Vaega 100

O le fa’ateia tele o Ianeta i le fa’aupuga o lo o tusia i le isi ie o lo o i tafatafa o le ie tele lea e fa’apipi’i ai le ata o Laneselota, na mafua ai loa ona tu mo ni nai sekone ma fa’atau pupula i le ie. E le i amanaia mai e Laneselota gaioiga a Ianeta o lo o faia i le taimi lea, ona o lea sa mua ona la talanoa ma se tasi o ali’i sa la aooga, ae ua leva aso la te lei toe feiloa’i. Ae na avea le toe faliu i tua o Laneselota e siaki Ianeta pe ua tai oo atu ma itu na ia vaaia ai le tama’ita’i, ua fuli mai lona tua ua toe savali aga’i i le ta’avale. “Ianeta! Ianeta!”, o le valaau atu lea a Laneselota ma savali telea’i atu i le tama’ita’i lea ua toe fo’i atu i le ta’avale. “Ianeta, o fea a e toe savali i ai, ua tatau ona ta i ai i totonu o le fale, e le o toe umi se taimi ona amata aloaia lea o le polokalame”. Na fa’ateia Laneselota ina ua faliu mai le tama’ita’i, ae ona vaaia ai ona foliga fa’anoanoa, o lo o tagi fo’i o ia. “Ianeta si a’u pele, e i ai se mea ua fa’aletonu ua e mafatia ai.” Na ata Ianeta mo sina taimi ona ia faapea atu lea ia Laneselota, “Vaai oe si a’u uo pele, ua ou lagona e le o atoatoa lo’u malosi, ae malie lou loto, o le a ou fa’atali atu i le ta’avale ae alu e fa’ataunu’u lau vaega, a mae’a ona e toe fo’i mai loa lea ta o.” Na fiu lava Laneselota e fa’atauanau atu i le tama’ita’i ae ua tumau lava le manatu o Ianeta e le suia. “Ou te le mana’o e te nofo atu i le ta’avale ae ou alu na o a’u, ou te mana’o lava ta te o to’alua i soo se mea ta te o i ai, ou te naunau fo’i ina ia vaai ma tagata o taua lea ua aloaia la taua faigauo.”

Na i’u lava ina fai le loto o Ianeta, ua fa’atali atu i le ta’avale ae ua alu na o Laneselota e tali le valaaulia. Ao lei ulufale le ali’i i totonu, na muamua tau lana vaai i ie tetele o lo o tautau i le pito i luma o le faitotoa e ulufale ai i totonu, o le isi ie o lo o i ai lona ata, ae o le isi ie o lo o tusia ai ni fa’aupuga. Na toeititi lava misi i le vaai a Laneselota fa’aupuga o lo o tusia i le isi is o lo o sosoo ma le ie o lo o i ai lona ata, o lea na tu ai loa le ali’i ma faitau. O se itu na faateia ai Laneselota, ina ua ia faitau atu i faaupuga o loo tusia mai i le ie lea, o lo o taua mai ai, e le fa’atagaina ni tagata uli i totonu o le fale. A o faatau pupula Laneselota i le ie, ae fa’afuase’i loa ona fa’apea mai se leo malu ia te ia, “Talofa Laneselota, susu maia lau afioga i le Failauga Faapitoa o le aso, o le a amatalia la tatou polokalame.” Na faliu Laneselota ma ia iloa atu ai le tama’ita’i o lo o fa’auluulu i ai le Faalapotopotoga lea o lo o autu i ai le polokalame o loo aga’i atu ma se ula e fa’aula ai o ia. Na vaaia e le tama’ita’i foliga le fiafia o Laneselota, ona ia fesili lea, “E i ai se mea ua fa’aletonu i lenei taeao.” Na ata ata lemu Laneselota ma toe fesili atu i le tama’ita’i lea, “Aisea ua outou tusia ai lenei ituaiga fa’asalalauga i luga o lenei ie.” Na tepa le tama’ita’i i luga i le ie ona faapea lea o lana tali, “O le faaiuga lava na tuuina mai e le Faalapotopotoga, e le taliaina ni tagata uli i totonu o le fa’amoemoe lenei, se’i vagana ai lava tagata papa’e.” Na lulu le ulu o Laneselota ona ia faapea atu lea i le tama’ita’i ta’ita’i. “Malie lou finagalo, e le mafai ona ou ulufale i totonu o le polokalame pe afai o le tulaga lena. O la’u uo tama’ita’i na ma malaga mai o se tama’ita’i meauli, e foliga mai o le mafua’aga tonu lea ua toe fo’i atu ai o ia i le ta’avale ma ona foliga fa’anoanoa, ai ona o le fa’asilasilaga lea ua outou faia. Ae malie lau susuga a le ta’ita’i, ou te le oo atu e fa’ataunu’u la’u valaaulia, o le a toe aveese uma mai fo’i la’u foa’i sa tuuina atu e fesoasoani ai i la outou Faalapotopotoga, ona o lea ua atagia mai tou te le fa’atauaina tagata uli o lo o fitoitonu i ai le autu o le fesoasoani mo matitiva.” Na ona uma lava o le fa’amatalaga a Laneselota, faliu loa ma toe savali aga’i i le la ta’avale, ae o se itu na fa’ateia ai le ali’i, ina ua taunu’u atu e le o i ai Ianeta i totonu o le ta’avale, sei vagana ai ana auauna o lo o fa’atali mai ai mo ia.