesootai mai lana vaega i le uaealesi. “Meki, o lea ua ou vaaia ni tagata o loo feoa’i mai totonu o le lotoa. E le o kilia la’u vaai poo ai ae foliga mai o se ulugali’i o loo savavali i totonu o le lotoa. O tua atu o le fale o loo feofeoa’i ai le ulugalii i luma, o loo tu mai ai le isi fale tele lava, e foliga mai o loo tu ai ni Van lanu uli soloatoa i luma ae leai ni tagata o o’u iloaina atu i lea fale”.

O lea ua vavae tolu le vaega a le tamaloa o Meki, ua ta’i to’alua i latou i le vaega. O le isi vaega o loo paka i luga o le isi tulimanu o le pa o le fanua sa nonofo ai Mekala ma lona to’alua, o le isi vaega o loo i totonu o le ofisa, ma le vaega a le tamaloa o Meki o loo i luma o le faitoto’a e ulufale ai i totonu. Talu ai le naunau tele o Meki na te fia maua se faamaoniga o loo nonofo pea Mekala ma lona to’alua i totonu o le lotoa, na ia fesoota’i atu ai loa i le ali’i foma’i o Lavi, le tuagane o le tama’ita’i meauli o Ianeta lea ua avea nei ma ona afafine, ma ia talosagaina i ai se fesoasoani, i se auala e mafai ai ona aga’i atu ni tama’ita’i foma’i i totonu o le lotoa e faafoliga o loo faia se asiasiga i nofoaga o tagata matutua, ina ia mautinoa ai o loo i ai Mekala ma lona to’alua i le nofoaga tuai lava lea. Na ioe le ali’i foma’i o Lavi ma ia talia ai loa le talosaga a Meki, ma ia faatonuina ai loa ana tama’ita’i tausima’i e to’alua ina ia aga’i atu i totonu o le lotoa e fa’afoliga o loo faia sa latou asiasiga i tagata matutua, ina ia faamaonia ai poo ai o loo nonofo i totonu o le lotoa lea.

E malama ane loa le taeao o le aso na sosoo ai, pe tusa o le itula e 9:00, ae taunuu loa le ta’avale a tama’ita’i tausima’i e to’alua i luma o le faitoto’a e ulufale ai i le lotoa, ma la oomiina loa le ki e fesoota’i atu ai i totonu o le lotoa. “O ai lea fa’amolemole”, o le tali ane lea a le tagata o loo i totonu o le lotoa. “O a’u o se tama’ita’i tausima’i mai le Falema’i a le malo, e fia ulufale atu mo le faia o se asiasiga i tagata o loo nonofo i totonu o le lotoa, ina ia mautinoa ua faia a latou tui puipui mai se tasi o fa’ama’i oti o loo matua pipisi lava i totonu o le malo i le taimi nei”. O le tali atu lea a le tama’ita’i tausima’i, ma faapea mai ai loa ma le tagata, “Matou te le mana’omia ni tui puipui, e leai fo’i se isi o i matou o maua i se ma’i”. Na ona uma lava o tala a le tagata lea tapuni loa ma le telefoni, ma faigata ai ona toe fai atu se isi fa’amatalaga a le tama’ita’i tausima’i. Na toe oomi e le tama’ita’i tausima’i le ki ma toe faapea atu i le tagata o loo tali mai i le isi itu, “Afai e le taliaina le talosaga, e ono avea lea ma itu e faasala ai e le malo lo outou aiga, i lo outou le taliaina o le poloaiga mai le Ofisa o le Soifua Maloloina”. E lei toe tali mai le tagata, ae na fa’afuase’i ona matala le faitoto’a o le pa ma faatonuina ai loa tama’ita’i tausima’i ina ia ulufale atu i totonu. Na aga’i atu le ta’avale ma paka tonu lava i luma o le fasitepu e aga’i atu ai i le fale o le ulugali’i o Mekala ma Pulusi. E lei umi ona paka le ta’avale a tama’ita’i tausima’i ae la vaaia loa le aga’i ane o se fafine ia tei laua.