Vaega 107

O le tuana’i ai o le tausaga talu ona tu’u fa’atasia le aiga o Laneselota ma le tama’ita’i pologa ia Ianeta e ala i le fa’aipoipoga, na mae’a aloaia ai loa suesuega sa gafa ma le Ofisa Suesue o lo o galue ai le tamaloa o Meki, i le suesueina lea o le mataupu e fa’atatau i le fa’alavelave lea na ave faapagota ai Ianeta ma faapologa i le motu o tagata pologa i totonu o le malo. Ua sailia nei e Leoleo Nana le fafine o Mekala ma lona toalua o Pulusi, o i laua ia ua faamaonia lo la taupulepule e fa’atino le solitulafono o le ave faapologa o tagata ina ia faia i ai galuega mamafa ma sauaga. O le taeao po lava o le taeao o le aso Sa i se tasi o vaiaso, ae taunu’u loa Van uli a Leoleo Nana a le tamaloa o Meki i luma o le pa o loo siomia ai le fale o le fafine o Mekala ma lona to’alua, ma le fa’amoemoe e pu’e fa’apagota mai i laua. E taunu’u atu Leoleo o loo loka le pa e ulufale i totonu, ona taumafai lava lea e saili se auala e matala ai le pa peita’i ua tuai lava. E latalata loa i le itula e 8:00 i le taeao lava lea, ae vaaia loa e Meki ma lana vaega le aga’i ane o se ta’avale mai le itu i sasa’e o le motu ma afe tonu atu lava i luma o le pa. Na vaaia e Leoleo se ali’i pa’epa’e e laei mama ua oso i fafo ma le ta’avale, ona ia tatala lea o le pa ma le fa’amoemoe e ulufale ai lana ta’avale i totonu.

“E i ai se mea tou te mana’omia”, o le fesili atu lea a le ali’i paepae lea ma lona leo e pei e fia malosi i ali’i Leoleo. Na savali ane Meki  ma faailoa i le ali’i lea i latou atoa ai ma le mafua’aga o le latou i ai i luma o le pa. “E i ai le mataupu taua matou te fia talanoa ai ia Mekala ma lona to’alua o Pulusi”. O le talanoa atu lea a Meki i le ali’i Leoleo lea. Ae na lulu le ulu o le ali’i lenei ma faapea atu. “E leai ni tagata faapena e nonofo i le fale. O le fale lea matou te nonofo ai ma lo’u aiga”. “O ai lou aiga ae o ai fo’i oe”, o le toe tuli tatao ane lea o le fesili a Meki i le ali’i lea, ae na tu le ali’i ma fa’apea atu i Leoleo, “O a’u o se ali’i tusi ata i totonu o le malo, sa ou fa’atauina mai lenei fale mai se ulugali’i milionea matutua lava sa nonofo iinei i le aai, e i ai fo’i a laua fale e tele i isi vaega o le aai, ae ua la filifili e fa’atau ese mai ia te a’u le la fale lenei i se tau taugofie”.

Na vaaia e le ali’i paepae lea le tu o le tamaloa o Meki ua le gagana, ona ia toe fa’apea atu lea, “E te iloa o fea se vaega o le aai lenei ua malaga atu i ai il aua”, o le toe fesili atu lea a Meki, ae na tali le ali’i lea, “Faamalie atu ou te le iloa”. E fai lava tala a le tagata lenei ma oso i totonu o lana ta’avale ma aga’i ese atu loa, ae o Meki ma ana Leoleo nana, ua na o le tutu ma au tilotilo i le aga’i ese atu o le ta’avale a le tagata lea i totonu o le lotoa. “E le mafai ona tatou ulufale i totonu o le lotoa pe afai e moni e le o toe nonofo Mekala ma lona to’alua i le fale lenei, ua tatau ona fa’anatinati a tatou sailiiliga manu e lei tuai”. O le talanoa atu lea a Meki i lana vaega ma latou toe aga’i ese atu loa mai le nofoaga lea. O le afiafi o le aso lava lea na faia ai loa le tonu a le tamaloa o Meki i lana vaega, o le a vaevae le latou vaega e vaega e 3, ta’ito’a 2 i le vaega, ina ia mafai ai ona taape solo i le tau sailiina o le ulugali’i leaga lenei. Ua tuana’i le masina talu ona tau saili e Leoleo nana le ulugali’i. O le masalosalo tele o le tamaloa o Meki i le la talanoaga ma le ali’i lea sa la talanoa, na ia manatu ai e toe fia alu lava e asi le fale pe moni lava ua le o toe nonofo ai le ulugali’i o loo tau sailia nei. E fetaui lava le taunu’u atu o Meki i luma o le faitoto’a e ulufale ai i le lotoa ae alu ese mai loa ma le ta’avale a le ali’i kiliva meli, ae tu’u ai meli i luma o le pusa meli a le ulugali’i. Na faanatinati atu Meki ma tatala le pusa meli ae aumai tusi o loo i ai e siaki poo ai o loo fa’atuatusi mai ai, ae na te’i ina ua vaai atu i le pito i luma o le tusi, o lo o fa’atuatusi mai ia Mekala.