Vaega 105

Na maligi loimata o le tama’ita’i o Ianeta ao la talanoa ma le fafine meauli i totonu o le fale o lo o fa’agasolo ai le polokalame e tufa ai meaalofa mo tagata matitiva. O le afa o tagata matitiva lea ua tau fai lolofi atu e fia maua ni meaalofa mai le Faalapotopotoga o tagata milionea nei, o tagata uli mai nofoaga eseese o le atunu’u. O ni isi o aiga ua masi’i uma atu ulugali’i ma fanau, ma ua filogia uma totonu o le fale i manogi eseese o tagata umi, ae ua atili ai i le fetagisi o a latou fanau ma tamaiti laiti e oo lava i pepe. “Aisea lava ua fa’atatau ai lenei fa’asilasilaga ia te oe, ae le se’i vaai mai i le lalolagi o tagata uli ia ua lolofi mai e talisapaia meaalofa mai le polokalame”, O le fesili fia iloa lea a le fafine meauli lenei ia Ianeta, ae sa na o le tu tu o le tama’ita’i ua le gagana, ma ona loimata e le o matu i le mafatia o lona loto.

Na motu fa’afuase’i le talanoaga a le to’alua lea ina ua la fa’alogoina le tau fai pati pati ma feei mai o tagata i le pito i luma, ona la tau fai tepa lea e fia iloa le mafua’aga o le pisapisao o tagata, ae na tete’i ina ua la vaaia le ali’i o Laneselota o loo tu i luga mo lana lauga. Na eu e le fafine meauli lea le lima o Ianeta ma fai atu i ai, “Aua e te toe pisa ae fa’alogo fa’alelei i upu o le tautalaga a lau manamea”, Ua tau fai lologo taliga o tagata uma, ua leai fo’i se isi e toe gase, ae ua na o le fa’alologo i le fia iloa poo le a se fa’amatalaga mai le ali’i milionea o lo o autu i ai le saunoaga o le aso.

“O le polokalame lenei ua silia ma le 20 tausaga o fa’atupe mai e o’u matua, o i laua o ulua’i tagata milionea i le atunu’u. I le 5 tausaga talu ai ina ua ou tula’i mai e fa’aauau lenei auaunaga taua sa amata mai e o’u matua, sa ou fa’aopoopoina ai se vaega tupe tele e fai ma meaalofa mo tagata matitiva, ina ia mautinoa e tofusia uma i latou i meaalofa mai le Faalapotopotoga. O le tausaga lenei ua ou manatu ai, o le a aveese mai lo’u igoa mai le ta’ita’iina o le polokalame, ae ua suia i le igoa o la’u manamea ia Ianeta, o ia lea o le a fa’auluulu i ai le fa’afoeina o lenei polokalame atoa”.

Na tau fai pati pati le aofia ma tau fai autilo uma i tua poo fea o loo tu atu ai Ianeta. Na talo mai le lima o le ali’i o Laneselota i lana manamea e aga’i atu i luma mo sana saunoaga. Na matua faateia Ianeta i le avanoa ua ia maua, ae na musumusu atu i ai le fafine meaauli o loo la tutu fa’atasi, “Siaula, o lou avanoa lenei e fa’ailoa ai i tagata papa’e o loo vaai maualalo ia te oe, e fa’aeaina lava e le Atua le tagata loto maualalo ma le agamalu”.

Ua savali atu Ianeta ma lona le mautonu poo le a sana tala e fai i luma o le aofia. O le taimi lava na tu ai i luma o le laulau, na tau fai feei uma ai tagata matitiva uli o loo nonofo i le pito i luma o le laina ma alalaga atu i le igoa o le tama’ita’i, ona o le agaga fiafia ina ua i ai se tagata o le latou lanu na te ausia lenei ituaiga matati’a fa’apenei i totonu o le malo. Na taumafai Ianeta e fa’afilemu tagata uma mai le pisapisao, ona fa’atoa maua ai loa lea o lona avanoa. Sa ia fa’afetaia si ana manamea o Laneselota mo le avanoa taua, ae faapitoa ai lana fa’afetai i le Komiti ma le Faalapotopotoga sa latou fa’avaeina mai lenei polokalame, lea ua mafai ai ona faamanuiaina tagata matitiva i meaalofa eseese.

“O lo’u agaga atoa i lenei polokalame, ia avea lenei sootaga i le va o tagata umi ma tagata papa’e milionea, o se auala e aveesea ai le faailogalanu ma le vaai maualalo i tagata uli i le olaga mativa ma le le tagolima o loo i ai, a ia avea i tatou uma o tagatanu’u e tutu fa’atasi mo le manuia o lenei aai ma lenei atunu’u”.