Ads by Google Ads by Google

E LE O OE O SE SULI MONI

Vaega 106

 

Na faigata ona toe lagona se isi upu o le lauga a le tama’ita’i o Ianeta i le tau pai pati pati o lima o tagata uma na auai i totonu o le fale, i le fiafia tele ina ua latou fa’alogo atu, o Ianeta lea ua tofia e le ali’i milionea ia Laneselota e fa’auluulu i ai le polokalame mo isi tausaga e tele i le lumana’i, ae sili ai i lo lena, o Ianeta o se tagata uli e pei lava fo’i o i latou, ma atonu o le a faigofie ai ma tele isi auala e maua ai e aiga uli matitiva fa’amanuiaga mai lenei polokalame o lo o fa’atupe ma pulea e tagata milionea o le aai. Ua fa’agasolo le tufatufaina o meaalofa mo tagata matitiva sa mafai ona faatasi atu i lea aso. E le gata o meaai, lavalava ma meainu, ae ua oo lava fo’i i tupe ua tufatufa atu mo tagata matitiva. Sa na o le tutu to’alua o Laneselota ma Ianeta i le pito i luma o le fale, ma matamata i le lolofi atu o aiga matitiva ma talia a latou meaalofa ma le agaga fiafia. E oo lava fo’i i tamaiti laiti, ua le iloga se mea e gata ai le fiafia ona o meataalo ua latou maua, o lavalava ma seevae mo i latou.

 

“Faafetai Laneselota ma Ianeta mo lo oulua alolofa, atoa ai ma le naunau ina ia fa’aauau pea lenei polokalame mo i matou tagata matitiva”, o le fa’afetai lea a se tasi o Tama matua ina ua mae’a ona tauaao meaalofa mo lona aiga, ona ia savali ese atu lea i fafo ma aga’i atu loa ma lona to’alua ma le la fanau i lo latou aiga. E te’a atu isi aiga matitiva ae aga’i atu isi ma fa’aleo le agaga lava e tasi o le fa’afetai ia Laneselota ma Ianeta, ona o le manatu alofa i tagata uli o lo o tau atina’e o latou aiga. Ina ua aga’i ina mae’a le fa’amoemoe, na savali atu ai loa Laneselota ma talanoa i le Peresetene o le Asosi o lo o tu’ufa’atasia le polokalame, mo le fa’atulagaina o le isi polokalame e sosoo ai, ae ua savali atu Ianeta i le isi itu o le fale ma feiloa’i atu i tamaiti o lo o taaalo fiafia ai ma a latou meaalofa na maua mai i le polokalame. E oo atu loa Ianeta i le faitoto’a e ulufale atu ai i fafo i le vaega o loo taaalo ai tamaiti ma a latou meaalofa, ae ona faalogoina loa se tagata o valaau atu fa’apea, “Faafetai mo upu faalaeiau mo i matou i lenei aso”. Na tu Ianeta ma faliu i tua e vaai poo ai lea o loo talanoa atu ia te ia, ae na te’i le tama’ita’i ina ua tau atu lana vaai, o le tama’ita’i tonu lava lea na ia tusia le ie sa faapipii i luma o le faitoto’a e fa’asa ai tagata uli ona ulufale i totonu o le fale.

 

Na ona iloa atu lava e Ianeta o ia tonu lea sa valaau ane ia te ia, faliu loa ma le tama’ita’i ma toe savali ane i ai ma fusi ia te ia ma faapea atu i ai, “Faafetai fo’i mo lau galuega alofa o loo faia mo nai aiga lima vaivai. E ui e faigata i nisi taimi ona tatou manatu e fai ni mea lelei mo nai aiga faapenei, ae tatau lava ona tatou fa’atino mea tonu e ao ona faia mo i latou”. E talanoa atu lava Ianeta ae na o le tu lava o le tama’ita’i lea e aunoa ma se tupu na gagana ane ai. Ua vaaia e Ianeta foliga fa’anoanoa o le tama’ita’i lea, ona ia pa’i atu lea i lona tauau ma faapea atu i ai, “Aua e te toe mafaufau ananafi, ae avea mea sa tutupu ananafi e fau ai ni mea lelei mo taeao”. Sa na o le luelue o le ulu o le tama’ita’i lea ma fa’apea atu i le tama’ita’i isi ona leo tau le lagona, “Vaai oe Ianeta, ua ou lagona lo’u sese i le mea sa tupu, ae ua avea lau lauga i lenei taeao ua toe faamalosia ai lo’u loto ma ou iloa ai, e sese o’u mafaufauga sa i ai. Ae atonu o le a avea ni fa’aletonu sa ou faia o se auala e tula’i mai ai ni mea lelei mo lenei aai aemaise ai o tagata uli uma o loo i lalo i lenei polokalame”.