Ads by Google Ads by Google

E LE O OE O SE SULI MONI

Vaega 104

 

Na fiu Laneselota e fa’atali se tali mai le tama’ita’i Failautusi, ae ua na o le tu o le tama’ita’i na punou i lalo. O le manumanu o le ali’i o Laneselota i le ta’uleleia o lona igoa aemaise ai o le alofa i le to’atele o matua ma fanau o lo o fa’atali mai i totonu o le Faletele lea ua faamoemoe e faia ai le Faatasiga i le aso lea, na ia manatu ai loa e taofi ana fesili i le tama’ita’i Failautusi. “Laneselota, susu mai loa ma lau manamea tatou aga’i atu i totonu, e le o toe umi se taimi ae amataina loa le tatou polokalame i lenei taeao”. O le talanoa atu lea a le Peresetene o le Mafutaga o loo fa’atautaia le polokalame ia Laneselota, ae o le ali’i milionea i le taimi lea, o loo tau autilo Ianeta sa tu mai i luma o le ta’avale, ua le iloa poo fea ua toe savali atu i ai. E lua loa la’a a Laneselota o le a savali i totonu o le Faletele o loo faia ai le mafutaga, ae tau atu loa lana vaai ia Ianeta o loo tutu to’alua mai ma le isi Fafine meauli i le isi tulimanu o le Fale. Ona savali telea’i atu loa lea o le ali’i ma popo le tauao o si ana manamea ma musumusu atu i ai, “Ianeta, o a’u lea la’a matou o i luma ma le Peresetene i le ta’ita’iina o le polokalame, ae a mae’a le lua talanoaga ona e aga’i atu lea i luma e saili ai sou nofoa i le pito o loo sosoo ma le vaega o le a matou nonofo ai”. Na lue atu le ulu o Ianeta, ma ia sogi atu i le alafau o lana manamea ma fa’apea atu i ai, “Ia manuia lau lauga i lenei taeao”.

 

E savali ese atu Laneselota ae faliu atu Ianeta ua toe fa’aauau le la talanoaga ma le Fafine meauli o loo la tutu to’alua. O le Fafine meauli lenei, o le isi lea aiga o lo o aofia i le lisi o aiga matitiva ua faamanuiaina i le polokalame o lo o fa’atautaia e le Asosi e fesoasoani ai mo tagata matitiva i totonu o le aai, lea e fa’atupeina uma e aiga milionea o le malo, ae ta’ita’i ai matua o le ali’i o Laneselota. Na faamatala e le Fafine meauli lenei ia Ianeta e fa’apea, na matua faateia lava o ia ina ua tau atu lana vaai i le ie o loo tusia i luma o le faitoto’a o le Faletele, fai mai e le fa’atagaina i totonu ni tagata meauli. “Ina ua tau atu la’u vaai i faaupuga o loo tusia i le ie, sa ou tu mo ni nai sekone, ona ou faliu loa lea o le a ou toe fo’i i le faitoto’a o le pa, ae fa’afuase’i loa ona valaau mai se tama’ita’i ia te a’u ma fai mai, ou te ulufale pea a’u i totonu, e le o a’u lea e fa’atatau i ai le faaupuga o loo tusia i luga o le ie”. Sa na o le punou o Ianeta ao fa’amatala e le Fafine meauli le mea sa tupu. “Ao o’u nofonofo i luga o lo’u  nofoa ma ou vaavaai atu i fafo, ae tau atu loa la’u vaai ia te oe o loo e tu mai i luma o le ta’avale, o le mafua’aga lena na ou savali atu ai loa i fafo ma ou valaau atu ia te oe e te sau ta te talanoa, ina ne’i tau lau vaai i le ie ona e manatu lea o oe o lo o fa’atatau i ai, ae atonu o se isi tagata o lo o fa’atatau i ai lenei ie”. Na vaaia e le Fafine meauli lenei le maligi o loimata o Ianeta, ona ia fesili lea i le tama’ita’i pe i ai se mea o tupu ua mafua ai ona ia mafatia, ae pe na te iloaina fo’i se tagata meauli o lo o fa’atatau i ai tusitusiga o loo i luga o le ie lenei.

 

“Vaai oe Tina, o a’u tonu lava lea o lo o fa’atatau i ai tusitusiga o loo i luga o le ie, o le mafua’aga lena o le mafatia o lo’u loto i lenei aso, ona e le o mafai lava ona tineia le fa’afitauli o le fa’ailoga lanu i totonu o lenei atunu’u aemaise ai fo’i lenei aai”. Sa na o le faalologo o le Fafine meauli ao fa’amatala e Ianeta o ia, atoa ai ma le le mafutaga ma le ali’i milionea o Laneselota, atoa ai ma le mafua’aga na ala ai ona tusia e le tagata faaupuga o lo o i luga o le ie. Na oo lava fo’i le fa’amatalaga a Ianeta i le Fafine meauli lenei i le amataga o lona olaga, atoa ai ma le taimi na fa’atamafai ai e ona matua o Meki ma lona to’alua faiaoga ia Lucy o ia e avea ma la tama. Ina ua mae’a ona fa’alogo ma le toto’a le Fafine meauli, sa ia tago atu ua uu mai lima o Ianeta ma fai atu i ai, “Vaai oe Ianeta, tusa lava poo a tala a tagata, ia e manatua le mea lenei, o oe lava o le suli moni i totonu o le aiga o Meki ma Lucy”.