Ads by Google Ads by Google

E LE O OE O SE SULI MONI

Vaega 102

 

“A o fea Ianeta la’u pele”, o le fesili lea a Laneselota i lana auauna, ae na fofola mai lima o le auauna ma fa’apea atu i le ali’i milionea, “Sa oulua savavali fa’atasi atu lava ma Ianeta, e le i toe fo’i mai o ia i le ta’avale.” Na avea le fesili a Laneselota ma itu na iite ai auauna, ua i ai le mea ua tupu. E oo fo’i i foliga o le ali’i milionea, ua lava lea e ta’u atu ai o loo i ai se fa’aletonu o loo tula’i mai, ona pisi ai loa lea o auauna e saili Ianeta ina ne’i avea ma itu e tula’i mai ai se fa’aletonu i lo latou Matai. I luma tonu lava o le faitoto’a e ulufale atu ai i totonu o le lotoa o loo fa’atinoina ai le mafutaga tele lenei, e si’omia i se pa laau matagofie lava ua uma ona teuteuina, ma o lo o i ai fo’i vaega e masani ona aga’i atu i ai tagata tafafao ma maimoa ai i le matagofie o vai puna o loo fa’aaoga e pamu mai ai le vai e fa’asusu ai le togalaau. O iina tonu lea na iloa atu ai e auauna Ianeta o loo fealualua’i mai ai ma matamata i le togalaau. “Talofa Ianeta, ou te vaai atu ua manaia lau maimoaga i le matagofie o le matala mai o fuga o laau,” o le talanoa atu lea a se tasi o auauna. Na te’i Ianeta ma faliu i tua, ona ia iloa atu lea o le auauna a Laneselota. Ua ata le tama’ita’i ona faapea atu lea o lana tala, “Ioe, e mafai e fugalaau ona momoli mai lagona ma manatu fou, e fesoasoani ai i le loto o le tagata ua mafatia, e mafai fo’i ona toe fa’afouina ai le malosi, o le isi lena aoga o laau na faia e le Atua i le foafoaga o le lalolagi.” Ua tali e Ianeta ma le auauna, ona fai atu lea o Ianeta i le auauna e alu atu la te talatalanoa mo sina taimi, ona fa’aauau ai lea o le la savaliga. E lei vave fesiligia e le auauna le tama’ita’i i le mafua’aga ua fealualua’i to’atasi ai na o ia i le fa’atoaga laau, peita’i o lagona fa’anoanoa ma le mafatia, na vave ai ona tatala a Ianeta le avanoa e fa’asoa ai ona manatu mo se fesoasoani. Sa na o le nofo o le auauna ma fa’alogologo ao talanoa Ianeta e fa’atatau i le manaia o lagona tutupu i lona loto e fa’atatau i le masaniga ma Laneselota, ae i ai fo’i lona talitonuga, o loo i ai lava nisi o tama’ita’i o loo taumafai e fa’aleaga le la mafutaga ma lana uo.

 

“O le a le uiga o lau saunoaga Ianeta, o ai o loo taumafai e fa’aleaga i le lua mafutaga. O loo fa’atali mai Laneselota i le ta’avale ma ona lagona popole poo fea ua e aga’i i ai, o le ala lena o lo’u oo mai, se’i tau saili oe i lenei itu o le fanua.” Na motu fa’afuase’i le talanoaga ina ua fa’alogo atu Ianeta i le molimau a le auauna, o Laneselota o loo fa’atali mai i le ta’avale, ae sa i ai le manatu o le tama’ita’i, o le taimi lea ua tatau ona i ai Laneselota i totonu o le fale mo lana saunoaga autu o le fa’amoemoe. “E sili ai loa pe a ta fa’anatinati atu i le ta’avale.” Na faailoa e le tamaitai i le auauna le mafua’aga o le mafatia o ona lagona, ona o tusitusiga o loo tusia i luma o le faitoto’a e fa’atatau ia te ia, o iina foi’ lea ua ia mautinoa ai e i ai tagata o loo taumafai ina ia fa’aleaga le la mafutaga ma Laneselota. E a’e a’e atu loa Ianeta ma le auauna i le isi itu o le a’ega, ae o la vaaia loa Laneselota o loo savalivali atu na o ia ma matamata solo i le matagofie o le isi itu o le togalaau. Na ata le ali’i ina ua ia vaaia Ianeta ma le auauna, ona ia savali fa’anatinati atu loa lea ma fusi lana manamea ma feiloa’i atu ia te ia, ona faliu lea ma fa’afetai i lana auauna mo le galuega lelei. “Na ou fa’apea ua fuli mai lou tua ia te a’u, ae o le a fo’i so’u sese i lo ta va ua mafua ai ona e tuua na o a’u i luma o le faitotoa o le fale o loo faia ai le faamoemoe.” E lei tali Ianeta i se upu, sei vagana ona loimata na maligi fa’avai i lalo, ma ua lava lea e momoli atu ai ia Laneselota lagona mafatia o loo nofo ma ia. Na iloa e le ali’i lagona mafatia o si ana manamea, ma ua oso ai fo’i ma lona loto le fiafia. E sauni loa Laneselota ma Ianeta o le a tuli oso i le la ta’avale o le a toe fo’i, ae vaaia loa le aga’i atu o se Tina, o ia lea o le peresetene o le Faalapotopotoga na mafua ai ona la oo atu i lea itu o le aai.